Yelemia

36 Penepo mu mwaka wa buná wa Yehoyakimi+ mwanā Yoshia, mulopwe wa Yuda, kino kinenwa kya Yehova kyaiya kudi Yelemia amba: 2 “Yata muvungo,* ulembe’mo binenwa byonso byonakusapwila padi Isalela ne Yuda+ ne mizo yonso,+ tamba difuku dibajinji dyonesambile nobe mu mafuku a Yoshia kufika ne dyalelo.+ 3 Kepabulwe padi bantu ba mu njibo ya Yuda pa kwivwana byamalwa byonso byonsaka kwibaletela, bakajoka ku mashinda abo mabi, amba nami nebalekele kilubo kyabo ne bubi bwabo.”+

4 Penepo Yelemia waita Baluki+ mwanā Nedia, kadi Yelemia wamulombola binenwa byonso byamusapwidile Yehova, Baluki nandi webilemba mu muvungo.*+ 5 Ebiya Yelemia wasoñanya Baluki amba: “Amiwa ne mupelejibwe kutwela mu njibo ya Yehova. 6 Nanshi abewa ye ufwaninwe kukatwela’mo ne kutanga na diwi dikatampe binenwa bya Yehova bya mu muvungo byonakulombwele, nobe webilemba. Tanga’byo mu matwi a bantu ku njibo ya Yehova mu difuku dya kushikilwa na nzala; nabya ukatangila’byo bantu bonso ba Yuda batambanga ku byabo bibundi bāya kutwela’mo. 7 Kepabulwe padi kulomba kobalomba bebatōkelwe mutyima kukafika kudi Yehova, kadi bakajoka, muntu ne muntu ku mashinda andi mabi, mwanda bulobo ne bukalabale bwasapula Yehova pa bano bantu i bukatampe.”

8 Penepo Baluki mwanā Nedia walonga byonso byamusoñenye mupolofeto Yelemia; watanga mu muvungo* binenwa bya Yehova na diwi dikatampe ku njibo ya Yehova.+

9 Ebiya mu mwaka wa butano wa Yehoyakimi+ mwanā Yoshia, mulopwe wa Yuda, mu kweji wa kitema, bantu bonso ba mu Yelusalema ne bantu bonso batambile ku bibundi bya Yuda baiya mu Yelusalema, baela lubila lwa kushikilwa na nzala ku meso a Yehova.+ 10 Penepo Baluki watanga mu muvungo* binenwa bya Yelemia na diwi dikatampe mu matwi a bantu bonso ku njibo ya Yehova, mu kyumba* kya Ngemadia+ mwanā Shafana+ mutentudi,* mu kipango kya pangala, pa ntwelelo ya kibelo kipya kya njibo ya Yehova.+

11 Ebiya Mikaya mwanā Ngemadia mwanā Shafana pa kwivwana binenwa byonso bya Yehova bya mu muvungo,* 12 watūkila ku njibo* ya mulopwe, ku kyumba kya mulembi. Kwadi kushikete bamfumu* bonso: Edishama+ mulembi, ne Delaya mwanā Shemaia, ne Elenatana+ mwanā Akabola,+ ne Ngemadia mwanā Shafana, ne Zedekia mwanā Hanania, ne bamfumu bakwabo bonso. 13 Mikaya webasapwila binenwa byonso byawaivwene padi patanga Baluki muvungo* mu matwi a bantu bonso.

14 Penepo bamfumu bonso batuma Yehudi mwanā Netania mwanā Shelemia mwanā Kushi kudi Baluki amba: “Iya, sela ne muvungo owatanga mu matwi a bantu.” Ebiya Baluki mwanā Nedia wasela muvungo mu kuboko kwandi waenda kobadi. 15 Bamunena’mba: “Tubakwisāshila, shikata witutangile’o na diwi dikatampe.” Baluki nandi webatangila’o.

