Bilongwa bya Mafuku wa Bubidi

17 Penepo wandi mwana Yehoshafata+ wabikala pa kyandi kyaba, kadi waningisha lupusa lwandi pa Isalela. 2 Waimika bibumbo bya basola mu bibundi byonso bikomejibwe bya Yuda, watūla ne bibumbo bya basola mu ntanda ya Yuda ne mu bibundi bya Efelaimi byakwete shandi Asa.+ 3 Yehova wadi nyeke na Yehoshafata mwanda wadi unangila mu mashinda a kala a mukulutuba wandi Davida+ kadi kakimbilepo Babāla. 4 Mwanda wakimbile Leza wa shandi+ ne kulonda* mbila yandi, ino kalondelepo bilongwa bya Isalela.+ 5 Yehova wadi ukomeja’nka kukomeja pototo bulopwe mu kuboko kwandi;+ kadi Yuda ense wadi uletela nyeke Yehoshafata byabuntu, nandi waikele na bupeta buvule ne ntumbo mikatampe.+ 6 Mutyima wandi wakankamene mu mashinda a Yehova, wafundula’nka ne mitenta+ ne bipanda bikola*+ mu Yuda.

7 Mu mwaka wa busatu wa bulopwe bwandi waityija bamfumu bandi, Bene-Haila, Obadia, Zekadia, Netanele, ne Mikaya, amba bakafundije mu bibundi bya Yuda. 8 Badi ne na bene Levi: Shemaia, Netania, Zebadia, Asahele, Shemilamote, Yehonafane, Adoniya, Tobiya, ne Tobe-Adoniya, pamo ne babitobo, ba Edishama ne Yeholama.+ 9 Bashilula kufundija mu Yuda, basela ne mukanda wa Bijila bya Yehova,+ bapita mu bibundi byonso bya Yuda bafundija mu bantu.

10 Penepo kityino kya Yehova kyaponena malopwe onso a matanda ajokolokele Yuda, kadi kebalwilepo na Yehoshafata. 11 Kadi bene Fidishitia balambula Yehoshafata mulambu wa byabuntu ne lupeto. Balabu nabo bamuletela mikōko milume 7 700 ne bambuji balume 7 700 ba mu luombe lwabo.

12 Yehoshafata wadi wenda wikala mukatampe bya mwiko,+ waendelela kūbaka bifuko bikomejibwe+ ne bibundi bya bibīko+ mu Yuda. 13 Waingile mwingilo mukatampe bininge mu bibundi bya Yuda, kadi wadi na basola, ba bulwi bakomokomo mu Yelusalema. 14 Bano’ba bo baabanibwe mu bisumpi bya mobo a bashabo: kwa Yuda bakata ba tununu, mukata Adenahe, wadi na ba bulwi bakomokomo 300 000.+ 15 Mu lupusa lwandi mwadi mukata Yehohanana, wadi na bantu 280 000. 16 Mu lupusa lwandi mwadi ne Amashia mwanā Zikidi, wadi mwipāne na mutyima tō mu mwingilo wa Yehova, kadi wadi na ba bulwi bakomokomo 200 000. 17 Ino kwa Benjemani+ i Ediada, wa bulwi mukomokomo, kadi wadi pamo na bana-balume 200 000 belumbile buta bwa miketo ne ngabo.+ 18 Mu lupusa lwandi mwadi Yehozabada, kadi wadi na bana-balume 180 000 belumbile mwanda wa bulwi. 19 Bano’ba bo badi bengidila mulopwe kutentekela pa boba batūdilwe na mulopwe mu bibundi bikomejibwe bya mu Yuda ense.+