Nkindi

19 I kipite buya kwikala mulanda unangila mu bululame+

Kupita’ko kwikala kivila ne kwisamba bya bubela.+

 2 Muntu* wampikwa buyuki ke muyampepo,+

Kadi yewa ulonga bintu na bulobo* uloñanga bubi.

 3 I bulembakane bwa muntu mwine bunyengakanya dishinda dyandi,

Kadi mutyima wandi wakalabela Yehova.

 4 Bupeta bukokanga balunda bangi,

Ino mulanda bakamushiya enka ne kudi balunda nandi.+

 5 Kamoni wa bubela kakabulwepo kupebwa mfuto,+

Kadi yewa ubepa ponso pafoma kakapandepo.+

 6 Bavule bakimbanga kwitabijibwa na wa bulēme,*

Kadi muntu ense i mulunda wa muntu upāna byabuntu.

 7 Banababo na mulanda bonso bamushikilwe;+

Balunda nandi po pene bamunyema!+

 9 Kamoni wa bubela kakabulwepo kupebwa mfuto,

Kadi yewa ubepa ponso pafoma ukonekanga.+

10 Ke byendele’mopo mulembakane kwikala mu bupeta;

Le penepo mwingidi ubikadila namani bamfumu!+

11 Bujinguludi bwa muntu bine butalajanga bulobo bwandi,+

Kadi kusūla* kilubo* i buya kwadi.+

12 Bukalabale bwa mulopwe budi pamo bwa kubuluma kwa ntambo,*+

Ino kwitabijibwa nandi kudi pamo bwa lumé pa biyombo.

13 Mwana kivila uletelanga shandi masusu,+

Kadi mukaji wa lupotopoto* udi pamo bwa musaka usūma’nka kusūma.+

14 Njibo ne bupeta bipyanwanga ku batata,

Ino mukaji mudyumuke utambanga kudi Yehova.+

15 Bukope buletanga tulo tukatampe,

Kadi muntu* wa mulēle ukekala na nzala.+

16 Yewa ulama mbila ulamanga būmi bwandi;*+

Yewa udi na kalengwa pa mashinda andi ukafwanga.+

17 Yewa ufwila mupēlulwe lusa wapujanga Yehova,+

Aye nandi ukamulubwilanga* pa byobya byalonga.+

18 Lemununa obe mwana pokukidi lukulupilo,+

Kadi kokalambikwa* lufu lwandi.+

19 Muntu wa kalobolobo ukafutanga mambo;

Shi usake kumupandija, ukamupandija kyaba ne kyaba.+

20 Ivwana madingi ne kwitabija bulemununi,+

Amba wikale wa tunangu mu mafuku a kumeso.+

21 Mpango i mingi mu mutyima wa muntu,

Inoko milangwe* ya Yehova yo ikanekenya.+

22 Kintu kyabilwa mu muntu i buswe bwandi bwa ndamatyidile;+

Kadi i kipite buya kwikala mulanda kupita’ko kwikala mbepai.

23 Kutyina Yehova kutwalanga ku būmi;+

Yewa umutyina ukakōkolokwa biyampe, kwampikwa kibi.+

24 Muzoze uvundanga kuboko kwandi mu kibakudi kya masobo,

Ino katompangapo nansha kujokeja’ko ku kyakanwa kyandi.+

25 Kupila wa kibengo,+ amba yewa wampikwa bwino ekale mukosoke,+

Kadi dingila muntu wa ñeni, amba avudije buyuki.+

26 Yewa ususula shandi ne kupanga inandi

I mwana ulenga bumvu ne kuzobejibwa.+

27 Wami mwana, shi uleke kwivwana bulemununi,

Ukasāsuka binenwa bya buyuki.

28 Kamoni wa bitupu uzawilanga boloke,+

Kadi kyakanwa kya mubi kiminanga bubi kubyu.+

29 Butyibi i bubīkilwe ba kibengo,+

Ne bikupilwa nabyo mwanda wa nyuma ya bivila.+