Bilongwa bya Mafuku Umbajinji

11 Mwenda mafuku bene Isalela bonso bebungila kudi Davida ku Hebelona+ kebanena’mba: “Tala! Batwe twi kikupa ne ngitu yobe.*+ 2 Mafuku kunyuma padi pabikele Solo, abe ye wadi uludika Isalela mu malwi andi.*+ Kadi Yehova Leza obe wakunenene amba: ‘Ukakumba bantu bami bene Isalela, kadi ukekala mutangidiji wa bantu bami bene Isalela.’”+ 3 Ebiya bakulumpe bonso ba Isalela baiya kudi mulopwe ku Hebelona, Davida nandi wasamba nabo kipwano mu Hebelona ku meso a Yehova. Kupwa bashinga Davida māni ke mulopwe pa Isalela,+ mungya kinenwa kya Yehova kyawanenene kupityila kudi Samwele.”+

4 Mwenda mafuku Davida ne Isalela ense bataluka baenda ku Yelusalema, ko kunena’mba Yebushi,+ ntanda yadi ishikata’mo bene Yebushi.+ 5 Bekadi ba Yebushi bakolomona Davida amba: “Kusapo kutwela muno nansha dimo!”+ Inoko Davida wakwata kifuko kikomejibwe kya Ziona,+ kitwa pano bu Kibundi kya Davida.+ 6 Penepo Davida wanena’mba: “Yewa yense ukabadikila kukupila bene Yebushi ukekala mukata* kadi mfumu.” Ponkapo Yoabe+ mwanā Zeluya wabadikila kukanda, ebiya waikala mukata. 7 Kupwa Davida washikata mu kifuko kikomejibwe. O mwanda bekityile bu Kibundi kya Davida. 8 Washilula kūbaka kibundi kufulakufula konso, tamba ku Ndunduma* kufika ne ku bifuko bikijokolokele, Yoabe nandi walongolola kipindi kya kibundi kyadi kishele’ko. 9 Enka nenki Davida wadi wenda ukomena’ko bininge+ kadi Yehova wa bibumbo wadi nandi.

10 Ino ano o majina a mitwe ya ba bulwi ba Davida bakomokomo, bamukweshe bininge mu bulopwe bwandi, pamo ne bene Isalela bonso, bamubikikile bulopwe mungya byanenene Yehova pa mwanda wa Isalela.+ 11 Uno o mulongo wa majina a ba bulwi ba Davida bakomokomo: Yashobeame+ mwanā mwine Hakemoni, mutwe wa basatu.+ Watapile musunsa umo bantu 300 na mukobe wandi.+ 12 Kupwa aye ke Eleaza+ mwanā Dodo mwine Ahohi.+ Wadi mu bukata mwa ba bulwi basatu bakomokomo. 13 Wadi na Davida ku Pasa-damina,+ kwadi kwibungile bene Fidishitia mwanda wa divita. Ino kwadi kapindi ka ntanda kayule’mo mebele a buluba bā, kadi bantu banyemene mwanda wa bene Fidishitia. 14 Ino waimana mu bukata mwa budimi webulwila, watapa’nka kutapa bene Fidishitia, enka nenki Yehova waleta bushindañani bukatampe.*+

15 Bana-balume basatu ba mu mitwe 30 batūkila ku dibwe, kudi Davida ku mutá wa Adulama,+ papo kibumbo kya divita kya bene Fidishitia kyadi kitūdile nkambi mu Musanza* wa Lefaime.+ 16 Papo Davida wadi mu kifuko kikomejibwe, ino kibumbo kya basola kya bene Fidishitia nakyo kyadi mu Betelema. 17 Kupwa Davida walombola kwabila kwandi amba: “Shi nadi’tu mbwanya kutoma mema a mu kyumbu kidi dya ku kibelo kya Betelema!”+ 18 Ponkapo bantu basatu bakatwela ku bukomo mu nkambi ya bene Fidishitia, bateka mema mu kyumbu kidi dya ku kibelo kya Betelema bapaila’o Davida; ino Davida wapela kutoma’o, wapungulula’o ku meso a Yehova. 19 Wanena’mba: “Kebibwanikapo kondi mungya mumweno wa Leza wami kulonga kino kintu! Le mfwaninwe kutoma mashi a bano bana-balume batūla būmi bwabo* mu kyaka?+ Mwanda abaleta’o na kutūla būmi bwabo* mu kyaka.” Penepo wapela kutoma’o. Bino byo byalongele bandi ba bulwi basatu bakomokomo.

