Bilongwa bya Mafuku wa Bubidi

34 Yoshia+ wadi na myaka mwānda paabikele, wabikele myaka 31 mu Yelusalema.+ 2 Wadi ulonga byoloke ku meso a Yehova kadi wanangīle mu mashinda onso a Davida mukulutuba wandi, kasāsukīlepo ku lundyo nansha ku lunkuso kwine.

3 Mu mwaka wa 8 wa bulopwe bwandi, aye papo ukidi mwanuke, waanza kukimba Leza wa Davida mukulutuba wandi;+ mu mwaka wa 12, waanza kutalula mu Yuda ne mu Yelusalema+ mitenta+ ne bipanda bikola,* ne bankishi basōnge,+ ne bankishi ba byuma.* 4 Kadi, bapomona bisōkelo bya Babāla mu meso andi, watyumuna bisōkelo bya ensense byadi peulu pabyo. Wavingakanya ne bipanda bikola,* bankishi basōnge, ne bankishi ba byuma,* webitwa bukula, webutūta pa bibundu bya boba badi bebatapila bitapwa.+ 5 Kadi wasōka mikupa ya babitobo pa bisōkelo byabo.+ Enka nenki, watōkeja Yuda ne Yelusalema.

6 Kadi ne mu bibundi bya Manase, Efelaimi,+ Shimioni, kufika ne ku Nafatale, mu masala ebijokolokele, 7 wapomona’mo bisōkelo, wavingakanya bipanda bikola* ne bankishi basōnge,+ webitwa bukula; kadi watyumuna bisōkelo byonso bya ensense mu ntanda yonso ya Isalela,+ kupwa wajokela ku Yelusalema.

8 Mu mwaka wa 18 wa bulopwe bwandi, paatōkeje ntanda ne tempelo,* watuma ba Shafana+ mwanā Azadiya, ne Maaseya mukata wa kibundi, ne Yoa mwanā Yoahaza musoneki bakalongolole njibo ya Yehova Leza wandi.+ 9 Baiya kudi Hilekia kitobo mukatampe, bamupa lupeto lobaselele ku njibo ya Leza, lwakongele batulama ba pa kibelo bene Levi ku Manase, Efelaimi, ne mu Isalela monso,+ ne ku Yuda, ne ku Benjemani, ne mu bekadi ba Yelusalema. 10 Penepo bapa’lo boba batongelwe kutala mwingilo mu njibo ya Yehova. Bengidi ba mu njibo ya Yehova nabo baingidija’lo mwanda wa kulongolola njibo. 11 Bapele’lo basendwe ne bōbaki mwanda wa kupota mabwe masōnge ne mityi ya kukwatyija nayo ne kūbaka na makomba mobo alekele balopwe ba Yuda mu masala.+

12 Bantu baingile na kikōkeji.+ Bebatongēle bene Levi ba kwibatala, ba Yahate ne Obadia ba ku bene Meladi,+ ne Zekadia ne Meshulama ba ku bene Kohata.+ Kadi bene Levi, boba bonso badi bañomba ba bwino,+ 13 badi bendeja ba mingilo ya masusu* kadi badi batadi ba boba bonso badi bengila mingilo ya miswelo yonso; bene Levi bamo badi balembi, bemaniji, ne batulama ba ku kibelo.+

14 Pobadi batambija lupeto lwaletelwe ku njibo ya Yehova,+ kitobo Hilekia wasokola mukanda wa Bijila bya Yehova+ byaletelwe kupityila kudi* Mosesa.+ 15 Penepo Hilekia walombola Shafana mulembi amba: “Nasokola mukanda wa Bijila mu njibo ya Yehova.” Penepa Hilekia wapa Shafana mukanda’wa. 16 Ebiya Shafana waselela mulopwe mukanda’wa kamusapwila’mba: “Bengidi bobe baloñanga bintu byonso byobanenwe kulonga. 17 Abapungulula lupeto lwatanwa mu njibo ya Yehova, abape’lo bana-balume batongelwe ne boba bengila mingilo.” 18 Shafana mulembi wasapwila monka mulopwe amba: “Kudi mukanda waumpa+ Hilekia kitobo.” Penepo Shafana washilula kutanga’o ku meso a mulopwe.+

