Bene Levi

20 Yehova wesamba monka na Mosesa amba: 2 “Ufwaninwe kulombola bene Isalela amba, ‘Muntu ense wa Isalela ne mweni ense ushikatanga mu Isalela upāna lutundu lwandi kudi Moleke, ufwaninwe binebine kufikijibwa ku lufu.+ Bantu ba ntanda’ya bafwaninwe kumwasa mabwe enka ne byafwa. 3 Nkapela yao muntu, kadi nkamutyiba’ko* mu bantu bandi, mwanda wapāna lutundu lwandi kudi Moleke kadi wasubija kifuko kyami kijila+ ne kukobakanya dijina dyami dijila. 4 Shi bantu ba ntanda’ya bakapūte meso pa bilonga yao muntu papāna lutundu lwandi kudi Moleke ne kumufikija ku lufu mpika,+ 5 nabya bine nkapela yao muntu ne kisaka kyandi.+ Nkatyiba’ko* yao muntu mu bantu bandi pamo ne boba bonso belungile nandi mu kulonga busekese na Moleke.

6 “‘Yewa muntu* walamukila ku babuka na bibanda+ ne bilumbu+ mwanda wa kulonga nabo busekese bwa ku mushipiditu, nkalamukila yao muntu* ne kumutyiba’ko* mu bantu bandi.+

7 “‘Mufwaninwe kwipandula ne kwikala bajila,+ mwanda amiwa ne Yehova Leza wenu. 8 Kadi mufwaninwe kulama bitungo byami ne kwibilonda.+ Amiwa ne Yehova, mwine wimupandula.+

9 “‘Shi kudi muntu ufinga* shandi nansha inandi, ufwaninwe binebine kufikijibwa ku lufu.+ Byaafinga shandi nansha inandi, mashi andi adi pa mutwe wandi.

10 “‘Ino shi muntu walonga makoji na mukaja mukwabo: Yewa ulongele makoji na mukaja mukwabo ufwaninwe binebine kufikijibwa ku lufu, ne mwana-mulume ne mwana-mukaji mwine.+ 11 Muntu ulāla na mukaja shandi, wafwija shandi bumvu.*+ Bonso babidi bafwaninwe binebine kufikijibwa ku lufu. Mashi abo adi pa mutwe wabo. 12 Shi muntu walāla na mukaja wandi mwana, bonso babidi bafwaninwe binebine kufikijibwa ku lufu. Abajilula bintu bya kipangila. Mashi abo adi pa mutwe wabo.+

13 “‘Shi mwana-mulume walāla na mwana-mulume na mulādilwanga na mwana-mukaji, nabya abo bonso babidi abalonga kintu kya munyanji.+ Bafwaninwe binebine kufikijibwa ku lufu. Mashi abo adi pa mutwe wabo.

14 “‘Shi muntu wasonge mwana-mukaji kadi wayata ne inandya mukaji, i kilongwa kya kiboja.*+ Bafwaninwe kumusōka mu mudilo+ ne aye ne abo bene, kutyina’mba wao mwiendelejo wa kiboja wakendelela mu bukata mwenu.

15 “‘Shi mwana-mulume walāla na nyema, ufwaninwe binebine kufikijibwa ku lufu, kadi mufwaninwe kwipaya nyema’wa.+ 16 Shi mwana-mukaji wafwena nyema mwanda wa kulāla nandi,+ mufwaninwe kwipaya mwana-mukaji ne nyema mwine. Bafwaninwe binebine kufikijibwa ku lufu. Mashi abo adi pa mitwe yabo.

17 “‘Shi muntu walāla na mwanabo mwana-mukaji, mwanā shandi nansha mwanā inandi, kadi wamone mutaka wandi, nandi wamumone mutaka wandi, i bya bumvu.+ Bafwaninwe kutyibwa’ko* ku meso a bana ba bantu babo. Wafwija mwanabo bumvu.* Ukapebwa mfuto pa kilubo kyandi.

18 “‘Shi muntu walāla na mwana-mukaji mwende ku mweji, bonso babidi kebalēmekelepo nsulo ya mashi andi.+ Bonso bafwaninwe kutyibwa’ko* mu bantu babo.

19 “‘Kufwaninwepo kulāla na mwanabo na inobe mwana-mukaji nansha na mwanabo na shobe mwana-mukaji, nabya ukafwija mubutule wa ku mashi bumvu.+ Bakapebwa mfuto pa kilubo kyabo. 20 Muntu ulāla na mukaja mwanabo na shandi, wafwija mwanabo na shandi bumvu.*+ Bakapebwa mfuto pa bubi bwabo. Bafwaninwe kufwa kwampikwa mwana. 21 Shi muntu wayata mukaja mwanabo, i kintu kya munyanji.+ Wafwija mwanabo bumvu.* Kebakekalapo na mwana.

22 “‘Mufwaninwe kulama bitungo byami byonso ne mutyibilo wami wa mambo+ ne kwibilonda,+ kutyina’mba ntanda yonkemutweja kushikata’mo yakemulasa.+ 23 Kemufwaninwepo kulonda bitungo bya yoya mizo yonapinga ku meso enu;+ mwanda yalongele bino bintu byonso’bi nami neishikididilwa.+ 24 O mwanda nemulombwele amba: “Mukayata ntanda yabo ke yenu, kadi nkemupa’yo bu kintu kyenu, ntanda ikuka mabele ne būki.+ Ami ne Yehova Leza wenu, mwine wemusansenye mu bantu.”+ 25 Mufwaninwe kushiyañanya nyema wampikwa disubi na wa disubi, ne kyoni kya disubi na kyampikwa disubi;+ kemufwaninwepo kwialamuna banwe bene* kemudi ba mukenye na nyema nansha kyoni nansha kintu kyo-kyonso kilandala pa nshi kyonasansenye amba mwikimone bu kya disubi.+ 26 Mufwaninwe kwikala bajila kondi, mwanda amiwa Yehova, ne ujila,+ kadi nemusansanya mu bantu amba mwikale bami.+

27 “‘Mwana-mulume nansha mwana-mukaji ense ubuka na bibanda nansha kilumbu* ufwaninwe binebine kufikijibwa ku lufu.+ Bantu bafwaninwe kwibasa mabwe enka ne byobafwa. Mashi abo adi pa mutwe wabo.’”