Mwendele Mako

9 Pakwabo kadi, webanenene monka’mba: “I bine nemulombola’mba kudi bamo bemene pano’pa kebakafupo poso’nka bamone bidi Bulopwe bwa Leza ke bwiye kala mu bukomo.”+ 2 Ebiya mafuku asamba pa kupita’po, Yesu wasela ba Petelo ne Yakoba pamo ne Yoano, wakanda nabo ku lūlu lulampe kwa bunka bwabo. Penepo washinta ku meso abo;+ 3 ne bivwalwa byandi bya pangala kebilelema, byatōka tō kutabuka mukokeja kwibitōkejeja muntu ense ukendanga bisandi pano pa ntanda. 4 Kadi, kwebamwekela Ediya ne Mosesa, badi besamba na Yesu. 5 Penepo Petelo wanena Yesu amba: “A Labi, i kipite buya twikale pano. Nanshi longa tushimike mapema asatu, umo obe, mukwabo wa Mosesa, ungi nandi wa Ediya.” 6 Na bubine, kadipo uyukile kya kulonga, mwanda badi na moyomoyo. 7 Penepa dikumbi dyaiya, dyebapūta, kadi diwi+ dyatamba mu dikumbi amba: “Uno’u i wami Mwana, muswedibwe.+ Mwivwanei.”+ 8 Ponkapo batala koku ne koku, kebamwenepo monka muntu wikele nabo, poso’nka Yesu.

9 Pobadi batūka ku lūlu, webakoma’mba byobamona’bya+ kebakisapwila’byo muntu, enka ne bisanguka Mwanā muntu mu bafwe.+ 10 Nabo balama owa mwanda mu mutyima,* ino besamba abo bene na bene amba le kuno kusanguka mu bafwe kushintulula bika. 11 Ebiya bashilula kumwipangula’mba: “Mwanda waka basonekeji banenanga’mba Ediya+ ufwaninwe bidi kwiya?”+ 12 Nandi webalondolola’mba: “Ediya shako wiyanga bidi ne kujokeja bintu byonso;+ ino mwanda waka i kilembwe pa mwanda wa Mwanā muntu amba ufwaninwe kupita mu masusu mavule+ ne kufutululwa?+ 13 Ino nemulombola’mba Ediya+ na bubine ke mwiye, ino bamulongele monso mobadi basakila, enka mokilembelwe pa mwanda wandi.”+

14 Pobaile kokwa kwadi bana ba bwanga bakwabo, bamona kibumbo kikatampe kibajokolokele, kwadi ne basonekeji bepatanya nabo.+ 15 Ino kibumbo kyonso pa kumumona’tu, babezemuka, banyemena kwadi kebamwimuna. 16 Penepo webepangula’mba: “Le mwipatanyanga nabo bika?” 17 Ebiya umo mu kibumbo’mwa wamulondolola’mba: “A Mufundiji, nakuletela wami mwana mwana-mulume mwanda aye udi na mushipiditu wa bu kamāma.+ 18 Ponso poumukwatyila, umuponejanga pa nshi, wamutambija kifulwe* ku kanwa, kashenkenya meno penepo bukomo bwamupwa. Nalombenga bobe bana ba bwanga beupange, ino abakomenwa.” 19 Nandi webalondolola’mba: “Yō, lukongo lwampikwa lwitabijo,+ le nkendelela nenu kufika ne kitatyi’ka? Le nkemutūkijija mutyima kufika ne kitatyi’ka? Ndetelei’ye.”+ 20 Penepo bamuletela mwanuke’wa, ino pa kumumona’tu, ponkapo mushipiditu wafulubija mwana. Kadi aye pa kupona pa nshi kaalañana, ne kifulwe kyamutamba ku kanwa tā. 21 Ebiya Yesu waipangula shandi amba: “Le byamwanjile tamba kitatyi’ka?” Nandi amba: “Tamba’tu ku bwanuke, 22 kadi divule umuponejejanga mu mudilo ne mu mema mwanda wa kumonakanya. Ino abe shi ukokeja kulonga’po kintu, nabya witufwile’ko lusa, witukwashe’ko.” 23 Yesu wamunena’mba: “Byabyo binenwa, ‘Shi ukokeja’! I amo, bintu byonso bikokejika ku muntu udi na lwitabijo.”+ 24 Ponka na ponka shandya mwana waela lubila kanena’mba: “Ndi na lwitabijo! Nkwashe’ko popa ponsakilwa lwitabijo!”+

