Divilu

32 Mu kine kitatyi’kya, bantu bamwene amba Mosesa waije ku lūlu+ kutūka mpika. Penepo bantu baungwila Alone kebamunena’mba: “Taluka, witulongele leza wa kwitutangidila kumeso,+ mwanda ketuyukilepo kyafikila uno Mosesa, mwine wetulupwile mu ntanda ya Edipito.” 2 Ponkapo Alone webanena’mba: “Vūlai nzenze ya olo+ ya ku matwi a benu bakaji, ne ku matwi a benu bana bana-balume ne bana-bakaji mundetele’yo.” 3 Ebiya bantu bonso baanza kuvūla nzenze ya olo yadi ku matwi abo, kebaletela’yo Alone. 4 Nandi watambula kobadi olo, weilonga na bilé, wapunga’yo nkishi* wa kyana kya ñombe.+ Kebanena’mba: “A Isalela, uno’u ye Leza obe, mwine wakulupwile mu ntanda ya Edipito.”+

5 Alone pa kumona nabya, waubaka kisōkelo kumeso kwakyo. Penepo Alone waela lubila’mba: “Kesha kusa kwikala masobo a Yehova.” 6 Ebiya dya kesha babūka lubanga bwē kebalambula byamulambu bisōkwe ne kuleta bitapwa bya kipwano. Kupwa bantu bashikata kudya ne kutoma. Penepo baimana kebesangaja.+

7 Ebiya Yehova wanena Mosesa amba: “Enda, tūka, mwanda bantu bobe bowalupwile mu ntanda ya Edipito abalonga bya kiboja.+ 8 Abasāsuka bukidi bonka mu dishinda dyonebalombwele kwenda’mo.+ Abelongela nkishi* wa kyana kya ñombe, kebevukwila’ko ne kwikitapila bitapwa koku banena’mba: ‘A Isalela, uno’u ye Leza obe, mwine wakulupwile mu ntanda ya Edipito.’” 9 Yehova wanena monka Mosesa amba: “Namone amba bano bantu badi na mitwe myūmu.*+ 10 Pano nanshi ndeke bidi, nsa kwibakuba mu bulobo bwami budyendyemuka, nkwalamune abewa kodi muzo mukatampe pa kyabo kyaba.”+

11 Penepo Mosesa wazenza* Yehova Leza wandi+ amba: “A Yehova, i kika kyolobela bantu bobe bulobo budyendyemuka pa kupwa kwibalupula mu ntanda ya Edipito na bukomo bukatampe ne na kuboko kwa bukomo?+ 12 Mwanda waka bene Edipito bakanene amba, ‘Wadi na milangwe mibi paebalupwile. Wadi usaka kukebepaila mu ngulu ne kwibakuba pano pa ntanda’?+ Leka bulobo bobe budyendyemuka, shinta milangwe pa* butyibi bobe bwa kuleta kino kyamalwa pa bantu bobe. 13 Vuluka bengidi bobe, ba Abalahama, Izake, ne Isalela, bowatyipile mutyipo abe mwine amba: ‘Nkavudijanga lutundu* lobe pamo bwa ñenyenye ya mūlu,+ kadi nkapa lutundu* lobe ino ntanda yonso yonatonga’i, amba beiyate ke kintu kyabo kya lonso.’”+

14 Penepa Yehova washilula kushinta milangwe* pa kyamalwa kyaanenene kuleta pa bantu bandi.+

15 Ebiya Mosesa waalamuka, katūka ku lūlu ne bipāpo bibidi bya Bukamoni+ mu kuboko kwandi.+ Bipāpo’bya byadi byandike makila onso abidi; byadi bilembwe momu ne momu. 16 Bipāpo’bya wadi mwingilo wa Leza, kadi kilembwa’kya kyadi kilembwa kya Leza kyandike pa bipāpo.+ 17 Yoshua pa kwivwana lunwa lwa bantu badi batūta kyungwe, walombola Mosesa amba: “Mu nkambi mudi mawi a bulwi.” 18 Ino Mosesa watentulula’mba:

19 Mosesa pa kufwena kubwipi na nkambi ne pa kumona kyana kya ñombe+ ne maja, bulobo bwandi bwaaka, waela bipāpo byadi mu maboko andi, webivingakanya munshi mwa lūlu.+ 20 Wayata kyana kya ñombe kyobalongele’kya wekisōka mu mudilo, wekitwa ke bukula;+ kupwa waela’bo mu mema, katomeja’o bene Isalela.+ 21 Penepo Mosesa wanena Alone amba: “Le i bika byakulonga bano bantu kowibaletela bubi bukatampe namino?” 22 Alone walondolola’mba: “A mfumwami, kokaloba. Uyukile biyampe amba mutyima wa bano bantu ulēmenene ku kulonga bibi.+ 23 Baunenene amba, ‘Witulongele leza wa kwitutangidila kumeso, mwanda ketuyukilepo kyafikila uno Mosesa, mwine wetulupwile mu ntanda ya Edipito.’+ 24 Nami nebanena’mba, ‘Yewa ense udi na olo avūle’yo ampe’yo.’ Penepa neyela mu mudilo, kubatambe kino kyana kya ñombe.”

25 Mosesa wamona’mba bantu badi balekwe bitupu, mwanda Alone webalekele bitupu, baikala ke kintu kya kuzobejibwa ku meso a bakinkwa nabo. 26 Penepo Mosesa waimana mu kibelo kya nkambi kanena’mba: “I ani udi ku mutamba wa Yehova? Āye kondi!”+ Ponkapo bene Levi bonso bamubumba. 27 Ebiya webanena’mba: “Yehova Leza wa Isalela wanena namino amba, ‘Muntu ne muntu mu bukata mwenu ufwaninwe kuningisha kipete kyandi, apite mu nkambi yonso ku kibelo ne kibelo, epaye mwanabo, mulondakani nandi, ne mulunda nandi wa pa mutyima.’”+ 28 Bene Levi balonga byanenene Mosesa. Bana-balume kubwipi kwa 3 000 baipaibwa mu dine difuku’dya. 29 Penepo Mosesa wanena’mba: “Mwitūlei pa bula* mwanda wa Yehova dyalelo, ke-pantu muntu ne muntu mu bukata mwenu watambanga wandi mwana ne mwanabo;+ dyalelo usa kwimupa dyese.”+

30 Dya kesha, Mosesa wanena bantu amba: “Mubalonga bubi bukatampe mpata, pano kenkanda kudi Yehova mone shi nkokeja kwimunenena pa mwanda wa bubi bwenu.”+ 31 Ebiya Mosesa wajokela kudi Yehova kanena’mba: “Bano bantu abalonga bubi bukatampe! Abepungila leza wa olo!+ 32 Ino pano shi uswile, lekela bubi bwabo;+ shi bitupu, nankyo mbule mu mukanda obe olembele.”+ 33 Ino Yehova watentulula Mosesa amba: “Yewa ense umpile mambo, ye onkabula mu mukanda wami. 34 Pano enda, katwale bantu ku kifuko kyonakulombwele. Tala! Mwikeulu wami ukakutangidila kumeso,+ kadi mu difuku dyonkemulomba mwishintulwile, nkebapanga mfuto pa mwanda wa bubi bwabo.” 35 Penepo Yehova washilula kuponeja kipupo pa bantu mwanda wa kyana kya ñombe kyobalongele, kyokya kyalongele Alone.