Divilu

9 Penepo Yehova wanena Mosesa amba: “Katwele kudi Felo umulombole amba, ‘Yehova Leza wa Bahebelu wanena namino amba: “Leka bantu bami bende bakañingidile.+ 2 Ino shi upele kwibaleka bende, ne ukibakwete, 3 tala’po! kuboko kwa Yehova+ kukāya pa bimunanwa byobe mu ntanda. Pa tubalwe, bampunda, bangamedia, bañombe, ne mikōko, kukekala kipupo kya kyonakanya.+ 4 Bine Yehova ukasansanyanga pa bukata bwa bimunanwa bya Isalela ne bimunanwa bya Edipito, kadi i kutupu kintu kya bene Isalela kikafwa.”’”+ 5 Ebiya, Yehova watunga kitatyi, kanena’mba: “Kesha Yehova ukalonga’kyo mu ino ntanda.”

6 Yehova walongele’kyo dya kesha, kadi bimunanwa bya miswelo yonso bya Edipito byaanza kufwa,+ ino ku bya Isalela kekwafwilepo nansha kimo kine. 7 Felo pa kwipangula, tala’po! i kutupu kimunanwa kya Isalela nansha kimo kyafwile. Ino, mutyima wa Felo waumina’ko, kalekelepo bantu bende.+

8 Penepo Yehova wanena Mosesa ne Alone amba: “Yujai makasa enu onso abidi mulé wa mu fūlu, kadi Mosesa ufwaninwe kwela’o mu luvula ku meso a Felo. 9 Nao ukalamuka ke luvumbi pa ntanda yonso ya Edipito, kadi lukalamuka ke bipote bitutumuka pa muntu ne nyema mu ntanda yonso ya Edipito.”

10 Nabo bayata mulé wa mu fūlu baimana ku meso a Felo, Mosesa waela’o mu luvula, waalamuka ke bipote bitutumuka byamena muntu ne nyema. 11 Babitobo ba maleñanya kebabwenyepo kwimana ku meso a Mosesa pa mwanda wa bipote, mwanda byamenene babitobo ba maleñanya ne bene Edipito bonso.+ 12 Ino Yehova waleka mutyima wa Felo ūme, kadi kebevwenepo, monka mwanenene Yehova kudi Mosesa.+

13 Penepo Yehova wanena Mosesa amba: “Būka lubanga bwē ukemane ku meso a Felo, ukamulombole amba, ‘Yehova Leza wa Bahebelu wanena namino amba: “Leka bantu bami bende bakañingidile. 14 Mwanda pano nsa kutuma bipupo byami bikupile obe mutyima, ne bengidi bobe, ne bantu bobe, mwanda wa uyuke amba i kutupu muntu udi bwa ami pa ntanda ponsololo.+ 15 Mwanda panenwa pano, nadi wa kōlola kuboko kwami nakukupila abe ne bantu bobe na kipupo kya kyonakanya, longa kodi mujimine* pa ntanda. 16 Ino i pa mwanda wa kino’ki kyonkulekele’ko: kukulombola bukomo bwami ne mwanda wa dijina dyami disapulwe pa ntanda ponso.+ 17 Le ukidi na kibengo ne pano ku bantu bami ne kwibaleka bende mpika? 18 Kesha dya pa kino kitatyi’ki, nsa kunokeja mvula mukatampe wa mabwe, mvula umo kamwekele nansha dimo mu Edipito tamba difuku dyawashimikilwe kufika ne dyalelo. 19 Shi ke pano, tumanya bakatweje bimunanwa byobe byonso ne bintu byobe byonso bidi mu ntanda. Muntu ne nyema ense ukajikilwa mu ntanda wampikwa kutwejibwa mu njibo ukafwa pakamunokela mvula.”’”

20 Mwingidi wa Felo ense waakaminwe kinenwa kya Yehova, wakatwejeje bukidi bengidi bandi ne bimunanwa byandi mu mobo, 21 ino yewa katelepo mutyima ku kinenwa kya Yehova walekele bengidi bandi ne bimunanwa byandi mu ntanda.

22 Ebiya Yehova wanena Mosesa amba: “Olola kuboko kobe mūlu, amba mvula wa mabwe anokele pa ntanda yonso ya Edipito,+ pa muntu ne nyema ne munamuna yonso ya mu madimi a mu ntanda ya Edipito.”+ 23 Penepa Mosesa waolola mukombo wandi mūlu, Yehova watuma mikungulo ne mvula wa mabwe, mudilo* wapona pa ntanda, Yehova kanokeja’nka kunokeja mvula wa mabwe mu ntanda ya Edipito. 24 Kwadi mvula wa mabwe, kadi kwadi mudilo udyendyemuka umbukata mwa mvula wa mabwe. Wadi mukatampe mpata; kwadi kekwaikele mvula bwa uno mu ntanda’ya kashā Edipito wikala bu muzo.+ 25 Mvula wa mabwe’wa wakupila byonso mu madimi a mu ntanda yonso ya Edipito, kushilwila ku muntu kufula ne ku nyema mwine, kadi wakupila ne munamuna yonso watyumuna ne mityi yonso ya mu ntanda.+ 26 Enka mu ntanda ya Ngoshena, mwadi bene Isalela, kemwadipo mvula wa mabwe.+

27 Ebiya Felo waityija ba Mosesa ne Alone kaebanena’mba: “Pano’ko’ko napi mambo. Yehova i moloke, amiwa ne bantu bami twi balube. 28 Zenzai Yehova amba mikungulo ne mvula wa mabwe wa Leza bipwe. Penepo nsa kwitabija kwimuleka mwende, kemukashikatapo kadi monka.” 29 Ebiya Mosesa wamunena’mba: “Ponsa kutamba’tu mu kibundi, nsa kōlola maboko ami ku meso a Yehova. Mikungulo ikapwa ne mvula wa mabwe mwine kakendelelapo monka, mwanda wa uyuke amba ntanda i ya Yehova.+ 30 Ino abe ne bengidi bobe, ndyukile kala’mba nansha nankyo, kemukatyinapo Yehova Leza.”

31 Ino bukonge ne mebele a buluba byaoneka, mwanda mebele a buluba adi ke asa kukoma kadi bukonge bwadi ke bwele maluba. 32 Ino ñano ne nkunki keyaonekelepo, mwanda byadi bikunanwa bya mfulo.* 33 Ebiya Mosesa watamba kudi Felo panja pa kibundi waolola maboko andi ku meso a Yehova, kadi mikungulo ne mvula wa mabwe byapwa ne mvula mwine waleka’byo kupungulukila panshi.+ 34 Felo pa kumona’mba mvula, mvula wa mabwe, ne mikungulo bibapu, wapya mambo monka ne kūmija mutyima wandi,+ aye ne bengidi bandi kumo. 35 Kadi mutyima wa Felo waumina’ko, kalekelepo bene Isalela bende, monka mwanenene Yehova kupityila kudi Mosesa.+