Bilongwa bya Mafuku Umbajinji

21 Penepo Satana* waimanina Isalela bibi ne kutonona Davida abale Isalela.+ 2 Ebiya Davida wanena Yoabe+ ne bamfumu ba bantu amba: “Endai mukabale Isalela tamba ku Bela-Sheba kutūla ne ku Dani;+ kupwa mwiye munsapwile amba ndyuke bungi bwabo.” 3 Ino Yoabe wanena’mba: “Yehova avudije’ko bantu bandi misunsa 100! A mfumwami mulopwe, le abo bonso ke bengidipo kala ba mfumwami? Mwanda waka mfumwami usaka kulonga kino kintu? Mwanda waka usaka kupija Isalela mambo?”

4 Ino kinenwa kya mulopwe kyatādila Yoabe. Ebiya Yoabe watamba waenda mu Isalela monso, kupwa waiya ku Yelusalema.+ 5 Penepo Yoabe wapa Davida bungi bwa bantu balembelwe. Isalela ense wadi na bana-balume 1 100 000 belumbile bipete, Yuda nandi wadi na bana-balume 470 000 belumbile bipete.+ 6 Ino ba Levi ne Benjemani kebalembelwepo mu bukata mwabo,+ mwanda kinenwa kya mulopwe kyadi kya munyanji kudi Yoabe.+

7 Ino kino kintu kyafītyije Leza wa bine ku mutyima mpata, ebiya wakupila Isalela. 8 Kupwa Davida wanena Leza wa bine amba: “Nalonga bubi+ bukatampe pa kulonga kino kintu. Shi ke pano, nakwisāshila, lekela mwingidi obe kilubo,+ mwanda nalonga bya bulembakane mpata.”+ 9 Penepo Yehova wasapwila Ngade,+ mumoni wa bimonwa wa Davida amba: 10 “Enda kasapwile Davida amba, ‘Yehova wanena namino amba: “Nakupe bintu bisatu bya kutonga’po. Tonga kintu kimo kyomfwaninwe kukuletela.”’” 11 Penepo Ngade watwela kwa Davida kamunena’mba: “Yehova wanena namino amba, ‘Tonga 12 shi usaka kwikale myaka isatu ya kipupo kya nzala,+ nansha myeji isatu ya kukubijibwa na bakinkwa nobe koku kipete kya balwana nobe kikupeta,+ nansha mafuku asatu a kipete kya Yehova—kipupo kya misongo mu ntanda+—papo mwikeulu wa Yehova onakanya+ bantu mu ntanda yonso ya Isalela.’ Shi ke pano langa byomfwaninwe kukalondolola Yewa untumine.” 13 Ebiya Davida wanena Ngade amba: “I kya bulanda mpata kondi. Nakwisāshila, mponene’tu mu kuboko kwa Yehova, mwanda lusa lwandi i lukatampe bininge;+ ino kokamponeneja mu makasa a muntu.”+

14 Kupwa Yehova watuma kipupo kya misongo+ mu Isalela, penepo bantu 70 000 ba Isalela bapona.+ 15 Ne kadi, Leza wa bine watuma mwikeulu ku Yelusalema mwanda wa kumonakanya; ino paadi kasake kulonga namino, Yehova wamona’kyo, penepo wealakanya* pa mwanda wa kyamalwa’kya,+ ebiya wanena mwikeulu wadi uleta bonakani amba: “Kubapu!+ Pano konya kuboko kobe.” Mwikeulu wa Yehova wadi wimene kubwipi na kipūdilo kya Olonane+ mwine Yebushi.+

16 Davida pa kutulula meso wamona mwikeulu wa Yehova wimene pa bukata bwa ntanda ne mūlu na kipete+ kisomone mu kuboko kwandi kitadidile ku Yelusalema. Davida ne bakulumpe, papo bepūte masāka,+ bapona ponka na ponka mapala abo pa nshi.+ 17 Davida wanena Leza wa bine amba: “Mwene ami ye wanenene kubala bantu? Ami ye upile mambo, kadi ye ulubile;+ ino le ino mikōko kyoilongele i kika? A Yehova Leza wami, nakwisāshila, kuboko kobe kwiye pondi ne pa njibo ya tata; ino kokaponeneja kino kimpengele pa bantu bobe.”+

18 Penepo mwikeulu wa Yehova wanena Ngade+ asapwile Davida akande, akashimikile Yehova kisōkelo pa kipūdilo kya Olonane mwine Yebushi.+ 19 Ebiya Davida wakanda mungya kinenwa kya Ngade, kyaanenene mu dijina dya Yehova. 20 Mu kine kitatyi’kya, Olonane wavundamuka wamona mwikeulu, penepo bandi bana baná baadi nabo bakafyama. Papo Olonane wadi upūla ñano. 21 Davida pa kukanda kwaadi, Olonane amba atale wamona Davida, ponka na ponka wataluka pa kipūdilo wevukwila kudi Davida mpala yandi pa nshi. 22 Davida wanena Olonane amba: “Mpoteje* kifuko padi kipūdilo, amba nshimikile’po Yehova kisōkelo. Mpoteje’kyo ku lupoto lukunkane, amba kimpengele kiponēne bantu kipwe.”+ 23 Ino Olonane watentulula Davida amba: “Sela’kyo ke kyobe, mfumwami mulopwe alonge byobya byamona bu biyampe kwadi.* Yeu ndeta bañombe ba byamulambu bisōkwe ne kipungwa kya kupūla nakyo+ ke nkuni kadi ne ñano ya kyamulambu kya miseke. Nakupe byonso’bi.”

24 Inoko, Mulopwe Davida wanena Olonane amba: “Aa, mfwaninwe kukupota’kyo ku lupoto lukunkane, mwanda nkisapo kusela byobe bintu mpe’byo Yehova nansha kulambula bitapwa bisōkwe byonkijimijijepo lupeto.”+ 25 Ebiya Davida wapa Olonane mashekele* 600 a ndalama mungya kipimo pa mwanda wa kifuko’kya. 26 Penepo Davida waubakila Yehova kisōkelo+ kwine’kwa, walambula bitapwa bisōkwe ne bitapwa bya kipwano, kaite Yehova, nandi wamulondolola na mudilo+ utamba mūlu watūkila pa kisōkelo kya kyamulambu kisōkwe. 27 Kupwa Yehova wasoñanya mwikeulu+ ajokeje kipete kyandi mu kikwa kyakyo. 28 Mu kine kitatyi’kya, Davida pa kumona’mba Yehova wamulondolwela pa kipūdilo kya Olonane mwine Yebushi, waendelela kulambwila’po. 29 Inoko kipema kya Yehova kyālongele Mosesa mu ntanda mutuputupu ne kisōkelo kya kyamulambu kisōkwe byadi pa mutenta ku Ngibeone mu kine kitatyi’kya.+ 30 Ino Davida kabwenyepo kwenda ku meso akyo kukepangula Leza, mwanda wakwetwe moyo pa mwanda wa kipete kya mwikeulu wa Yehova.