19 Mulopwe pa kwivwana’tu binenwa bya mu Bijila, ponkapo wasana bivwalwa byandi.+ 20 Ebiya mulopwe wasoñanya Hilekia, ne Ahikama+ mwanā Shafana, ne Abedone mwanā Mikaya, ne mulembi Shafana, ne Asaya mwingidi wa mulopwe namino amba: 21 “Endai mukepangule Yehova pangala pami, ne pangala pa boba bashele mu Isalela ne mu Yuda pa mwanda wa binenwa bya mu mukanda wasokolwa’u; ke-pantu bukalabale bwa Yehova busa kwitupungulukila i bukatampe, mwanda bakulutuba betu kebakōkelepo binenwa bya Yehova na kulama byonso bilembelwe mu uno mukanda.”+

22 Ebiya Hilekia, ne boba batuminwe na mulopwe baenda kudi Huluda mupolofeto mukaji.+ Wadi mukaja Shalumu mwanā Tikeva mwanā Halahasa, mwine wadi utala kokwa kulamwanga bisandi, kadi wadi ushikata mu Mukenza wa Bubidi wa Yelusalema; penepo kebesambe nandi kwine’kwa.+ 23 Nandi webanena’mba: “Yehova Leza wa Isalela wanena namino amba, ‘Kalombolei muntu wemutuma kondi amba: 24 “Yehova wanena namino amba, ‘Nsa kuleta kyamalwa pa kino kifuko ne pa bekadi bakyo,+ mafingo onso alembelwe mu mukanda+ obatanga ku meso a mulopwe wa Yuda. 25 Byobangela+ ne kufitula mwishi wa bitapwa ku baleza bakwabo mwanda wa kunsanshija+ na mingilo yonso ya makasa abo, bukalabale bwami busa kupungulukila pa kino kifuko kadi kebukabulepo.’”+ 26 Ino kasapwilei mulopwe wa Yuda wemutuma kwipangula Yehova amba, “Yehova Leza wa Isalela wanena namino amba: ‘Pangala pa binenwa byowaivwana,+ 27 mutyima obe byowatengwa* kadi ubetyepeja ku meso a Leza na kwivwana binenwa byandi bitala kino kifuko ne bekadi bakyo, ubetyepeja ku meso ami kadi ubasana bivwalwa byobe, ubadila ku meso ami, ami nami nakwivwana,+ i Yehova unena. 28 O mwanda nkakulunga kudi bakulutuba bobe,* ukalādikwa mu kibundu kyobe mu ndoe, kadi meso obe keakamonepo byamalwa byonso byonkaleta pa kino kifuko ne pa bekadi bakyo.’”’”+

Penepa baiya kusapwila mulopwe kilondololwa. 29 Ebiya mulopwe watuma musapu, waityija bakulumpe bonso ba Yuda ne ba Yelusalema.+ 30 Kupwa mulopwe wakandila ku njibo ya Yehova na bana-balume bonso ba Yuda, bekadi bonso ba Yelusalema, babitobo, ne bene Levi—bantu bonso, ne bakatampe ne batyetye bene. Watanga mu matwi abo binenwa byonso bya mu mukanda wa kipwano watenwe mu njibo ya Yehova.+ 31 Mulopwe waimana pa kifuko kyandi, wasamba kipwano*+ ku meso a Yehova amba ukalonda Yehova ne kulama mbila yandi, bivulujo byandi, ne misoñanya yandi na mutyima wandi onso ne na muya*+ wandi onso na kufikidija binenwa bya kipwano byadi bilembwe mu uno mukanda.+ 32 Ne kadi, walengeje bonso badi mu Yelusalema ne mu Benjemani betabije’byo. Bekadi ba Yelusalema balonga mungya kipwano kya Leza, Leza wa bakulutuba babo.+ 33 Penepo Yoshia watalula bintu byonso bya munyanji* mu matanda onso a bene Isalela,+ walengeja bantu bonso ba mu Isalela bengidile Yehova Leza wabo. Mu būmi bwandi bonso,* kebalekelepo kulonda Yehova Leza wa bakulutuba babo.