16 Abo pa kwivwana’tu binenwa byonso, kebetale na moyo, kupwa banena Baluki amba: “Bine, tusa kulombola mulopwe bino binenwa byonso.” 17 Kadi baipangula Baluki amba: “Tubakwisāshila, witusapwile mowalembele bino binenwa. Le i aye wakulombwele’byo?” 18 Baluki nandi webalondolola’mba: “Aye waunombwele bino binenwa byonso, nami nalemba’byo na bwīno mu uno muvungo.”* 19 Penepo bamfumu balombola Baluki amba: “Enda mukafyame, abe ne Yelemia, muntu nansha umo kakiyuka komudi.”+

20 Ebiya baenda kudi mulopwe, mu kipango, kadi batūla muvungo’wa mu kyumba kya Edishama mulembi, kupwa balombola mulopwe bintu byonso byobaivwene.

21 Penepo mulopwe watuma Yehudi+ akasele muvungo, nandi weusela mu kyumba kya Edishama mulembi. Yehudi waanza kutanga’o mu matwi a mulopwe ne a bamfumu bonso badi bemene kubwipi na mulopwe. 22 Mulopwe wadi ushikete mu njibo ya mu kitatyi kya mashika, mu kweji wa kitema,* koku mudilo wa mbabula utēma ku meso andi. 23 Yehudi paadi upwa kutanga mikuku isatu nansha iná, mulopwe wadi uketa kipindi’kya na lupete lwa mulembi, wekyela mu mudilo wadi utēma pa mbabula, kufika ne byapwidile muvungo onso mutuntulu mu mudilo wadi pa mbabula. 24 Kebaivwenepo moyo; ne mulopwe ne bengidi bandi bonso baivwene bino binenwa byonso kebasaninepo bivwalwa byabo. 25 Nansha ba Elenatana,+ ne Delaya,+ ne Ngemadia+ byobazenzele mulopwe aleke kusōka muvungo, ino aye kebevwenepo. 26 Kadi mulopwe wasoñenye Yelamele mwanā mulopwe, ne Selaya mwanā Azidiele, ne Shelemia mwanā Abedele bakakwate Baluki mulembi ne mupolofeto Yelemia, ino Yehova webafya.+

27 Kinenwa kya Yehova kyaiya monka kudi Yelemia papwile mulopwe kusōka muvungo mwadi binenwa byalembele Baluki byamulombwele Yelemia,+ amba: 28 “Yata muvungo mukwabo ulembe’mo binenwa byonso byadi mu muvungo mubajinji, wasōkele Yehoyakimi mulopwe wa Yuda.+ 29 Kadi ukalombola Yehoyakimi mulopwe wa Yuda amba, ‘Yehova wanena namino amba: “Ubasōka uno muvungo konena’mba, ‘I kika kyowalembele’mo amba: “Bine mulopwe wa Babiloni ukāya konakanya ino ntanda ne kukubija’mo bantu ne banyema”?’+ 30 O mwanda Yehova wanena Yehoyakimi mulopwe wa Yuda amba, ‘Kakekalapo na muntu wa kushikata pa lupona lwa Davida,+ kadi umbidi wandi mufwe ukatūlwa ku kyanga dyuba ne ku mashika bufuku.+ 31 Nkamwita aye ne lutundu* lwandi ne bengidi bandi bāye beshintulwile pa kilubo kyabo, kadi nkebaletela abo ne bekadi ba Yelusalema ne bantu ba Yuda byamalwa byonso byonesamba pobadi,+ ino abo kwivwana mpika.’”’”+

32 Penepo Yelemia wayata muvungo mukwabo wapa’o Baluki mwanā Nedia, mulembi,+ ebiya Yelemia wamulombola, nandi walemba binenwa byonso byadi mu muvungo* wasōkele Yehoyakimi mulopwe wa Yuda mu mudilo.+ Kadi wabweja’ko ne binenwa bikwabo bivule pamo bwa byobya.