Eseta

9 Mu difuku dya 13 dya kweji wa 12, ko kunena’mba, kweji wa Adala,*+ kitatyi kyadi kya kufikidija kinenwa kya mulopwe ne kijila kyandi,+ mu difuku dyadi dilanga balwana na Bayuda kwibakomena, bintu byashinta, Bayuda banekenya boba badi bebashikilwe.+ 2 Bayuda bebunga mu bibundi byabo mu matanda onso a bubikavu* a Mulopwe Ahaswelusa+ mwanda wa kōlola maboko pa boba badi bakimba kwibalonga bibi, kadi i kutupu muntu nansha umo webakomene, mwanda moyo wa kwibatyina waponēne bantu bonso.+ 3 Kadi bamfumu bonso ba matanda a bubikavu,* ne babilolo,+ ne bambikavu, ne boba bengilanga mingilo ya mulopwe, baitabīle Bayuda, mwanda badi batyina Modekai. 4 Modekai waikele ke mukomo+ mu njibo* ya mulopwe, kadi ntumbo yandi yasambakene mu matanda onso a bubikavu,* mwanda Modekai wadi wenda ukomena’ko.

5 Bayuda baipaya balwana nabo bonso na kipete, bebepaya ne kwibonakanya, balonga boba badi bebashikilwe byonso byobasaka.+ 6 Mu Shushane*+ kibundi kya nsakwa,* Bayuda baipaile ne konakanya’mo bantu 500. 7 Baipaya ne Paleshadata, Dalafone, Asepata, 8 Polata, Adadia, Adidata, 9 Palamasheta, Adisai, Adidai, ne Vaizata, 10 bana dikumi ba Hamane mwanā Hamedata, walwana na Bayuda.+ Ino abo pa kupwa kwibepaya, kebayetepo kitūtwa nansha kimo.+

11 Mu dine difuku’dya basapwila mulopwe bungi bwa boba bobaipaile mu Shushane* kibundi kya nsakwa.*

12 Mulopwe wanena Eseta Mukaja Mulopwe amba: “Mu Shushane* kibundi kya nsakwa,* Bayuda abaipaya ne konakanya’mo bana-balume 500 ne bana dikumi ba Hamane. Le penepo mu matanda a bubikavu* makwabo a mulopwe namo abalonga’mo bika?+ Le penepa i bika byowalomba? Bikakupebwa. Ne i bika bikwabo byosaka? Nabyo bikakupebwa.” 13 Eseta walondolola’mba: “Shi kibasangaja mulopwe,+ nankyo Bayuda badi mu Shushane* bapebwe lupusa lwa amba balonge ne kesha mwendele kijila kya dyalelo;+ kadi bana dikumi ba Hamane bayeyekwe ku mutyi.”+ 14 Penepo mulopwe wasoñanya’mba kilongwe. Kijila kyaletwa mu Shushane,* ebiya bana dikumi ba Hamane bayeyekwa.

15 Bayuda ba mu Shushane* bebunga monka mu difuku dya 14 dya kweji wa Adala,+ baipaya bantu 300 mu Shushane,* ino kebayetepo kitūtwa nansha kimo.

16 Bayuda bakwabo ba mu matanda a bubikavu* a mulopwe nabo bebunga ne kulwila būmi bwabo.+ Bafundula balwana nabo,+ baipaya bantu 75 000 mu boba badi bebashikilwe; ino kebayetepo kitūtwa nansha kimo. 17 Bino byalongekele mu difuku dya 13 dya kweji wa Adala, kadi bakōkolokwa mu difuku dya 14, beditūla ke difuku dya masobo ne dya kusangala.

18 Bayuda ba mu Shushane* bebunga mu difuku dya 13+ ne mu difuku dya 14,+ kupwa bakōkolokwa mu difuku dya 15, beditūla ke difuku dya masobo ne dya kusangala. 19 O mwanda Bayuda ba kunja bekalanga mu bibundi bya bipindi bya ntanda bya kulampe batūdile difuku dya 14 dya kweji wa Adala ke difuku dya kusangala ne dya masobo,+ difuku dya fetyi, ne kitatyi kya kwitumina byakudya.+

20 Modekai+ walemba ino myanda ne kutumina Bayuda bonso mikanda mu matanda a bubikavu* a Mulopwe Ahaswelusa, a pabwipi ne a kulampe mene. 21 Webalombola balame difuku dya 14 dya kweji wa Adala, ne difuku dya 15, mwaka ne mwaka, 22 mwanda i mu mene mafuku’a mwakōkolokelwe Bayuda ku balwana nabo kadi i mu mwine kweji’wa mwaalamukile njia yabo ke nsangaji, madilo abo+ nao ke difuku dya masobo. Badi bafwaninwe kwialama bu mafuku a masobo ne a kusangala ne bu kitatyi kya kwitumina byakudya ne kya kupa balanda byabuntu.

23 Kadi Bayuda baitabija kwendelela na masobo obashilwile ne kulonga byebalembēle Modekai. 24 Mwanda Hamane+ mwanā Hamedata mwine Akaka,+ walwana na Bayuda bonso, wakutyīle Bayuda nkuku ya kwibonakanya,+ kadi watele Pule,+ ko kunena’mba Bubale, mwanda wa kwibazakaja ne kwibonakanya. 25 Ino Eseta pa kutwela ku meso a mulopwe, nandi waleta mbila milembe+ amba: “Nkuku yandi mibi yawakutyīle Bayuda+ imwalukile pa mutwe wandi”; penepo bamuyeyeka aye ne bandi bana ku mutyi.+ 26 O mwanda baityile mene mafuku’a bu Pudimi, mwendele dijina dya Pule.*+ Penepo, pa mwanda wa byonso byadi bilembwe mu uno mukanda ne byobya byobamwene pa uno mwanda ne byebafikīle, 27 Bayuda bakwata butyibi abo ne lutundu lwabo ne bonso badi belunga kobadi,+ bwa kusoba nyeke ano mafuku abidi ne kufikidija byadi bilembēlwe ano mafuku pa kitatyi kitungwe mwaka ne mwaka. 28 Ano mafuku adi afwaninwe kuvulukwa ne kulamwa mu nkongo yonso, na kisaka ne kisaka, na ntanda ne ntanda ya bubikavu,* ne na kibundi ne kibundi; kadi ano mafuku a Pudimi keadipo afwaninwe kulekwa mu Bayuda, kivulukilo kyao nakyo kekyadipo kifwaninwe kufula mu lutundu lwabo.

29 Penepo Eseta Mukaja Mulopwe, mwanā Abihaile, ne Modekai Muyuda balemba na lupusa lonso mwanda wa kwitabija mukanda wa bubidi wisambila pa Pudimi. 30 Watuma mikanda ku Bayuda bonso ba mu matanda a bubikavu* 127,+ mu ntanda ya Ahaswelusa,+ na binenwa bya ndoe ne bya bubine 31 mwanda wa kwitabija kulama mafuku a Pudimi pa bitatyi byao bitungwe, monka mwebalombwedile Modekai Muyuda ne Eseta Mukaja Mulopwe amba balonge’kyo,+ ne mungya mobakwatyile butyibi* abo ne lutundu lwabo mwanda wa kufikidija’kyo,+ bashikilwa na nzala+ koku bazenza.+ 32 Kadi musoñanya wa Eseta waitabija ino myanda ya Pudimi,+ walembwa ne mu mukanda.