Balopwe wa Bubidi

20 Mu mene mafuku’a, Hezekia wabela kadi wadi kadi kubwipi na kufwa.+ Mupolofeto Isaya mwanā Amoze waiya kamunena’mba, “Yehova wanena namino amba: ‘Lombola ba mu yobe njibo bya kulonga, mwanda usa kufwa; kusapo kukoma.’”+ 2 Ponkapo watadija mpala yandi ku lubumbu kalombela kudi Yehova amba: 3 “Nakuzenze, a Yehova, nakwisāshila, vuluka’po monanangīle ku meso obe na kikōkeji ne na mutyima onso mutuntulu, kadi nalongele biyampe ku meso obe.”+ Penepo Hezekia kadila bibibibi.

4 Isaya paadi kafikile mu kipango kya pa bukata, kinenwa kya Yehova kyaiya kwadi amba:+ 5 “Joka usapwile Hezekia mutangidiji wa bantu bami amba, ‘Yehova Leza wa Davida mukulutuba obe wanena namino amba: “Naivwana milombelo yobe. Namone impolo yobe.+ Nsa kukubelula.+ Mu difuku dya busatu usa kukanda ku njibo ya Yehova.+ 6 Nsa kubweja myaka 15 ku būmi bobe,* kadi nsa kukukūla abe ne kino kibundi ku kuboko kwa mulopwe wa Ashidia,+ nsa kulwila kino kibundi pa mwanda wami ne pa mwanda wa Davida mwingidi wami.”’”+

7 Kupwa Isaya wanena’mba: “Letai mukate wa mikuyu myūmu miponde.” Penepo baleta’o, bamushinga’o pa kipote, ebiya waanza kukoma bityebitye.+

8 Hezekia waipangula Isaya amba: “Le i kiyukeno’ka+ kilombola’mba Yehova usa kumbelula ne amba nsa kukanda ku njibo ya Yehova mu difuku dya busatu?” 9 Isaya walondolola’mba: “Kino kyo kiyukeno kitamba kudi Yehova kya kukulombola’mba Yehova usa kufikidija binenwa byaanena: Le usaka munjiñininya wa pa lukala* wende kumeso matabula dikumi’ni nansha ujoke kinyuma matabula dikumi?”+ 10 Hezekia wanena’mba: “I kipēla munjiñininya kubaila’ko matabula dikumi kupita’ko kujoka kinyuma matabula dikumi.” 11 Penepo mupolofeto Isaya waabija Yehova, Nandi wajokeja munjiñininya kinyuma matabula dikumi pa lukala lwa Ahaza ao wadi ke mutūke kala matabula kampanda.+

12 Mu kine kitatyi’kya mulopwe wa Babiloni, Belodake-Baladane mwanā Baladane, watumina Hezekia mikanda ne byabuntu, mwanda waivwene amba Hezekia wadi ubela.+ 13 Hezekia webatundaila,* webalombola ne njibo yandi yonso ya byabulēme+—ndalama, ne olo, ne māni a balasome ne māni makwabo malēme, ne njibo yandi ya byabulwi, ne bintu byonso byatenwe mu bibīko byandi bya byabulēme. I kutupu kintu kekyebalombwelepo Hezekia mu njibo* yandi ne mu bulopwe bwandi bonso.

14 Kupwa mupolofeto Isaya watwela kwa Mulopwe Hezekia kamwipangula’mba: “Le bano bantu abanena bika, ne kobatamba kwine i kwepi?” Hezekia nandi wanena’mba: “I batambe ku ntanda ya kulampe, ku Babiloni.”+ 15 Wamwipangula monka’mba: “Le i bika byobamona mu yobe njibo?”* Hezekia walondolola’mba: “Abamone bintu byonso mu yami njibo.* Kekudipo kintu kya mu bibīko byami bya byabulēme kyonkibalombwelepo.”

16 Ponkapo Isaya wanena Hezekia amba: “Teja byanena Yehova,+ 17 ‘Tala! Mafuku asa kwiya, bintu byonso bidi mu yobe njibo* ne byonso byaungwije bakulutuba bobe kufika ne dyalelo bikaselelwa ku Babiloni.+ I kutupu kikashala,’ i Yehova unena. 18 ‘Kadi bobe bana bamo bosa kubutula bakaselwa,+ bakekala bengidi ba bulēme ba mu kipango mu njibo mikatakata ya mulopwe wa Babiloni.’”+

19 Ponkapo Hezekia wanena Isaya amba: “Kinenwa kya Yehova kyowanena’kyo i kiyampe.”+ Kupwa wabweja’ko amba: “I biyampe shi kwikale ndoe ne mutyima-ntenke* ponekidi mūmi.”*+

20 Myanda mikwabo ya mānga ya Hezekia, bukomokomo bwandi bonso ne mwaalongele kijiba+ ne mukola ne kuleta mema mu kibundi,+ mwene i milembwe mu mukanda wa mānga ya bitatyi bya balopwe ba Yuda? 21 Kupwa Hezekia walādikwa mwanda wa kukōkolokwa na bakulutuba bandi;+ ebiya wandi mwana Manase+ wabikala pa kyandi kyaba.+