Bene Kodinda Umbajinji

9 Le nkidipo mwanapabo? Le nkidipo mutumibwa? Le nkyamwenepo Yesu Mfumwetu?+ Le mingilo yami mudi Mfumwetu ke banwepo? 2 Nansha shi nkidipo mutumibwa ku bakwabo, ku banwe’ko na bubine ami ne mutumibwa! Mwanda banwe mwi kiyukeno kilombola butumibwa bwami mudi Mfumwetu.

3 Ku boba bamandaula neshintulwila uno muswelo: 4 Mwene tudi na lupusa lwa kudya ne kutoma? 5 Mwene tudi na lupusa lwa kwenda pamo na mukaji mwitabije,*+ bwa batumibwa bakwabo ne banababo+ na Mfumwetu ne Kefasa?*+ 6 Nansha le i enka Banabasa+ ne amiwa bo kebadipo na lupusa lwa kuleka kwingila kaji ka kwitukwasha mu būmi? 7 Le kashā i sola’ka wingilanga na lupeto lwa aye mwine? Le i ani le ukunanga budimi bwa mañanza ne kudya bipa byabo mpika?+ Nansha i ani le ukumbanga luombe ino kutoma mabele a luombe’lwa mpika?

8 Lelo nenanga bino bintu na milangwe ya bu muntu? Le Bijila nabyo kebinenangapo bino bintu? 9 Mwanda mu Bijila bya Mosesa mulembelwe amba: “Kokakuta ñombe lukano ku kanwa papūla miseke.”+ Lelo i bañombe bobatele mutyima kudi Leza’ni? 10 Nansha na bubine unenanga bino’bi pa mwanda wa batwe? Na bubine byālembelwe pa mwanda wetu, mwanda muntu udima ne yewa upūla bengilanga koku bakulupile kupebwa’ko.

11 Shi twakunine mu bukata mwenu bintu bya ku mushipiditu, le i mwanda mukatampe shi netu twaangula komudi bintu bya kwitukwasha ku ngitu?+ 12 Shi bantu bakwabo badi na luno lupusa pomudi, mwene batwe bo bene badi nalo kutabuka? Inoko, ketwaingidijepo luno lupusa,+ ino tūmininanga bintu byonso, kutyina’mba twakakalakanya myanda miyampe ya Kidishitu mu muswelo kampanda.+ 13 Le kemuyukilepo amba bantu bengilanga mingilo ikola badyanga bintu bya ku tempelo, ne amba boba bengila mafuku onso ku kisōkelo batambulanga ku bya ku kisōkelo?+ 14 Mu uno muswelo namo, Mfumwetu wasoñenye amba boba basapula myanda miyampe bafwaninwe kudīla mu myanda miyampe.+

15 Ino nkyaingidijepo nansha dimo ino mpangiko’i.+ I bine, nkilembelepo bino bintu amba munongele’byo, mwanda i kipite buya kufwa kupita’ko muntu kufundula bubinga bwami bwa kwitumbijija!+ 16 Pano shi nsapulanga myanda miyampe, ke bubingapo bwa ami kwitumbija, mwanda i kintu kyomfwaninwe’nka kulonga. Yō, malwa ami shi nkisapwilepo myanda miyampe!+ 17 Shi nonge’kyo na mutyima tō, nsa kupalwa mpalo; ino nansha shi nonge’kyo na mutyima fututu, ngidi na mwingilo wa bukalama umpelwe.+ 18 Penepo le mpalo yami i mpalo’ka? Amba ponsapula myanda miyampe, mpāne myanda miyampe ku bitupu, kutyina kwingidija lupusa lwami bibi mu myanda miyampe.

19 Mwanda nansha byondi mwanapabo ku bantu bonso, nelonga ami mwine kendi umpika wa bonso, amba mwene’mo bantu bavule bene. 20 Ku Bayuda naikala pamo bwa Muyuda, amba mwene’mo Bayuda;+ ku boba badi mu bijila naikala bwa ami udi mu bijila, nansha ami mwine byonkidipo mu bijila, amba mwene’mo boba badi mu bijila.+ 21 Ku boba bampikwa bijila naikala bwa wampikwa bijila, nansha ami mwine byonkidipo wampikwa bijila kudi Leza ino ngidi mu bijila kudi Kidishitu,+ amba mwene’mo boba bampikwa bijila. 22 Ku bakōkekōke naikala mukōkekōke,+ amba mwene’mo bakōkekōke. Naikala bintu byonso ku bantu ba miswelo yonso, amba mone kupandija’mo bamo mu miswelo yonso. 23 Ino ami noñanga bintu byonso pa mwanda wa myanda miyampe, amba nsapule’yo na bantu bakwabo.+

24 Le kemuyukilepo amba boba banyema lubilo banyemanga abo bonso, ino umo kete ye upalwanga mpalo? Nyemai lubilo mu muswelo omukokeja kupalwa mpalo.+ 25 Inoko muntu ense ukaya makayo a kwitāka* wīfulanga mu bintu byonso. I bine, betākanga mwanda wa kutambula kilukwa kibwanya koneka,+ ino batwe i kyokya kekibwanyapo koneka.+ 26 Nanshi muswelo onyema lubilo ke wa kinyemenyemepo;+ muswelo ongela bikoni ke wa kukupilapo luvula; 27 ino nkupilanga* umbidi wami+ ne kwiumuna bupika, kutyina’mba pa kupwa kusapwila bakwabo, ami mwine nakapelwa* mu muswelo kampanda.