Batyibi

6 Ino bene Isalela balonga monka bibi ku meso a Yehova,+ o mwanda Yehova webapēne mu kuboko kwa Midyana mu myaka isamba-ibidi.+ 2 Makasa a Midyana atādila Isalela.+ Pa mwanda wa Midyana, bene Isalela belongēle bifuko bya kufyama’mo* mu ngulu, mu mitá, ne mu bifuko bikomo kufika’ko.+ 3 Shi Isalela wakune nkunwa, Midyana ne Amaleke+ ne Bantu ba Kutunduka+ badi bāya kwibatamba bulwi. 4 Badi batūla nkambi mwanda wa kwibalwa ne konakanya bintu bya ntanda’ya kufika ne ku Ngaza, kebadipo bashila Isalela kakudya nansha kamo nansha mukōko nansha ñombe nansha mpunda mwine.+ 5 Mwanda badi bakanda na bimunanwa byabo ne mapema, bivule pamo’nka bwa njie,+ ne abo ne bangamedia babo kebadipo babalwa,+ badi bāya mu ntanda’ya mwanda wa kwiyonakanya. 6 Ponkapo Isalela walandapala bininge pa mwanda wa Midyana; ebiya bene Isalela baabija Yehova.+

7 Bene Isalela pa kwabija Yehova pa mwanda wa Midyana,+ 8 Yehova watumina bene Isalela mupolofeto webalombwele amba: “Yehova Leza wa Isalela wanena namino amba, ‘Nemutambije mu Edipito, ne kwimulupula mu njibo ya bupika.+ 9 Ebiya nemukūla mu makasa a Edipito ne ku bantu bonso badi bemumwesha malwa, nebapanga ku meso enu nemupa ne ntanda yabo.+ 10 Kadi nemulombwele amba: “Ami ne Yehova Leza wenu.+ Kemufwaninwepo kutyina baleza ba bene Amole ba mu ntanda yomushikete’mo’yo.+ Ino kemwankōkelepo.’”*+

11 Mwenda mafuku mwikeulu wa Yehova waiya,+ washikata munshi mwa mutyi mukatampe wadi mu Ofela, wadi wa Yoashe mwine Abi-Ezele.+ Wandi mwana Ngideoni+ wadi upūla ñano mu kyengelo mwanda wa kufya’yo Midyana. 12 Mwikeulu wa Yehova wamumwekela kamunena’mba: “Yehova udi nobe,+ abe wa bulwi mukomokomo.” 13 Penepo Ngideoni wamutentulula’mba: “Mfwile’ko’po bidi lusa, a mfumwami, ino shi Yehova udi netu mwanda waka bino byonso bibetufikila?+ Lelo bilongwa byandi byonso bya kutendelwa bidi kwepi, byetusekunwinine batata’mba,+ ‘Mwene Yehova wetutambije mu Edipito?’+ Pano Yehova wetwela+ ne kwitupāna mu kuboko kwa Midyana.” 14 Yehova wamutadidila kamunena’mba: “Enda na bukomo bodi nabo’bo, usa kupandija Isalela mu makasa a Midyana.+ Mwene i ami wakutuma?” 15 Ngideoni wamulondolola’mba: “Mfwile’ko’po bidi lusa, a Yehova. Le nsa kukūla Isalela namani? Tala! Kisaka* kyetu i kityetye bininge mu bisaka bya Manase, kadi ami nami ne mutabuke butyetye mu njibo ya tata.” 16 Ino Yehova wamunena’mba: “Mwanda nsa kwikala nobe,+ usa kunekenya Midyana pamo’nka bwa muntu umo.”

17 Kupwa Ngideoni wamunena’mba: “Shi bine ubantōkelwa mutyima, nombole kiyukeno kilombola’mba i abe wisamba nami. 18 Nakwisāshila kokataluka pano’nka ne byonjoka na kyabuntu kyami nekitūle ku meso obe.”+ Nandi wanena’mba: “Nsa kushala pano’nka ne byojoka.” 19 Ebiya Ngideoni watwela, watēka mbuji mwana, wasōka ne mukate wampikwa kiyujo wa efa* umo wa bukula.+ Watūla mwita mu kilala ne busuku mu kisuku kya kutēka’mo; kupwa wamuletela’byo ne kumupēla’byo munshi mwa mutyi mukatampe.

20 Ponkapo mwikeulu wa Leza wa bine wamunena’mba: “Sela mwita ne mukate wampikwa kiyujo wibitūle popa pa dibwe dikatampe upungulule ne busuku.” Nandi walongela monka. 21 Kupwa mwikeulu wa Yehova waolola nsongo ya mukombo wadi mu kuboko kwandi, watengeja’yo ku mwita ne ku mukate wampikwa kiyujo, penepa mudilo waaka lubimbi pa dibwe waloteja mwita ne mukate wampikwa kiyujo’wa.+ Ponkapo mwikeulu wa Yehova wamujimina mu meso. 22 Penepa Ngideoni wajingulula’mba wadi nanshi mwikeulu+ wa Yehova.

