Batyibi

14 Penepa Samishoni watūkila ku Timina, kadi mu Timina’mwa wamona’mo mwana-mukaji mwine Fidishitia.* 2 Ebiya wakanda wakasapwila ba shandi ne inandi amba: “Mu Timina mudi mwana-mukaji umo mwine Fidishitia wansangaja, nsaka munsongele’ye ke wami mukaji.” 3 Ino ba shandi ne inandi bamunena’mba: “Le kubwanyapo kusokola mwana-mukaji mu babutule bobe ne mu bantu betu bonso?+ Le bikulomba enka wende kukasela mukaji mu bene Fidishitia ba kubulwa kutwejibwa kwisao?” Inoko Samishoni walondolola shandi amba: “Nsongele’ye mwanda aye ye umfwaninwe.”* 4 Ba shandi ne inandi kebajingulwilepo amba kino kyadi kitamba kudi Yehova, mwanda Aye wadi ukimba mukenga wa kulwa na bene Fidishitia, ke-pantu bene Fidishitia badi babikele Isalela mu kine kitatyi’kya.+

5 Ebiya Samishoni watūkila ku Timina pamo na ba shandi ne inandi. Aye pa kufika pa madimi a mañanza a Timina, amba atale! ntambo* awa wiya umubulumina. 6 Penepo mushipiditu wa Yehova wamupa bukomo,+ nandi wamusana pabidi musaninanga muntu kabuji kana pabidi na makasa onkaonka. Ino kasapwidilepo ba shandi ne inandi byaalongele. 7 Kupwa watūka wakesamba na mwana-mukaji’wa, kadi aye wadi ukidi mufwaninwe ku meso a Samishoni.+

8 Mwenda mafuku paadi ukamuselela ku njibo,+ watonta kukatala umbidi wa ntambo mufwe’wa, ino mu umbidi wa ntambo mwadi kisampo kya nyuki ne būki monka. 9 Penepo wakokela būki mu makasa andi kadi’bo koku wenda. Pa kwitana na ba shandi ne inandi, webapa’mo bumo badye. Ino kebasapwidilepo amba wakokele būki mu umbidi wa ntambo.

10 Shandi watūkila kudi mwana-mukaji, Samishoni nandi wasoba masobo kwine’kwa, mwanda mo mwadi mulongelanga bansongwalume. 11 Abo pa kumumona, bamuletela balunda na musoñañani 30 ba kumukunkuja. 12 Kupwa Samishoni webanena’mba: “Nemutyonkele’po bidi lutyonko. Shi mushintulule’lo ne kumpa buluji bwalo mu mafuku asamba-abidi, nsa kwimupa bivwalwa 30 bya bukonge ne bivwe 30 bya bisandi. 13 Ino shi mutunye kumpa malondololo, banwe bo bakampa bivwalwa 30 bya bukonge ne bivwe 30 bya bisandi.” Nabo amba: “Witutyonkele’lo; tusaka kwilwivwana.” 14 Penepo webalombola’mba:

Kebabwenyepo kushintulula lutyonko’lwa mu mafuku asatu. 15 Mu difuku dya buná, banena mukaja Samishoni amba: “Dimba obe mulume ñeni+ etusapwile buluji bwa lutyonko. Shi bitupu, tusa kukusōka abe ne njibo ya shobe na mudilo. Le mwetwityile kuno mwanda wa kwituyata bintu byetu?” 16 Penepo mukaja Samishoni kamudidila’mba: “Bine wi munshikwe; kunsenswepo.+ Watyonkēle bantu bami lutyonko, ino ami kunombwelepo buluji bwalo.” Pa kino nandi wamunena’mba: “Tala bidi, nkisapwidile’lopo nansha ke ba tata ne mama bene! Nkusapwile’lo’ko abewa?” 17 Ino wadi umudidila’nka kumudidila mu mafuku ashele mu mafuku asamba-abidi a masobo. Mfulo mfulō wamusapwila mu difuku dya busamba-bubidi, mwanda wamuningīle bibibibi. Kupwa nandi wasapwila bantu bandi buluji bwa lutyonko.+ 18 Ebiya mu difuku dya busamba-bubidi, kumeso kwa dyuba kupona,* bana-balume ba mu kibundi bamulondolola’mba:

Nandi webatentulula’mba:

19 Penepo mushipiditu wa Yehova wamupa bukomo,+ nandi watūkila ku Ashekelona+ waipaya bana-balume bakyo 30, webayata bisandi byabo, wakapāna bivwe bya bisandi ku boba bashintulwile lutyonko.+ Wadi mulobe bininge paadi ujokela ku njibo ya shandi.

20 Kupwa bapāna mukaja+ Samishoni kudi umo wa mu balunda na musoñañani bamukunkwije’ba.+