Divilu

35 Kupwa Mosesa wakongakanya pamo kitango kyonso kya bene Isalela kaebanena’mba: “Bino’bi byo byasoñanya Yehova kulonga:+ 2 Mingilo ikengilwa mu mafuku asamba, ino difuku dya busamba-bubidi dikekala kintu kijila kodi, i dya sabato dya kukōkolokwa ku byonso kudi Yehova.+ Yewa ense wingila’mo mingilo ukepaibwa.+ 3 Kufwaninwepo kubanza mudilo mu kīkalo kyobe kyo-kyonso mu difuku dya Sabato.”

4 Penepo Mosesa wanena kitango kyonso kya bene Isalela amba: “Kino’ki kyo kyasoñanya Yehova amba, 5 ‘Tambwila Yehova byabuntu umbukata mwenu.+ Yewa ense wa mutyima uswile+ aletele Yehova byabuntu: olo, ndalama, mukuba, 6 nyushi ifītuluka, myoya ityilakana, bityila pyā, bukonge bulumbuluke, myoya ya bambuji,+ 7 biseba bya mikōko byabike mu mwīno utyila, biseba bya foke, mutyi wa akashia, 8 māni a binanu, balasome ya māni a kushinga ne ya ensense ya mananshi,+ 9 mabwe a onikise, ne mabwe makwabo a kwela ku efoda+ ne ku kivwalwa kya pa kyadi.+

10 “‘Bonso ba bwino*+ umbukata mwenu bāye balonge bintu byonso byasoñanya Yehova, 11 ko kunena’mba kipema, pema wakyo ne kya kupūta’po, malobo akyo ne makadelema, mikabo yakyo, ne bikomo, ne bitako byakyo bya mapuki; 12 Sanduku+ ne mitembo yandi,+ mpūto,+ ne mpashila+ ya kukinga’ko; 13 meza+ ne mitembo yao ne bipungwa byao byonso ne mikate milombolwe;+ 14 kitūlwa-binanu+ mwanda wa kitōkeji ne bipungwa byakyo ne binanu byakyo ne māni mwanda wa kumunika;+ 15 kisōkelo kya ensense+ ne mitembo yakyo; māni a kushinga ne ensense ya mananshi;+ ne kya kukinga* ku kibelo kya kipema; 16 kisōkelo kya kyamulambu kisōkwe+ ne seketa wakyo wa mukuba, mitembo yakyo ne bipungwa byakyo; kyoilo ne kitako kyakyo;+ 17 mampashila ayela a kipango,+ bikomo byakyo ne bitako byakyo bya mapuki; kya kukinga* ku kibelo kya kipango; 18 bikomo bya kipema ne bikomo bya kipango ne myonji yabyo;+ 19 bivwalwa bisuke biyampe+ bya kwingila nabyo mu kipandulwe, bivwalwa bijila bya Alone+ kitobo, ne bivwalwa bya bandi bana mwa kwingidila bu babitobo.’”

20 Ebiya kitango kyonso kya bene Isalela kyataluka ku meso a Mosesa. 21 Penepo yewa ense wakunkilwe mutyima+ ne yewa ense watonwenwe na mushipiditu, waiya waletela Yehova byabuntu bya kwingidija mwanda wa pema wa kubungakena’ko, mwanda wa mingilo yandi yonso, ne mwanda wa bivwalwa bijila. 22 Badi bāya’nka kwiya, bana-balume ne bana-bakaji kumo, ense wa mutyima uswile, waleta byuma bya mpengele, nzenze ya ku matwi, nzenze, ne bidyangulwa bikwabo, pamo ne bintu bya olo bya miswelo yonso. Bonso batūla byamulambu* byabo bya olo kudi Yehova.+ 23 Kadi boba bonso badi na nyushi ifītuluka, myoya ityilakana, bityila pyā, bukonge bulumbuluke, myoya ya bambuji, biseba bya mikōko byabike mu mwīno utyila, ne biseba bya foke baleta’byo. 24 Boba bonso badi na byabuntu bya ndalama ne mukuba baletela Yehova byabuntu, ne bonso badi na mityi ya akashia baleta’yo mwanda wa kipindi kyo-kyonso kya mwingilo.

25 Bana-bakaji bonso ba bwino+ bajinga bya kujinga na makasa abo, baleta byobajingile’bya: nyushi ifītuluka, myoya ityilakana, bityila pyā, ne bukonge bulumbuluke. 26 Kadi bana-bakaji bonso ba bwino bakunkilwe mityima yabo bajinga myoya ya bambuji.

27 Bamfumu baleta mabwe a onikise ne mabwe makwabo a kwela ku efoda ne ku kivwalwa kya pa kyadi,+ 28 ne balasome ne māni a kumunika nao ne māni a kushinga+ ne a ensense ya mananshi.+ 29 Bana-balume ne bana-bakaji bonso bakunkilwe mityima yabo baleta bintu kampanda mwanda wa mwingilo wasoñenye Yehova kulonga, kupityila kudi Mosesa; bene Isalela baleta’byo bu byamulambu bya kwilanga kudi Yehova.+

30 Penepo Mosesa wanena bene Isalela amba: “Talai, Yehova watonge Bezalela mwanā Udi mwanā Hula wa ku kisaka kya Yuda.+ 31 Wamuyuja mushipiditu wa Leza, wamupe tunangu, ñeni, ne buyuki bwa miswelo yonso ya busendwe 32 mwanda wa kulonga bipungwa bya busendwe, kwingila na olo, na ndalama, ne mukuba, 33 mwanda wa kusōnga mabwe ne kwiakwika, ne kupunga miswelo yonso ya bipungwa bya mityi bya bwino. 34 Kadi watūla’kyo mu mutyima wandi amba afundije, aye ne Ohodiaba+ mwanā Ahisamaki wa ku kisaka kya Dani. 35 Webayuja bwino*+ bwa kwingila mingilo yonso ya busendwe, ya kutungula bisandi, ne kusuka na nyushi ifītuluka, myoya ityilakana, bityila pyā, bukonge bulumbuluke, ne kusuka bisandi. Bano bantu’ba bakalonga mingilo ya miswelo yonso ne kulongolola bupunga bwa miswelo yonso.