Ebiya Ngideoni wanena’mba: “Malwa ami, abe Mfumu Mwinē Lupusa Lonso Yehova, mwanda namone mwikeulu wa Yehova mpala na mpala!”+ 23 Ino Yehova wamunena’mba: “Ndoe ikale nobe. Kokikwatwa moyo,+ kusapo kufwa.” 24 Ebiya Ngideoni waubakila Yehova kisōkelo kwine’kwa, kikitwanga bu Yehova-Shalome*+ kufika ne dyalelo. Kikidi mu Ofela wa bene Abi-Ezele.

25 Mu bwine bufuku’bo Yehova wamunena’mba: “Sela ñombe mwana wa shobe, ñombe mwana wa bubidi wa myaka isamba-ibidi, kadi kapomone kisōkelo kya Bāla kya shobe, ne kutyumuna kipanda kikola* kidi kubwipi nakyo.+ 26 Shi ubapu kushimikila Yehova Leza obe kisōkelo na mukuku wa mabwe pangala pa kino kifuko kikomejibwe, sela ñombe mwana wa bubidi umulambule bu kyamulambu kisōkwe pa bibanze bya nkuni bya kipanda kikola* kyosa kutyumuna’kya.” 27 Ebiya Ngideoni wasela mu bengidi bandi bana-balume dikumi, kadi walongela monka mwamulombwedile Yehova. Ino watyinine bininge njibo ya shandi ne bantu ba mu kibundi, waleka kulonga’byo mu dyuba, ino walonga’byo bufuku.

28 Bana-balume ba mu kibundi babūka kesha lubanga futwi, bamona’mba kisōkelo kya Bāla i kipomonwe ne kipanda kikola* kyadi kubwipi nakyo i kityumunwe ne ñombe mwana wa bubidi nandi i mulambulwe pa kisōkelo kyaubakilwe. 29 Kebeipangula abo bene na bene amba: “ Le i ani walonga namino?” Kupwa kwipangula, banena’mba: “I Ngideoni mwanā Yoashe walonga namino.” 30 Penepa bantu ba mu kibundi kebanena Yoashe amba: “Tambija obe mwana afwe, mwanda wapomona kisōkelo kya Bāla ne kutyumuna kipanda kikola* kilondakene nakyo.” 31 Kupwa Yoashe+ wanena bonso badi bamwimanine midindi ibidi amba: “Le banwe bo ba kulwila Bāla? Le banwe bo ba kumupandija? Ense umulwila ufwaninwe kwipaibwa lubanga luno’lu.+ Shi aye i leza, mulekei elwile aye mwine+ mwanda kudi wamupomwena kisōkelo.” 32 Ponkapo wainika Ngideoni bu Yelubale* mu dine difuku’dya kanena’mba: “Bāla elwile aye mwine mwanda kudi wamupomwena kisōkelo.”

33 Midyana+ ense, ne Amaleke,+ ne Bantu ba Kutunduka belunga ku ba bulwi;+ batyibuluka* batwela mu Musanza* wa Yezelele, batūla nkambi. 34 Kupwa mushipiditu wa Yehova watūkila* Ngideoni+ nandi waila lusengo,+ penepa bene Abi-Ezele+ bekupa kwadi. 35 Watuma mikendi mu Manase monso, nabo belunga kwadi. Watuma kadi mikendi mu Ashela, mu Zebuluna, ne mu Nafatale, nabo bakanda kumusambakana.

36 Kupwa Ngideoni wanena Leza wa bine amba: “Shi usa kupandija Isalela kupityila kondi, monka mowalaile’kyo,+ 37 ami uno ngala kiseba kya myoya pa kipūdilo. Shi lumé lukwate’nka ku kiseba inoko nshi yonso ya kufulakufula kwakyo ikale myūmu, penepa nsa kuyuka amba usa kupandija Isalela kupityila kondi, monka mowalaile’kyo.” 38 Kadi e monka mobyalongekele. Aye pa kubūka kesha lubanga futwi wakama kiseba’kya, kwatamba lumé lubwane luyula kibakudi kikatampe kya pa masobo na mema. 39 Ino Ngideoni wanena Leza wa bine amba: “Kokyakijapo bulobo bobe pondi, nkwipangule’po bidi monka. Mfwile’ko’po bidi lusa ntompe kadi monka na kiseba. Leka kiseba kikale kyūmu ino pa nshi ponso pekale lumé.” 40 Leza walongela monka mu bwine bufuku’bwa; enka kiseba kyo kyadi kyūmu, ino pa nshi ponso padi lumé.