Mwendele Mako

10 Kutaluka papo waenda ku mikalañano* ya Yudea bobwa bukila bwa Yodano, penepo bibumbo byebungila monka kwadi. Nandi enka mwaadi wibidile kulongela, washilula kwibafundija monka.+ 2 Ebiya Bafadiseo bamufwena, na mulangwe wa kumutompa, bamwipangula shi ke kijilapo muntu kulubula mukaji.+ 3 Webalondolola’mba: “Le Mosesa wēmusoñenye bika?” 4 Banena’mba: “Mosesa wāletele lupusa lwa kulemba mukanda wa kumupanga ne kumulubula.”+ 5 Ino Yesu webanena’mba: “Pa mwanda wa mityima yenu myūmu,+ wēmulembēle ino mbila.+ 6 Inoko, tamba ku ngalwilo ya bupangi, ‘Aye wēbalongele ba mwana-mulume ne mwana-mukaji.+ 7 O mwanda mwine mwana-mulume ukashiya shandi ne inandi,+ 8 penepo abo babidi bakekala ngitu imo,’+ papo kebakidipo babidi, aa, ino ke ngitu imo. 9 Nanshi, kyokya kyakuta Leza pamo mu lupungu, muntu nansha umo kakikalañanya’kyo.”+ 10 Pobadi monka mwinjibo, bana ba bwanga bashilula kumwipangula pa uno mwanda. 11 Nandi webanena’mba: “Yewa ense ulubula wandi mukaji kadi wasonga ungi nankyo wamupi mambo a makoji,+ 12 kadi shi mwana-mukaji nandi wapu kwilubula na mulumyandi, asongwe na ungi, walonga makoji.”+

13 Penepo bantu bashilula kumuletela bana batyetye amba ebatenge, ino bana ba bwanga bebakanda.+ 14 Yesu pa kumona nabya, wafītwa mutyima kaebanena’mba: “Lekai bana batyetye bāye kondi; kemwakatompai kwibakankaja, mwanda Bulopwe bwa Leza i bwa boba badi bwa abo.+ 15 I bine nemulombola’mba, yewa ense katambulapo Bulopwe bwa Leza pamo bwa mwana mutyetye kakatwela’mopo nansha dimo.”+ 16 Ebiya wasela bana mu maboko washilula kwibesela, webatenteka ne makasa.+

17 Paadi kaenda, muntu umo waiya lubilo wapona manwi pa nshi ku meso andi kamwipangula’mba: “A Mufundiji Muyampe, i kika kyomfwaninwe kulonga nkapyane būmi bwa nyeke?”+ 18 Yesu wamunena’mba: “Kyoungityila bu muyampe i kika? I kutupu muyampe poso umo kete, ke Leza kadi.+ 19 Abe uyukile mbila: ‘Kokepayañana,+ kokalonga makoji,+ kokeba,+ kokaleta bukamoni bwa bubela,+ kokadimbañana,+ lēmeka shobe ne inobe.’”+ 20 Muntu’wa wamunena’mba: “A Mufundiji, byabyo byonso ndamine’byo tamba ku bwanuke.” 21 Yesu wamutala sō, wamusanswa, kamunena’mba, “Kudi kintu kimo kyowabulwa: Enda, kapoteje bintu byodi nabyo ne kupāna ku balanda, penepo ukekala na byabulēme mūlu; kupwa iya wikale mulondi wami.”+ 22 Ino aye mutyima wamusansa pa kino kilondololwa, wataluka mufītwe mutyima, mwanda wadi na bintu bingibingi.+

23 Yesu watala koku ne koku, wanena bandi bana ba bwanga’mba: “Bine, kikekala kikomo bininge ku bantu ba lupeto kutwela mu Bulopwe bwa Leza!”+ 24 Ino bana ba bwanga batulumuka binenwa byandi. Ebiya Yesu webalondolola’mba: “A bana, bine i kikomo bininge kutwela mu Bulopwe bwa Leza! 25 I kipēla’ko ngamedia kupita mu keso ka lushinge kutabuka’ko mpeta kutwela mu Bulopwe bwa Leza.”+ 26 Po pene batulumuka kebamunena* amba: “Le penepo i ani ubwanya kukapanda?”+ 27 Yesu webatala sō, kanena’mba: “Ku bantu kebibwanikapo ino kudi Leza kebidipo nabya, mwanda bintu byonso bibwanikanga kudi Leza.”+ 28 Petelo waanza kumunena’mba: “Tala! Batwe tubashiye bintu byonso ketukulonda.”+ 29 Yesu wanena’mba: “I bine nemulombola’mba, i kutupu nansha umo ushiya njibo nansha banababo bana-balume nansha banababo bana-bakaji nansha inandi nansha shandi nansha bana nansha madimi pa mwanda wa amiwa ne pa mwanda wa myanda miyampe+ 30 ukabulwa pano mu kino kitatyi kumona misunsa 100—mobo, banababo bana-balume, banababo bana-bakaji, bainandi, bana, ne madimi, ne kupangwapangwa ponka+—kadi mu ngikadilo ya bintu ikāya’ko* namo, būmi bwa nyeke. 31 Inoko, bavule babajinji bakekala ba mfulo, ba mfulo nabo babajinji.”+

