Bilongwa bya Mafuku wa Bubidi

25 Amazia wadi na myaka 25 paabikele, wabikele myaka 29 mu Yelusalema. Dijina dya inandi i Yehoadane wa ku Yelusalema.+ 2 Wadi ulonga nyeke byoloke ku meso a Yehova, ino ke na mutyimapo onso mutuntulu. 3 Aye’tu pa kukomeja bulopwe mu lupusa lwandi, waipaya bengidi bandi baipaile shandi mulopwe.+ 4 Inoko kaipailepo babo bana, mwanda walongele mungya byobya bilembelwe mu Bijila, mu mukanda wa Mosesa, mwasoñenye Yehova amba: “Bashabantu kebakafupo pa mwanda wa babo bana, kadi bana nabo kebakafupo pa mwanda wa bashabo; ino muntu ne muntu ukafwa pa bubi bwa aye mwine.”+

5 Ebiya Amazia wakongakanya Yuda, webemika mungya bisaka bya mobo a bashabo, mwendele bakata ba tununu ne mwendele bakata ba tutwa ba Yuda ense ne Benjemani.+ Webabadile kushilwila ku wa myaka 20 kokanda,+ watana bantu 300 000 bafundijibwe* bulwi ba kwingila mu kibumbo kya divita, babwanya kwingidija mikobe ne ngabo mikatampe. 6 Wakaloba ne ba bulwi bankanka 100 000 mu Isalela ku talenta* 100 ya ndalama. 7 Ino muntu wa Leza wa bine waiya kwadi kamunena’mba: “A mulopwe, kokileka kibumbo kya divita kya Isalela kyende nobe, mwanda Yehova kadipo na Isalela,+ nansha na bene Efelaimi bene. 8 Ino enda abe mwine, longa’po kintu kadi wikomeje mu bulwi. Shi bitupu, Leza wa bine ubwanya kukukukaja ku meso a walwana, mwanda Leza udi na bukomo bwa kukwasha+ ne bwa kukukaja.” 9 Penepo Amazia wanena muntu wa Leza wa bine amba: “Le talenta 100 yonapele bibumbo bya basola ba Isalela nayo?” Muntu wa Leza wa bine nandi walondolola’mba: “Yehova ubwanya kukupa mivule kupita ne yayo mine.”+ 10 Penepa Amazia wajokeja bibumbo bya basola batambile ku Efelaimi baiya kwadi, webajokeja kwabo. Inoko, balobēle Yuda bininge, ebiya bajokela kwabo na bulobo bukatampe.

11 Ebiya Amazia wekomeja, waenda na bibumbo bya basola bandi ku Musanza wa Mwepo,+ waipaya bantu ba Seila 10 000.+ 12 Kadi bantu ba Yuda bakwete bantu 10 000 bōmi. Bebaselela peulu pa kidibwe, bebatonwena munshi mwa kidibwe, basonsakana bisesobiseso. 13 Ino basola bobajokeje kudi Amazia baleke kwenda nandi ku divita+ batamba’dyo bibundi bya Yuda, tamba ku Samadia+ kutūla ne ku Bete-Holone;+ baipaya’mo bantu 3 000, basela ne bitūtwa bivule.

14 Ino Amazia pa kujoka kwaakepaile bene Edoma, waselele baleza+ ba bantu ba Seila webatūla ke baleza bandi, kawivukwila ku meso abo ne kwibafitwila mwishi wa bitapwa. 15 Penepo Yehova walobela Amazia bininge, watuma mupolofeto mwine wamunenene amba: “I kika kyolondela baleza ba bantu kebakūdilepo bantu babo ku kuboko kobe?”+ 16 Aye ukīsamba nandi, mulopwe wamunena’mba: “Le twakutongele bu mudingidi wa mulopwe?+ Lekela’byo papo!+ Le kyosakila bakwipaye i kika?” Penepo mupolofeto wauba, ino wabweja’ko amba: “Ndyukile amba Leza watyibe mbila ya kukusala, mwanda ubalonga kino kadi kwivwenepo madingi ami.”+

17 Pa kupwa kukala ñeni na badingidi bandi, Amazia mulopwe wa Yuda watuma musapu kudi Yehoashe mwanā Yehoahaze mwanā Yehu mulopwe wa Isalela amba: “Iya twikume mu bulwi.”*+ 18 Yehoashe mulopwe wa Isalela watuma uno musapu kudi Amazia mulopwe wa Yuda amba: “Kayombo ka miba ka mu Lebanona katumine musapu kudi mutyi wa sedele wa mu Lebanona amba, ‘Leta obe mwana mwana-mukaji ekale mukaja wami mwana.’ Inoko, nyema wa ntanda wa mu Lebanona wapita watyampakanya kayombo ka miba’ka. 19 Ubanena’mba, ‘Tala! Ami* naonakanya Edoma.’+ Ebiya mutyima obe ubaikala na mitatulo, usaka kutumbijibwa. Ino pano wishikatyile mu yobe njibo.* Le kyokolomwena kyamalwa ne kupona, koshindija Yuda pamo nobe i kika?”

20 Ino Amazia kaivwenepo,+ mwanda kino kyatambile kudi Leza wa bine amba ebapāne mu kuboko kwa walwana,+ ke-pantu balondele baleza ba Edoma.+ 21 Penepo Yehoashe mulopwe wa Isalela wakanda, ebiya aye ne Amazia mulopwe wa Yuda bekuma mu bulwi ku Bete-Shemeshe,+ kibundi kya Yuda. 22 Yuda wanekenibwa na Isalela, penepo muntu ne muntu wanyemena kwandi.* 23 Yehoashe mulopwe wa Isalela wakwata Amazia mulopwe wa Yuda, mwanā Yehoashe mwanā Yehoahaze* ku Bete-Shemeshe. Kupwa wamuselela ku Yelusalema, watubula kipunzu ku lubumbu lwa Yelusalema tamba ku Kibelo kya Efelaimi+ kutūla ne ku Kibelo kya Difinko,+ maboko 400.* 24 Wasela olo yonso ne ndalama yonso ne bintu byonso byatenwe mu njibo ya Leza wa bine byadi na* Obede-Edome ne mu bibīko bya byabulēme bya njibo* ya mulopwe,+ ne misungi mine kumo. Kupwa wajokela ku Samadia.

25 Amazia+ mwanā Yehoashe mulopwe wa Yuda walāla monka myaka 15 kupwa kwa lufu lwa Yehoashe+ mwanā Yehoahaze mulopwe wa Isalela.+ 26 Myanda mikwabo ya mānga ya Amazia, tamba ku ngalwilo kutūla ne ku mfulo, tala! mwene i milembwe mu Mukanda wa Balopwe ba Yuda ne ba Isalela? 27 Tamba kitatyi kyalekele Amazia kulonda Yehova, bamukutyila kitumba+ mu Yelusalema, aye wanyemena ku Lakishi, ino batuma bana-balume ba kumulonda ku Lakishi, bamwipaila konka. 28 Ebiya bamusela pa tubalwe bamujokeja, bamujīka na bakulutuba bandi mu kibundi kya Yuda.