Bilongwa bya Mafuku Umbajinji

28 Kupwa Davida waungwija bamfumu bonso ba Isalela ku Yelusalema: bamfumu ba bisaka, bakata ba bibumbo+ bengidila mulopwe, bakata ba tununu ne bakata ba tutwa,+ bakata bonso batala bintu byonso ne bimunanwa bya mulopwe+ ne bya bandi bana,+ pamo ne bengidi ba bulēme ba mu kipango ne bana-balume bonso bakomokomo kadi bankanka.+ 2 Penepo Mulopwe Davida waimana na maulu andi kanena’mba:

“Ntejei, banabetu ne bantu bami. Mutyima wami wadi usaka kūbaka njibo ikale bu kifuko kya kukōkolokwa’mo sanduku wa kipwano kya Yehova ne bu kitūlo kya maulu a Leza wetu,+ kadi nateakenye bya kūbaka nabyo.+ 3 Ino Leza wa bine wansapwidile amba, ‘Kusapo kūbaka njibo ya dijina dyami,+ mwanda wi muntu wa mavita, kadi wi mumwange mashi.’+ 4 Ino Yehova Leza wa Isalela wantongele mu njibo yonso ya tata amba ngikale nyeke mulopwe pa Isalela,+ mwanda watongele Yuda ke mutangidiji,+ mu njibo ya Yuda namo watonga’mo njibo ya tata,+ mu bana ba tata namo, ami ye wawaitabije, amba ambikike bu mulopwe pa Isalela yense.+ 5 Kadi mu bami bana bonso—mwanda Yehova i mumpe bana bavule+—watongele’mo wami mwana Solomone+ amba ashikate pa lupona lwa bulopwe bwa Yehova pa Isalela.+

6 “Wanombwele amba, ‘Obe mwana Solomone ye ukōbaka njibo yami ne bipango byami, mwanda namutongele ke wami mwana kadi nkekalanga shandi.+ 7 Nkakomeja pototo bulopwe bwandi nyeke+ shi walama na kusumininwa mbila yami ne mutyibilo wami wa mambo+ mwalamina’byo pano.’ 8 Shi ke pano nanena ku meso a Isalela ense, kipwilo kya Yehova, ne mu matwi a Leza wetu amba: Lamai ndaminine ne kukimba mbila yonso ya Yehova Leza wenu, amba muyate ntanda miyampe+ ke yenu ne kupyanika’yo benu bana bakāya’ko bu bupyani bwa lonso.

9 “Abe nobe, wami mwana Solomone, yuka Leza wa shobe ne kumwingidila na mutyima onso mutuntulu*+ ne na muya* musangale,* mwanda Yehova usātanga mityima yonso,+ kadi ujingululanga kulēmenene milangwe yonso.+ Shi umukimbe, aye ukesokwela kodi,+ ino shi umuleke, nandi ukakwelelela nyeke.+ 10 Talanga pano, Yehova wakutonge ūbake njibo ya kwikala bu kipandulwe. Kankamana kadi enda kengile.”

11 Kupwa Davida wapa wandi mwana Solomone bupunga+ bwa mwa kulongela kibidi kya pa kibelo+ ne mobo akyo, byumba bya bibīko byakyo, byumba bya pangala byakyo, byumba bya munda byakyo, ne njibo ya mpūto ya kupwanija.*+ 12 Wamupele bupunga bwa mwa kulongela bintu byonso byaalombwelwe ku bukomo bwa mushipiditu* bya bipango+ bya njibo ya Yehova, bya byumba byonso bya kudīla’mo biijokolokele, bya bibīko bya byabulēme bya njibo ya Leza wa bine, ne bya bibīko bya byabulēme bya bintu bipandulwe;*+ 13 kadi ne bya bibumbo bya babitobo+ ne bya bene Levi, ne bya twaji tonso twa ku mingilo ya njibo ya Yehova, ne bya bipungwa byonso bya mingilo ya ku njibo ya Yehova; 14 kadi ne bya bulēmi bwa olo, olo ya bipungwa byonso bya mingilo palapala, bulēmi bwa bipungwa byonso bya ndalama, ne bwa bipungwa byonso bya mingilo palapala; 15 kadi ne bulēmi bwa bitūlwa-binanu+ bya olo ne binanu byabyo bya olo, bulēmi bwa bitūlwa-binanu palapala ne binanu byabyo, ne bulēmi bwa bitūlwa-binanu bya ndalama, bwa kitūlwa-binanu kimokimo ne binanu byakyo mungya mwingidijijo wakyo; 16 kadi ne bulēmi bwa olo ya mameza a mikate mitentakanye,*+ bwa meza ne meza, ne bwa ndalama ya mameza a ndalama, 17 bwa nkanya, ngeso, mityibi ya olo yonkayonka, ne bulēmi bwa ngeso mityemitye ya olo,+ bwa lweso ne lweso lutyelutye, ne bulēmi bwa ngeso mityemitye ya ndalama, bwa lweso ne lweso lutyelutye. 18 Kadi waleta ne bulēmi bwa olo mikundulwe ya kisōkelo kya ensense+ ne ya kyelekejo kya dikalo,+ ko kunena’mba bakelubi+ ba olo badi babādile mapapa ne kupūta sanduku wa kipwano kya Yehova. 19 Davida wanena’mba: “Kuboko kwa Yehova kwadi pondi, kadi wampele bujinguludi bwa kulemba+ myanda yonso kamo ne kamo ya buno bupunga.”+

20 Ebiya Davida wanena wandi mwana Solomone amba: “Kankamana, wikomeje kadi enda kengile. Kokikwatwa moyo nansha kutuyuka kwine, mwanda Yehova Leza, Leza wami, udi nobe.+ Kakakulekapo nansha kukwela kwine,+ ino ukekala nobe kufika ne bikapwa twaji tonso twa mingilo ya njibo ya Yehova. 21 Kadi bibumbo bya babitobo+ ne bya bene Levi+ ba kwingila mingilo yonso ya njibo ya Leza wa bine abi kebyo. Udi na bengidi ba mutyima uswele, ba bwino ba kwingila mingilo ya miswelo yo-yonso,+ ne bamfumu+ ne bantu bonso bakalonda byonso byokebalombola.”