Ezekyele

36 “Ino abe, a mwanā muntu, nena bupolofeto pa mwanda wa ngulu ya Isalela amba, ‘A ngulu ya Isalela, tejai kinenwa kya Yehova. 2 Mfumu Mwinē Lupusa Lonso Yehova wanena namino amba: “Walwana wemunena’mba, ‘Ha ha! Enka ne mitenta ya kala mine ibaikala ke yetu!’”’+

3 “O mwanda nena bupolofeto amba, ‘Mfumu Mwinē Lupusa Lonso Yehova wanena namino amba: “Byobemusala ne kwimutamba ku mitamba yonso, amba mwikale bu kintu kya boba bapandile* mu mizo, ne kadi bantu byobemunena’nka kwimunena ne kwimuvubakenya myanda,+ 4 o mwanda, a ngulu ya Isalela, ivwanai kinenwa kya Mfumu Mwinē Lupusa Lonso Yehova! Mfumu Mwinē Lupusa Lonso Yehova wanena ngulu ne mikuna, tuminonga ne misanza, masala asadilwe,+ ne bibundi bishibwe byatūtyilwe ne byafutulwilwe na boba bapandile ku mizo ibajokolokele;+ 5 ku bino byonso, Mfumu Mwinē Lupusa Lonso Yehova wanena namino amba: ‘Nkanena na mudilo wa bupyasakane bwami+ boba bapandile ku mizo ne Edoma ense, boba betēlela na nsangaji mikatampe ne kafutululo kakatampe*+ amba ntanda yami i yabo, mwanda wa kuyata madyo ayo ne kwiitūta.’”’+

6 “O mwanda nena bupolofeto pa mwanda wa ntanda ya Isalela, kadi nena ngulu ne mikuna, tuminonga ne misanza’mba, ‘Mfumu Mwinē Lupusa Lonso Yehova wanena namino amba: “Talai! Nkanena na bupyasakane bwami ne bukalabale bwami, mwanda mubafwijibwa bumvu na mizo.”’+

7 “O mwanda Mfumu Mwinē Lupusa Lonso Yehova wanena namino amba: “Ami mwine natulula kuboko kwami natyipe amba mizo imujokolokele ikafwa bumvu ayo mine.+ 8 Ino banwe, a ngulu ya Isalela, mukalupula misambo ne kupa bipa bya bantu bami bene Isalela,+ mwanda basa kujoka panopano ponka. 9 Mwanda ami ngidi nenu, nkalamukila komudi, kadi mukadimwa ne kukunwa nkunwa. 10 Nkavudija bantu benu—njibo yonso ya Isalela, ayo yonso—kadi bibundi bikekalwa,+ masala nao akōbakululwa.+ 11 Bine, nkavudija bantu benu ne bimunanwa byenu;+ bakavula ne kubutula. Nkekadija bantu momudi enka na mobadi bekadile’mo pa kala,+ kadi nkemwikadija biyampe kupita pa kala;+ penepo mukayuka’mba ami ne Yehova.+ 12 Nkalengeja bantu—bantu bami bene Isalela—banange momudi, kadi bakemuyata kemudi babo.+ Mukekala bupyani bwabo, kadi kemukebepailapo monka bana.’”+

13 “Mfumu Mwinē Lupusa Lonso Yehova wanena namino amba: ‘Byobemunena’mba, “Abe wi ntanda isasamuna bantu ne kwipaila mizo yobe bana,”’ 14 ‘o mwanda, kukasasamunapo monka bantu nansha kwipaila mizo yobe bana,’ i Mfumu Mwinē Lupusa Lonso Yehova unena. 15 ‘Nkikakutukijapo monka mutonko na mizo nansha kulengeja bantu bakukolomone,+ kadi kukakukajapo monka mizo yobe,’ i Mfumu Mwinē Lupusa Lonso Yehova unena.”

