Batyibi

8 Kupwa bana-balume ba Efelaimi bamunena’mba: “Le i bika byowetulonga? Mwanda waka kwetwityilepo powaendele kukalwa na Midyana?”+ Penepa bamupotomeja bibibibi.+ 2 Ino webanena’mba: “Le i bika byonalonga bipityile byenu? Mwene kukōkolola kwa Efelaimi+ i kutabuke buya mwangulo wa mañanza wa Abi-Ezele?+ 3 I mu kuboko kwenu mwapēne Leza bamfumu ba Midyana, ba Olebe ne Zebe,+ penepa i bika byonalonga bipityile byenu?” Aye pa kunena namino,* batūkija mutyima.*

4 Kupwa Ngideoni wafika ku Yodano wamwabuka. Aye ne bana-balume 300 baadi nabo badi ke bakōke, ino badi balonda’nka kulonda. 5 Ebiya wanena bana-balume ba mu Sukote amba: “Pai’ko bantu banonda’ba mikate, mwanda ke bakōke kadi nondanga lubilo ba Zeba ne Zalemuna, balopwe ba Midyana.” 6 Ino bamfumu ba Sukote batentulula’mba: “Le bikasala bya ba Zeba ne Zalemuna kebidi kala mu makasa obe pa kusaka’mba tupe kibumbo kyobe kya divita mikate?” 7 Ponkapo Ngideoni wanena’mba: “Pa mwanda wa kino, pasa kumpa Yehova ba Zeba ne Zalemuna mu makasa ami, nsa kwimukupila na miba ne na tumityi twa miba twa mu ntanda mutuputupu.”+ 8 Watamba kwine’kwa wakandila ku Penuele nabo webalomba muswelo umo onka, ino bana-balume ba mu Penuele bamulondolola mwamulondolwedile bana-balume ba mu Sukote. 9 Penepa wanena ne bana-balume ba mu Penuele amba: “Ponsa kujoka mu ndoe, nsa kubundula kino kiteba.”+

10 Ino ba Zeba ne Zalemuna badi mu Kalako pamo ne bibumbo byabo bya divita, kintu kya bana-balume 15 000. Bano bo bonso bashele ku kibumbo kyonso kya divita kya Bantu ba Kutunduka,+ mwanda bana-balume 120 000 badi belumbile bipete badi kala ke bapone. 11 Ngideoni wadi wenda ukanda mu dishinda dya bekadi ba mu mapema kutunduka kwa Noba ne Yongebela,+ watamba bulwi nkambi yadi ya kubulwa kwiteakanya. 12 Ba Zeba ne Zalemuna pa kunyema, walonda wakwata balopwe babidi bene Midyana, ba Zeba ne Zalemuna, nkambi yonso yaivwana luzakalo.

13 Kupwa Ngideoni mwanā Yoashe watamba ku divita wapityila mu kashinda kakanda ku Helese. 14 Wakwata mu dishinda nsongwalume wadi utamba ku Sukote kamwipangula bipangujo. Ebiya nsongwalume’wa wamulembela majina a bamfumu ne bakulumpe ba mu Sukote, bana-balume 77. 15 Kupwa papo waenda ku bana-balume ba mu Sukote kanena’mba: “Ba Zeba ne Zalemuna aba kebo bene bomwadi munzobejeja’mba, ‘Le bikasala bya ba Zeba ne Zalemuna kebidi kala mu makasa obe pa kusaka’mba tupe bobe bana-balume bapungile mikate?’”+ 16 Penepa wasela bakulumpe ba kibundi ne miba ne tumityi twa miba twa mu ntanda mutuputupu, wafundija bana-balume ba mu Sukote.+ 17 Kupwa wabundula kiteba kya Penuele+ ne kwipaya bana-balume ba mu kibundi.

18 Waipangula ba Zeba ne Zalemuna amba: “Le bantu bomwaipaile mu Tabola badi namani?” Nabo balondolola’mba: “Badi pamo bwa abe, umo ne umo wadi umweka bwa mwanā mulopwe.” 19 Ponkapo nandi wanena’mba: “I banabetu, bana ba mama. Bine ne Yehova mūmi, shi mwebalekele bōmi, longa nkimwipailepo.” 20 Kupwa wanena Yetele wandi mwana umbedi amba: “Imana, wibepaye.” Ino nkasampe’wa kasomwenepo kipete kyandi; wadi na moyo, mwanda wadi ukidi nkasampe. 21 Ebiya ba Zeba ne Zalemuna banena’mba: “Imana abe mwine witutape, mwanda mwana-mulume uyukenanga ku bukomokomo bwandi.”* Penepa Ngideoni waimana waipaya ba Zeba ne Zalemuna+ kupwa wasela bya kwidyangula nabyo bitonte byadi mwishingo mwa bangamedia.

22 Mwenda mafuku bantu ba Isalela banena Ngideoni amba: “Witubikadile abe ne obe mwana ne obe munkana mwine, mwanda wetupandije ku makasa a Midyana.”+ 23 Ino Ngideoni webatentulula’mba: “Nkisapo kwimubikala, ne wami mwana mwine kasapo kwimubikala. Yehova ye usa kwimubikala.”+ 24 Ngideoni wanena monka’mba: “Nemulombe’po bidi kintu kimo: muntu ne muntu alete luzenze lwa ku mulu mu bitūtwa byandi.” (Mwanda badi na nzenze ya olo* ya ku myulu ke-pantu badi bene Ishemele.)+ 25 Balondolola’mba: “Bine tusa kukupa’yo.” Penepo baala munkukumba kadi muntu ne muntu waela’po luzenze lwa ku mulu lwa mu bitūtwa byandi. 26 Bulēmi bwa nzenze ya olo ya ku myulu yaalombele bwafikile pa mashekele* 1 700 a olo, kutentekela pa bya kwidyangula nabyo bitonte, byuma bya mwishingo, bivwalwa bya myoya bityilakana bivwalanga balopwe ba Midyana, ne miyololo ya mwishingo ya bangamedia.+

27 Ngideoni walonga’byo ke efoda,+ weitūla patōka mu Ofela+ kibundi kyabo; kadi Isalela yense walonga nayo busekese bwa ku mushipiditu kwine’kwa,+ ebiya kyaikala ke dikinga kudi Ngideoni ne ba mu njibo yandi.+

28 Penepa Midyana+ wanekenibwa ku meso a bene Isalela, kadi kebakidipo bebakoleja* monka; ne ntanda yakōkolokwa* mu myaka 40 mu mafuku a Ngideoni.+

29 Ebiya Yelubale+ mwanā Yoashe wajokela ku yandi njibo, washikata kwine’kwa.

30 Ngideoni wabutwile bana bana-balume 70,* mwanda wadi na bakaji bangi. 31 Wandi mukaji wa pafula wa mu Shekema nandi wamubutwila mwana mwana-mulume, wamwinika bu Abimeleke.+ 32 Penepo Ngideoni mwanā Yoashe wafwa mununu senene, bamujīka mu kibundu kya shandi Yoashe mu Ofela wa bene Abi-Ezele.+

33 Ino Ngideoni’tu ufwa, bene Isalela balonga monka busekese bwa ku mushipiditu na Babāla,+ batonga Bāla-Bedite bu leza wabo.+ 34 Bene Isalela kebavulukilepo Yehova Leza wabo+ webakūdile mu makasa a balwana nabo bonso badi bebajokolokele;+ 35 kadi kebaikelepo na buswe bwa ndamatyidile ku ba mu njibo ya Yelubale, ko kunena’mba Ngideoni, pa biyampe byonso byaalongēle Isalela.+