32 Penepa, byobadi mu dishinda bakanda ku Yelusalema, papo Yesu wibatangidile kumeso, nabo batulumuka, ino boba badi bamulonda baanza kwivwana moyo. Wakokela dikwabo kufula Ba Dikumi ne Babidi kaebalombola bino bintu byadi kebisake kumufikila’mba:+ 33 “Talai! Yeu tukanda ku Yelusalema, Mwanā muntu ukapānwa ku babitobo bakulu ne basonekeji. Bakamuponeja’mba epaibwe kadi bakamupāna ku bantu ba mizo, 34 ne kadi bano’ba bakamuzawila ne kumupēlela mata, bakamukupila nsonde, ne kumwipaya, ino mafuku asatu pa kupita’po ukasanguka.”+

35 Ebiya ba Yakoba ne Yoano, bana ba Zebede,+ bamufwena kebamunena’mba: “A Mufundiji, tusaka witulongele kyonso kyotwakakulomba’kya.”+ 36 Nandi webanena’mba: “Le kyomusaka nemulongele i kika?” 37 Nabo bamulondolola’mba: “Witupe tushikate, umo ku kuboko kobe kwa lundyo mukwabo nandi ku lunkuso lobe, mu ntumbo yobe.”+ 38 Ino Yesu webanena’mba: “Banwe kemuyukilepo byomulomba’byo. Le mubwanya kutoma kitomeno kyontoma’ki nansha kubatyijibwa lubatyijo lombatyijibwa’lu?”+ 39 Nabo bamunena’mba: “En-en, tubwanya.” Penepa, Yesu webanena’mba: “Kitomeno kyontoma’ki, mukatoma’kyo, kadi lubatyijo lombatyijibwa’lu, mukabatyijibwa’lo.+ 40 Inoko, kushikata ku kuboko kwami kwa lundyo nansha ku lunkuso lwami ke kyamipo kya kupāna, ino i kya boba balongolwedilwe’kyo kala.”

41 Penepo boba bakwabo dikumi pa kwivwana nabya, bafītyilwa ba Yakoba ne Yoano.+ 42 Ino Yesu webetyila kwadi, webanena’mba: “Muyukile amba boba bamweka* bu babikele bantu ba mizo bebatādilanga kadi bakatampe babo bengidijanga lupusa pobadi.+ 43 Kekifwaninwepo kwikala namino mu bukata mwenu; ino yewa ense usaka kwikala mukatampe mu bukata mwenu ufwaninwe kwikala mwingidi wenu,+ 44 kadi yewa usaka kwikala mubajinji mu bukata mwenu ufwaninwe kwikala umpika wa bonso. 45 Mwanda nansha Mwanā muntu kailepo mwanda wa kwingidilwa, aa, ino waidile kwingidila bantu+ ne kupāna būmi bwandi* ke kinkūlwa kya kukūla bavule bene.”+

46 Ebiya baiya mu Yediko. Ino aye ne bandi bana ba bwanga ne kibumbo kikatampe kine pobadi batamba mu Yediko, Batemisa (mwanā Temisa), mpofu wa lulombo, wadi ushikete kufula kwa dishinda.+ 47 Aye pa kwivwana’mba i Yesu mwine Nazala, waanza kwela lubila’mba: “A Mwanā Davida,+ Yesu, mfwile’ko lusa!”+ 48 Penepo bavule kebamufunina, bamulombola ekale talala, ino aye po pene kaela’nka kwela mabila’mba: “A Mwanā Davida, mfwile’ko lusa!” 49 Ebiya Yesu waimana kanena’mba: “Ngityilei’ye.” Penepa baita mpofu’wa, kebamunena’mba: “Kankamana! Imana; yewa ukwita.” 50 Nandi waela kivwalwa kyandi kya pangala, waimana bukidi kaenda kudi Yesu. 51 Penepo Yesu wamunena’mba: “Le kyosaka nkulongele i kika?” Mpofu’wa nandi wamutentulula’mba: “Laboni,* nsakanga meso ami amone.” 52 Yesu wamunena’mba: “Enda. Lwitabijo lobe lubakukomeja.”+ Ponka na ponka meso andi amona,+ washilula kumulonda mu dishinda.