20 Abishai+ mwanabo na Yoabe+ waikele ke mutwe wa basatu bakwabo; watapile bantu 300 na mukobe wandi, kadi nandi wadi mutumbe pamo bwa boba basatu.+ 21 Mu boba basatu bakwabo, aye wadi mutumbe kupita babidi, kadi wadi mukata wabo; ino kafikīlepo pa ludingo lwa basatu babajinji.

22 Benaya+ mwanā Yehoyada wadi mwana-mulume mukankamane* walongele bintu bivule bya nkuo mu Kabezele.+ Waipaile bana babidi ba Adiele wa ku Moabu, kadi watūkīle mu kīna kya mema mu difuku dya mashika mekwate waipaya ntambo.+ 23 Kadi waipaile ne mwine Edipito umo wa kimano kipite’byo kipimo—wa bula bwa maboko atano.*+ Nansha mwine Edipito byaadi na mukobe mu kuboko pamo bwa mutyi wa basukanga bisandi,+ aye waendele kwadi na mukombo, wasompola mwine Edipito mukobe mu kuboko, wamutapa’nka na mukobe wandi’wa.+ 24 Bino byo byalongele Benaya mwanā Yehoyada, kadi wadi mutumbe pamo bwa ba bulwi basatu bakomokomo. 25 Nansha byaadi mutumbe bininge kupita’nka ne boba makumi asatu, kafikīlepo pa ludingo lwa basatu.+ Inoko Davida wamutūdile ke mukata wa bandi basola balami.

26 Ba bulwi bakomokomo ba bibumbo bya basola i Asahele+ mwanabo na Yoabe, Elanana mwanā Dodo wa ku Betelema,+ 27 Shamote mwine Halole, Heleze mwine Pelone, 28 Ila+ mwanā Ikeshe mwine Tekoa, Abi-Ezele+ mwine Anatote, 29 Shibekai+ mwine Husha, Ilai mwine Ahohi, 30 Mahalai+ mwine Netofa, Helede+ mwanā Baane mwine Netofa, 31 Ifai mwanā Dibai mwine Ngibea wa bene Benjemani,+ Benaya mwine Pilatoni, 32 Hulai wa ku binekaneka* bya Ngashi,+ Abiele mwine Alaba, 33 Azamaveta mwine Bahudime, Ediaba mwine Shalabone, 34 bana ba Hashema mwine Ngizone, Yonafane mwanā Shake mwine Halale, 35 Ahiame mwanā Sakale mwine Halale, Edifale mwanā Ulu, 36 Hefele mwine Mekelate, Ahiya mwine Pelone, 37 Hezelo mwine Kalamela, Nalai mwanā Ezebai, 38 Yoela mwanabo na Natana, Mibihala mwanā Hakalai, 39 Zeleke mwine Amone, Nahalai mwine Belote, kyabuta wa Yoabe mwanā Zeluya; 40 Ila mwine Itidi, Ngaleba mwine Itidi, 41 Udia+ mwine Hiti, Zabada mwanā Alai, 42 Adina mwanā Shiza mwine Lubeni, mutwe wa bene Lubeni, ne bantu 30 baadi nabo; 43 Hanana mwanā Maka, Yoshafata mwine Mitane, 44 Uziā mwine Ashetalote, Shama ne Yeiele, bana ba Hotama mwine Aloele; 45 Yediaele mwanā Shimidi, ne mwanabo Yoha mwine Tiza; 46 Ediele mwine Mahava, Yedibai ne Yoshavia bana ba Elenama, ne Itama mwine Moabu; 47 Ediele, Obeda, ne Yashiele mwine Mezoba.