Yoshua

24 Kupwa Yoshua wakongakenya pamo bisaka byonso bya Isalela ku Shekema, waityija bakulumpe ba Isalela, mitwe yandi, batyibi bandi, ne bemaniji bandi,+ baimana ku meso a Leza wa bine. 2 Yoshua wanena bantu bonso amba: “Yehova Leza wa Isalela wanena namino amba, ‘Bakulutuba benu+ bashikete bobwa bukila bwa Munonga* pano kepadi myaka mivule+—Tela, shandya Abalahama ne shandya Nahola—kadi baingidile baleza bakwabo.+

3 “‘Mwenda mafuku nasela mukulutuba wenu Abalahama+ bobwa bukila bwa Munonga* namunangija mu ntanda yonso ya Kenani, navudija ne lutundu* lwandi.+ Namupa Izake;+ 4 kupwa napa Izake ba Yakoba ne Esau.+ Mwenda mafuku napa Esau lūlu lwa Seila ke lwandi;+ ino Yakoba ne bandi bana batūkila mu Edipito.+ 5 Kadi natuma ba Mosesa ne Alone,+ namwesha Edipito malwa na byobya byonalongele mu bukata mwabo,+ ebiya nemutambija’mo. 6 Ponadi ntambija bashenu mu Edipito+ ne pomwafikile ku dijiba, bene Edipito badi balonda bashenu lubilo na makalo a bulwi ne basola ba pa tubalwe kutūla ne ku Dijiba Dityila.+ 7 Bashilula kudidila Yehova,+ nandi watūla mfindi pa bukata bwenu ne bene Edipito, webaletela dijiba dyebapūta,+ kadi meso enu emwenine byonalongele mu Edipito.+ Kupwa mwaikala mu ntanda mutuputupu myaka mivule.*+

8 “‘Kadi nemuletele mu ntanda ya bene Amole badi bashikata bobwa bukila* bwa Yodano, nabo balwa nenu.+ Ino nebapēne mu kuboko kwenu amba muyate ntanda yabo ke yenu, nebatukija fututu ku meso enu.+ 9 Kupwa Balake mwanā Zipole, mulopwe wa Moabu, wakanda kulwa na Isalela. Ebiya waityija Balame mwanā Beole kwimufinga mafingo.+ 10 Ino nkyaivwenepo Balame.+ O mwanda mwine wemwesele divule dine,+ nemukūla mu makasa andi.+

11 “‘Kupwa mwaabuka Yodano+ mwafika ku Yediko.+ Ebiya baledi* ba Yediko, bene Amole, bene Pedizi, bene Kenani, bene Hiti, bene Ngilangashi, bene Hivi, ne bene Yebushi balwa nenu, ino nebapāna mu kuboko kwenu.+ 12 Penepa natuma luzakalo* kumeso kwenu, nalo lwebanyemeja ku meso enu+—balopwe babidi ba bene Amole. Ino ke na kipete kyenupo nansha na buta bwenu bwa miketo.+ 13 Enka nenki nemupa ntanda yokemwasusukīlepo ne bibundi byokemwaubakilepo+ mwashikata’mo. Mudyanga madimi a mañanza ne bitongo bya impafu byokemwakuninepo.’+

14 “Shi ke pano tyinai Yehova, mwingidilei na bululame* ne kikōkeji,*+ talulai baleza baingidile bakulutuba benu bobwa bukila bwa Munonga* ne mu Edipito,+ kadi ingidilai Yehova. 15 Ino shi mumona’mba i bibi kwingidila Yehova, tongai banwe bene dyalelo mwine omukengidila,+ shi i baleza baingidile bakulutuba benu bobwa bukila bwa Munonga*+ nansha baleza ba bene Amole ba mu ntanda yomushikete’mo.+ Ino ami ne ba mu njibo yami, tukengidilanga Yehova.”

16 Pa kino bantu bamulondolola’mba: “Ketubwanyapo kuleka Yehova ketwingidila’ko baleza bakwabo. 17 I Yehova Leza wetu wetutambije batwe ne batata mu ntanda ya Edipito,+ mu njibo ya bupika,+ kadi ye walongele bino biyukeno bikatampe ku meso etu,+ ye wadi witulama mu dishinda monso motwapityile ne mu bantu bonso motwadi tupita.+ 18 Yehova wapingile bantu bonso, ne bene Amole bene badi bashikete mu ntanda kumeso kwetu. O mwanda netu tusa kwingidila Yehova mwanda i Leza wetu.”

19 Penepa Yoshua wanena bantu amba: “Kemubwanyapo kwingidila Yehova mwanda aye i Leza ujila;+ i Leza usakanga kulamatwa bunka.+ Kakemulekelapo bilubo* byenu ne bubi bwenu bwine.+ 20 Shi muleke Yehova kemwingidila’ko baleza ba kungi, nandi ukemwalamukila ne kwimukubija pa kupwa kwimulongela biyampe.”+

21 Ino bantu batentulula Yoshua amba: “Mhm, batwe tusa kwingidila Yehova!”+ 22 Ebiya Yoshua wanena bantu amba: “Mwi batumoni beponeja banwe bene mungya momwasakila banwe bene, mubatonge banwe bene kwingidila Yehova.”+ Nabo banena’mba: “Twi batumoni.”

23 “Shi ke pano talulai baleza ba kungi badi mu bukata mwenu, lēmenejai mityima yenu kudi Yehova Leza wa Isalela.” 24 Bantu batentulula Yoshua amba: “Tusa kwingidila Yehova Leza wetu, kadi tusa kukōkela diwi dyandi!”

25 Ebiya Yoshua wasamba kipwano na bantu mu dine difuku’dya, webatūdila’ko musoñanya ne kijila mu Shekema. 26 Kupwa Yoshua walemba bino binenwa mu mukanda wa Bijila bya Leza,+ watekuna ne dibwe dikatampe+ weditenteka’po, munshi mwa mutyi mukatampe udi dya ku kipandulwe kya Yehova.

27 Yoshua wanena bantu bonso amba: “Talai! Dino dibwe dikekala bu kamoni ka kwituponeja,+ mwanda dibaivwana byonso byetulombola Yehova, kadi dikekala bu kamoni ka kwimuponeja, kutyina’mba mwakatuna Leza wenu.” 28 Ponkapo Yoshua wanena bantu bende, muntu ne muntu ku bupyani bwandi.+

29 Bino bintu pa kupita, Yoshua mwanā Nuna, mwingidi wa Yehova, wafwa na myaka 110.+ 30 Penepa bamujīka mu ntanda ya bupyani bwandi mu Timinate-Sela,+ kibundi kidi mu ntanda ya ngulu ya Efelaimi, kungala kwa Lūlu lwa Ngashi. 31 Isalela waingidile nyeke Yehova mafuku onso adi’ko Yoshua ne mafuku onso adi’ko bakulumpe bashele bōmi kupwa kwa Yoshua, boba badi bayukile bilongwa byonso byobalongēle Isalela kudi Yehova.+

32 Mikupa ya Yosefa+ yaselelwe na bene Isalela mu Edipito, yajīkilwe mu Shekema mu kipindi kya budimi kyāpotele Yakoba kudi bana ba Hamola,+ shandya Shekema, ku bibese 100 bya lupeto;+ kadi kyaikele ke bupyani bwa bana ba Yosefa.+

33 Ebiya Eleaza mwanā Alone nandi wafwa.+ Penepa bamujīka mu Mukuna wa Finease wandi mwana,+ mukuna wamupelwe mu ntanda ya ngulu ya Efelaimi.