Yelemia

27 Ku ngalwilo kwa bulopwe bwa Yehoyakimi mwanā Yoshia, mulopwe wa Yuda, kino kinenwa kya Yehova kyaiya kudi Yelemia amba: 2 “Yehova wanombola namino amba, ‘Wilongele myonji ne mikabo ya lupungu, uvwale’yo mwishingo. 3 Kupwa wiitume kudi mulopwe wa Edoma,+ ne mulopwe wa Moabu,+ ne mulopwe wa bene Amone,+ ne mulopwe wa Tyila,+ ne mulopwe wa Shidona+ ku makasa a mikendi yaile ku Yelusalema kudi Zedekia mulopwe wa Yuda. 4 Wibasoñanye bakasapwile bamfumwabo amba:

“‘“Yehova wa bibumbo, Leza wa Isalela wanena namino amba; kasapwilei bamfumwenu namino amba, 5 ‘I ami walongele ntanda, ne bantu, ne banyema badi pa ntanda na bukomo bwami bukatampe ne na kuboko kwami kōlole; kadi nape’yo yewa onsaka.*+ 6 Pano napāna ano matanda onso mu makasa a mwingidi wami Nebukaneza+ mulopwe wa Babiloni; enka ne banyema ba ntanda namupe’bo amba bamwingidile. 7 Mizo yonso ikamwingidila aye ne wandi mwana ne wandi munkana enka ne bifika kitatyi kya yandi ntanda,+ kitatyi kikamumuna mizo mingi ne balopwe bakatampe bupika.’+

8 “‘“‘Shi muzo nansha bulopwe kampanda bubapele kwingidila Nebukaneza mulopwe wa Babiloni kadi bubapele kutweja nshingo mu lupungu lwa mulopwe wa Babiloni, nabya nkapa wao muzo mfuto na kipete, ne kipupo kya nzala,+ ne kipupo kya misongo,’* i Yehova unena, ‘enka ne byonebakubija na kuboko kwandi.’

9 “‘“‘O mwanda, kemwakivwanai bapolofeto benu, nansha bambuki, nansha balotyi ba bilotwa, nansha ba maleñanya, nansha ba majende, bemulombola’mba: “Kemukengidilapo mulopwe wa Babiloni.” 10 Ke-pantu banenanga bupolofeto bwa bubela komudi, mwanda wa mukaselelwe kulampe na yenu ntanda, nami nkemupalakanye kadi mukafwe.

11 “‘“‘Ino muzo utweja nshingo yao mu lupungu lwa mulopwe wa Babiloni ne kumwingidila, nkeuleka wikale nyeke* mu yao ntanda,’ i Yehova unena, ‘udime’yo ne kwikala’mo.’”’”

12 Kadi nesambile muswelo umo onka ne kudi Zedekia+ mulopwe wa Yuda, amba: “Twejai mashingo enu mu lupungu lwa mulopwe wa Babiloni mumwingidile aye ne bantu bandi, nabya mukashala bōmi.+ 13 I kika le kyomukafwila abe ne bantu bobe ku kipete,+ ne ku kipupo kya nzala+ ne ku kipupo kya misongo,+ monka mwanenena Yehova pangala pa muzo keukengidilapo mulopwe wa Babiloni? 14 Kemwakivwanai binenwa bya bapolofeto bemulombola’mba, ‘Kemukengidilapo mulopwe wa Babiloni,’+ mwanda banenanga bupolofeto bwa bubela komudi.+

15 “‘Mwanda ami nkibatuminepo,’ i Yehova unena, ‘ino banenanga bupolofeto bwa bubela mu dijina dyami, mwanda wa nkemupalakanye kadi mukafwe, banwe ne bapolofeto banena bupolofeto komudi.’”+

16 Kadi nanenene babitobo ne bano bantu bonso amba: “Yehova wanena namino amba, ‘Kemwakivwanai binenwa bya bapolofeto benu banena bupolofeto komudi amba: “Talai! Panopano ponka bipungwa bya mu njibo ya Yehova bikajokejibwa kutamba ku Babiloni!”+ mwanda banena bupolofeto bwa bubela komudi.+ 17 Kemwakibevwanai. Ingidilai mulopwe wa Babiloni amba mukashale bōmi.+ I kika le kikekadila kino kibundi ke masala? 18 Ino shi abo i bapolofeto kadi shi kinenwa kya Yehova kidi nabo, nankyo bazenze Yehova wa bibumbo amba bipungwa bishele mu njibo ya Yehova, ne mu njibo* ya mulopwe wa Yuda, ne mu Yelusalema bileke kuselelwa ku Babiloni.’

19 “Mwanda Yehova wa bibumbo wanena namino pa mwanda wa bikomo,+ ne Dijiba,*+ ne matempa,+ ne bipungwa bishele mu kino kibundi, 20 byobya kebyaselelwepo na Nebukaneza mulopwe wa Babiloni kitatyi kyaaselele ku Yelusalema Yekonia mwanā Yehoyakimi, mulopwe wa Yuda, bu musungi waenda nandi ku Babiloni, pamo ne ba bulēme bonso ba Yuda ne ba Yelusalema;+ 21 bine, Yehova wa bibumbo, Leza wa Isalela, wanena namino pa mwanda wa bipungwa bishele ku njibo ya Yehova, ne mu njibo* ya mulopwe wa Yuda, ne mu Yelusalema amba: 22 ‘“Bikaselelwa ku Babiloni,+ kadi bikekala’ko kufika’nka ne difuku dyonkebita mutyima,” i Yehova unena. “Ebiya nkebijokeja ne kwibyalwija ku kino kifuko.”’”+