Kupituluka mu Bijila

12 “Ino’i yo misoñanya ne mutyibilo wa mambo omufwaninwe kuta mutyima kulonda mafuku onso omukekala bōmi mu ntanda ikemupa Yehova Leza wa bakulutuba benu kuyata’yo ke yenu. 2 Mukonakanya fututu bifuko byonso bya mizo yomukapanga byobadi bengidila’po baleza babo,+ shi pa ngulu milamila, nansha pa mikuna, nansha munshi mwa mityi mivwambile. 3 Mufwaninwe kupomona bisōkelo byabo, kuvingakanya bikomo byabo bikola,+ kusōka byabo bipanda bikola* mu mudilo, ne kutyumuna bankishi basōnge ba baleza babo,+ kujimankanya majina abo pa kifuko’kya.+

4 “Kemufwaninwepo kutōta Yehova Leza wenu wao muswelo.+ 5 Ino, kimbai Yehova Leza wenu konso kwatonga kutūla dijina dyandi ne kifuko kyandi kya kwikala’po mu bisaka byenu byonso, kadi endai’ko.+ 6 Kwine’kwa ye komukaselela byamulambu byenu bisōkwe,+ bitapwa byenu, bya kujikija dikumi* byenu,+ kyabuntu kya ku makasa enu,+ byamulambu byenu bya mpiko, byamulambu byenu bya kwilanga,+ ne bilala-ndá bya bañombe ne bya mikōko yenu.+ 7 Banwe ne ba mu njibo yenu mukadīla kwine’kwa, ku meso a Yehova Leza wenu+ ne kusangala mu mingilo yenu yonso+ mwanda Yehova Leza wenu wemwesela.

8 “Kemufwaninwepo kulonga na motulongela dyalelo dino’di, muntu ense ulonga byobya byamona bu byoloke mu meso andi aye mwine,* 9 mwanda kemwatwelele mu kifuko kya kukōkolokwa,+ bupyani bukupa Yehova Leza obe. 10 Shi mubaabuka Yodano+ kemushikete mu ntanda imupa Yehova Leza wenu muyate’yo ke yenu, ukemupa binebine kukōkolokwa ku balwana nenu bonso bemujokolokele, kadi mukekala na mutyima-ntenke.+ 11 Mukaselela byonso byonemusoñanya ku kifuko kitonga Yehova Leza wenu kwikala’po dijina dyandi+—byamulambu byenu bisōkwe, bitapwa byenu, bya kujikija dikumi byenu,+ kyabuntu kya ku makasa enu, ne kyamulambu kyenu kyonso kya mpiko yomwapikile kudi Yehova. 12 Mukasangala ku meso a Yehova Leza wenu,+ banwe ne benu bana bana-balume ne benu bana bana-bakaji, bapika benu bana-balume ne bana-bakaji, ne mwine Levi udi mu bibundi* byenu, mwanda aye kapelwepo kipindi nansha bupyani pamo nenu.+ 13 Tá mutyima kutyina’mba wakalambula byamulambu byobe bisōkwe pa kifuko kikwabo kyonso kyobwanya kumona.+ 14 Ufwaninwe kulambula byamulambu byobe bisōkwe enka pa kifuko kitonga Yehova mu ntanda imo ya mu matanda a bisaka byenu, kadi e kokalongela bintu byonso byonkusoñanya.+

15 “Ino kitatyi kyonso kyosaka,* ubwanya kutapa ne kudya mwita wa ntanda+ mungya madyese akupa Yehova Leza obe mu bibundi byobe byonso.* Muntu wa disubi ne wampikwa disubi ubwanya kudya’o, monka modīlanga kasha nansha kasha kalume. 16 Ino kemufwaninwepo kudya mashi;+ ukamwanga’o pa nshi pamo bwa mema.+ 17 Kukekalapo na lupusa lwa kudya mu bibundi byobe* kipindi kimo kya pa bipindi dikumi bya miseke yobe, vinyu yobe mipya, māni obe, bilala-ndá bya bañombe ne mikōko yobe,+ kintu kyonso kya mu byamulambu byobe bya mpiko yopikile, byamulambu byobe bya kwilanga, nansha kyabuntu kya ku makasa obe. 18 Bino’bi ukebidya ku meso a Yehova Leza obe mu kifuko kikatonga Yehova Leza obe+—abewa ne obe mwana mwana-mulume, ne obe mwana mwana-mukaji, ne mwingidi obe mwana-mulume ne mwana-mukaji, ne mwine Levi udi mu bibundi* byobe; kadi ukasangala ku meso a Yehova Leza obe mu mingilo yobe yonso. 19 Tá mutyima, kokelwa mwine Levi+ ponso podi mūmi mu ntanda yobe.

20 “Shi Yehova Leza obe wabaija ntanda yobe,+ monka mwaakulaile’kyo,+ penepa konena’mba, ‘Nsaka kudya mwita wa ntanda,’ mwanda ubasake* kudya mwita wa ntanda, ubwanya kudya mwita wa ntanda kitatyi kyonso kyosaka’o.*+ 21 Shi kifuko kitonga Yehova Leza obe kutūla dijina dyandi+ kidi kulampe na kodi, ukatapa mu bañombe bobe ne mu mikōko yobe ikupele Yehova, monka monakusoñaninye, kadi ukeudya mu bibundi* byobe kitatyi kyonso kyosaka’o.* 22 Ukeudya monka modīlanga kasha ne kasha kalume;+ muntu wa disubi ne wampikwa disubi mwine ubwanya kudya’o. 23 Ino sumininwa bininge uleke kudya mashi,+ mwanda mashi i būmi,*+ kadi kufwaninwepo kudya būmi* pamo ne mwita. 24 Kufwaninwepo kudya’o. Ukeamwanga pa nshi pamo bwa mema.+ 25 Kufwaninwepo kudya’o, amba bikwendekele biyampe abe ne bobe bana bakāya’ko, mwanda ubalonga byoloke ku meso a Yehova. 26 Ukasela enka bintu bijila byobe ne byamulambu byobe bya mpiko shi koiya ku kifuko kikatonga Yehova. 27 Kwine’kwa e kokalambula byamulambu byobe bisōkwe, mwita ne mashi,+ pa kisōkelo kya Yehova Leza obe, kadi mashi a bitapwa byobe akapungululwa dya ku kisōkelo+ kya Yehova Leza obe, ino mwita ukokeja kwiudya.

28 “Tá mutyima ukōkele bino binenwa byonso byonkusoñanya, amba bikwendekele biyampe mafuku onso abewa ne bobe bana bakāya’ko, mwanda ubalonga biyampe kadi byoloke ku meso a Yehova Leza obe.

29 “Shi Yehova Leza obe watukija fututu mizo yomukapanga,+ ebiya kemushikete mu ntanda yabo, 30 tá mutyima kutyina wakapya mu kidiba abo pa kupwa kutukijibwa fututu ku meso obe. Kokipangula myanda ya baleza babo amba, ‘Le ino mizo yadi ingidilanga baleza babo namani? Nami nkalonga’nka namino.’+ 31 Kufwaninwepo kulonga namino kudi Yehova Leza obe, mwanda balongelanga baleza babo kintu kyonso kya munyanji kishikilwe Yehova, basōkela baleza babo+ enka ne babo bana bana-balume ne babo bana bana-bakaji mu mudilo. 32 Kinenwa kyonso kyonemusoñanya e kyomufwaninwe kuta’ko mutyima kulonga.+ Kemufwaninwepo kubweja’ko nansha kupatula’ko.+