16 Kadi kinenwa kya Yehova kyaiya monka kondi amba: 17 “Mwanā muntu, njibo ya Isalela poyadi ishikete mu ntanda yabo, beisubije na mashinda abo ne bilongwa byabo.+ Kondi mashinda abo adi pamo bwa disubi dya ku mweji.+ 18 Penepo napungulula bukalabale bwami pobadi pa mwanda wa mashi obamwangile pa ntanda’ya+ ne pa mwanda wa kusubija kobasubije ntanda na bilezaleza byabo bya mukenye.*+ 19 Ebiya nebapalakenya mu mizo ne kwibakusankanya mu matanda.+ Nebatyibila mambo mwendele dishinda dyabo ne bilongwa byabo. 20 Ino pobaile ku ino mizo, bantu bakobakenye dijina dyami dijila+ kebebanena’mba, ‘Bano’ba i bantu ba Yehova, ino batalwilwe mu yandi ntanda.’ 21 Penepo nkata mutyima dijina dyami dijila, dyobakobakenye kudi njibo ya Isalela mu mizo kobaendele.”+

22 “O mwanda sapwila njibo ya Isalela amba, ‘Mfumu Mwinē Lupusa Lonso Yehova wanena namino amba: “A njibo ya Isalela, ami nkiloñangapo bintu pa mwanda wenu, ino i pa mwanda wa dijina dyami dijila, dyomwakobakenye mu mizo komwaendele.”’+ 23 ‘Na bubine nkapandula dijina dyami dikatampe,+ dyomwakobakenye mu mizo, dyomwakobakenye mu bukata mwabo; penepo mizo ikayuka’mba ami ne Yehova,’+ i Mfumu Mwinē Lupusa Lonso Yehova unena, ‘ponkapandulwa mu bukata mwenu ku meso abo. 24 Nkemusela ku mizo ne kwimujokeja kutamba ku matanda onso ne kwimutweja mu yenu ntanda.+ 25 Nkemukusa mema atōka, nenu mukatōka;+ nkemutōkeja ku disubi+ dyenu dyonso ne ku bilezaleza byenu byonso bya mukenye.+ 26 Nkemupa mutyima mupya+ ne kutūla munda mwenu mushipiditu mupya.+ Nkatalula mutyima wa dibwe+ mu umbidi wenu ne kwimupa mutyima wa mwita.* 27 Nkatūla mushipiditu wami munda mwenu, nkemunangija mu misoñanya yami,+ kadi mukalama ne kulonda mutyibilo wami wa mambo. 28 Penepo mukekala mu ntanda yonapele bakulutuba benu, kadi mukekalanga bantu bami, nami nkekalanga Leza wenu.’+

29 “‘Nkemupandija ku disubi dyenu dyonso kadi nketa miseke ne kwiivudija, nkikemuletelapo kipupo kya nzala.+ 30 Nkavudija bipa bya mityi ne bipa bya mu ntanda, amba muleke kuzobejibwa monka mu mizo pa mwanda wa kipupo kya nzala.+ 31 Penepo mukavuluka mashinda enu mabi ne bilongwa byenu bibi, kadi mukekwatyilwa mukenye pa mwanda wa mambo enu ne bilongwa byenu bya munyanji.+ 32 Ino yukai kino amba: “Ami nkiloñangapo kino’ki pa mwanda wenu,’+ i Mfumu Mwinē Lupusa Lonso Yehova unena. ‘Ino a njibo ya Isalela, ivwanai bumvu ne kwityepelwa pa mwanda wa mashinda enu.’

33 “Mfumu Mwinē Lupusa Lonso Yehova wanena namino amba: ‘Difuku dyonkemutōkeja ku mambo enu onso, nkekadija bantu+ mu bibundi ne kūbakulwija masala.+ 34 Ntanda misalwe yadi ilēle mu masala mwanda wa muntu ense upita’mo eimone, ikadimibwa. 35 Kadi bantu bakanena’mba: “Ntanda misalwe ibaikala pamo bwa budimi bwa Edena,+ kadi bibundi byadi mu masala, bisalwe kadi bipone pano bibakomejibwa ne kwikalwa.”+ 36 Penepo mizo imujokolokele ishele’ko ikayuka’mba ami mwine, Yehova, naubaka kyokya kyadi kipone, kadi nakune kyokya kyadi kisalwe. Ami mwine, Yehova, nesambe’kyo, kadi nalonga’kyo.’+

37 “Mfumu Mwinē Lupusa Lonso Yehova wanena namino amba: ‘Kadi nkaleka njibo ya Isalela inombe nebalongele kino’ki: Nkavudija bantu babo pamo bwa luombe. 38 Bibundi byadi bisalwe bikayula luombe lwa bantu+ pamo bwa luombe lwa bantu bajila, pamo bwa luombe lwa Yelusalema* mu kitatyi kya masobo+ andi; penepo bakayuka’mba ami ne Yehova.’”