25 Yesu, pa kumona’mba kibumbo kīyanga bukidi kobadi, wafunina mushipiditu wa disubi’wa, kaeunena’mba: “Abe mushipiditu wa bu kamāma ne bu kitwi, nakusoñanya, mutambe’mo kadi kokamutwela’mo monka!”+ 26 Pa kupwa kwela lwanji ne kumufulubija divule dine, watamba’mo, ebiya mwana waikala’nka bwa mufwe, penepo bantu bangi kebanena’mba: “Wafu!” 27 Ino Yesu wamukwata ku kuboko wamulangula, nandi waimana. 28 Penepo pa kupwa kutwela mu njibo, bandi bana ba bwanga bamwipangula kufula’mba: “Mwanda waka tubakomenwanga kwiupanga?”+ 29 Webanena’mba: “Wa uno muswelo ubwanya kutamba’nka na milombelo.”

30 Bataluka kwine’kwa kebenda, bapita dya Ngadilea, ino kebasakilepo muntu nansha umo kuyuka. 31 Mwanda wadi ufundija bandi bana ba bwanga ne kwibalombola’mba: “Mwanā muntu usa kwabwa mu makasa a bantu, kadi bakamwipaya,+ ino nansha byasa kwipaibwa, usa kusangulwa kupwa kwa mafuku asatu.”+ 32 Inoko, abo kebaivwanijepo byaadi unena, kadi bakwetwe moyo wa kumwipangula.

33 Ebiya bafika mu Kapanama. Penepo paadi mu njibo, webepangula’mba: “I bika le byomwadi mwipatanya mwishinda?”+ 34 Bauba’tu nyā, mwanda mwishinda badi bepatanya’mba le i ani mukatampe kutabuka. 35 Ebiya washikata, waita Ba Dikumi ne Babidi kaebanena’mba: “Shi muntu usaka kwikala umbajinji, ufwaninwe kwikala wa mfulo mu bonso kadi mwingidi wa bonso.”+ 36 Penepo wayata mwana mutyetye, wamwimika umbukata mwabo; aye pa kumufumbakanya maboko, webanena’mba: 37 “Ense utambula umo wa mu bana batyetye+ badi bwa uno mu dijina dyami nankyo wantambula ne amiwa; kadi ense untambula kantambwilepo enka amiwa kete, ino i ne Yewa wantumine.”+

38 Yoano wamunena’mba: “A Mufundiji, twamwene muntu umo upanga bandemona na kutela dijina dyobe netu twatompa kumukankaja, mwanda kadipo witulonda.”+ 39 Ino Yesu amba: “Kemwakitompai kumukankaja, mwanda i kutupu muntu ukalonga kilongwa kya bukomo mu dijina dyami ukapēlakana kunenena mabi. 40 Mwanda yewa ke walwana netupo i wetu.+ 41 Mwanda ense wimupa nkopo umo wa mema a kutoma mwanda’tu mwi ba Kidishitu,+ nemulombola bine amba, kakajimijapo mpalo yandi nansha dimo.+ 42 Ino ense ukukaja umo wa mu bano batyetyetyetye badi na lwitabijo, kyadi kya kumwikadila biyampe shi dibwe dya mpelo dijokolojibwanga na mpunda dyamukutyīlwe mwishingo ne kwelwa’ye mu dijiba.+

43 “Shi kuboko kobe kukukukaja, keta’ko. I kipite buya kodi kutwela mu būmi mulemane kupita’ko kwenda na maboko onso abidi mu Ngehena,* mu mudilo keubwanikapo kubulwa.+ 44* —— 45 Kadi shi kulu kobe kukukukaja, keta’ko. I kipite buya kodi kutwela mu būmi kilema kupita’ko kwelwa na maulu onso abidi mu Ngehena.*+ 46* —— 47 Kadi shi diso dyobe dikukukaja, ela’dyo.+ I kipite buya kodi kutwela na diso dimo mu Bulopwe bwa Leza kupita’ko kwelwa na meso onso abidi mu Ngehena,*+ 48 momwa kemufwangapo bivinyu ne mudilo kubula mpika.+

49 “Mwanda muntu ense ufwaninwe kwelwa mwepo na mudilo.+ 50 Mwepo i mulumbuluke, ino shi mwepo ujimije butobaji bwao, lelo mukeutobaja na bika?+ Ikalai na mwepo munda mwenu,+ kadi lamai ndoe banwe bene na bene.”+