Samwele Umbajinji

17 Ebiya bene Fidishitia+ bakongakanya bibumbo* byabo bya bulwi mwanda wa kulwa. Bebungila ku Soko+ wa Yuda, batūla nkambi pa bukata bwa Soko ne Azeka,+ mu Efese-Damina.+ 2 Solo ne bana-balume ba Isalela nabo bekongakanya batūla nkambi mu Musanza* wa Elā,+ bepanga mu milongo ya bulwi mwanda wa kwitana na bene Fidishitia. 3 Bene Fidishitia badi mutamba umo wa lūlu, bene Isalela nabo mutamba mukwabo wa lūlu, musanza wadi pa bukata bwabo.

4 Kupwa mu mankambi a bene Fidishitia mwatamba kalala umo witwa bu Ngodiata+ wa mu Ngata,+ bula bwandi bwadi bwa maboko asamba ne dikasa dimo.* 5 Wadi na kilama-mutwe kya mukuba ku mutwe wandi, kadi wadi uvwele kotyi wa byuma wa mabamba metentame. Bulēmi bwa kotyi wa byuma+ bya mukuba bwadi bwa mashekele 5 000.* 6 Wadi na bilama maulu bya mukuba ku maulu andi ne musungu+ wa mukuba mukobeke pa bukata bwa bipuji byandi. 7 Lupumba* lwa wandi mukobe lwadi pamo bwa mutyi wa basukanga bisandi,+ kadi bui bwa kyuma kya mukobe wandi bwadi na bulēmi bwa mashekele 600;* ne umuselelanga ngabo wadi wenda kumeso kwandi. 8 Kupwa Ngodiata waimana kaite mulongo wa bulwi wa Isalela+ kaebanena’mba: “Le kyomwaila ku milongo ya bulwi i kika? Mwene ami ne mwine Fidishitia, banwe nenu mwene mwi bengidi ba Solo? Mwitongelei muntu umo āye atūkile kondi. 9 Shi wabwanya kulwa nami ne kungipaya, nabya tukekala bengidi benu. Ino shi ami namunekenya ne kumwipaya, nankyo banwe mukekala bengidi betu ba kwitwingidila.” 10 Penepo mwine Fidishitia wanena’mba: “Nakolomona* mulongo wa bulwi wa Isalela+ dyalelo’di. Mpei muntu, tulwe!”

11 Solo ne Isalela ense pa kwivwana bino binenwa bya mwine Fidishitia, batuyuka ne kukwatwa moyo bininge.

12 Ino Davida wadi mwanā mwine Efelata+ wa ku Betelema+ wa Yuda witwa bu Yese,+ wadi na bana bana-balume mwānda+ kadi mu mafuku a Solo wadi kala ke mununu. 13 Bana basatu bakulu ba Yese balondele Solo ku divita.+ Majina a bana bandi basatu baendele ku divita i Ediabu+ mwana umbedi, wandi mwana wa bubidi i Abinadaba,+ ne wa busatu i Shamaha.+ 14 Davida ye wadi nkasampe pa bonso,+ kadi bana basatu bakulu balondele Solo.

15 Davida wadi wenda kudi Solo ujoka kukalama mikōko+ ya shandi ku Betelema. 16 Mu kine kitatyi’kya, mwine Fidishitia’wa wadi wiya wimana lubanga lonso ne kyolwa kyonso mu mafuku 40.

17 Kupwa Yese wanena wandi mwana Davida amba: “Nakwisāshila, sela ino Efa* ya miseke mikange ne ino mikate dikumi uselele’byo bukidi banabenu ku nkambi. 18 Ino selela mukata wa kanunu bino bipindi dikumi bya mukama wa mabele;* kadi ufwaninwe kukimba kuyuka mubūkile banabenu, ulete ne kiyukeno kilombola’mba i bakomo.” 19 Badi pamo na Solo ne bana-balume bakwabo bonso ba Isalela mu Musanza* wa Elā,+ balwa na bene Fidishitia.+

20 Penepo Davida wabūka lubanga futwi washīla muntu umo mikōko; kupwa watekuna bintu waenda monka mwamusoñaninye Yese. Aye pa kufika mu bukata mwa nkambi, kibumbo kya divita kyadi kitamba kyenda ku mulongo wa bulwi, koku kitūta kyungwe kya bulwi. 21 Isalela ne bene Fidishitia betunga mu mulongo wa bulwi, mulongo umo witadidile na mulongo mukwabo wa bulwi. 22 Davida washiya ponka na ponka bintu kudi muntu ulamanga bintu wanyemena ku mulongo wa bulwi. Aye pa kufika washilula kwipangula mubūkile banababo.+

23 Paadi ukīsamba nabo, wamona kalala witwa bu Ngodiata,+ mwine Fidishitia wa ku Ngata wiya. Wadi utamba ku mulongo wa bulwi wa bene Fidishitia, kanena binenwa bimo byonka na byaanenene dibajinji,+ Davida nandi wamwivwana. 24 Bana-balume bonso ba Isalela pa kumona uno muntu, bamunyema koku batuyuke.+ 25 Bana-balume ba Isalela badi banena’mba: “Le mubamone muntu wiya’u? Waiya mwanda wa kukolomona* Isalela.+ Mulopwe ukapa muntu ense ukepaya uno muntu bupeta buvule, kadi ukamupa ne wandi mwana mwana-mukaji,+ ne kulekela njibo ya shandi bintu bivule mu Isalela.”

26 Davida washilula kwipangula bana-balume badi bemene kubwipi nandi amba: “Le i bika bikalongelwa muntu ukepaya uno mwine Fidishitia ne kutalula mutonko pa Isalela? Ke-pantu uno mwine Fidishitia wa kubulwa kutwejibwa kwisao i ani le amba akolomone* mulongo wa bulwi wa Leza mūmi?”+ 27 Penepa bantu bamulombola bintu bimo byonka na dibajinji amba: “Bino byo bikalongelwa muntu ukamwipaya.” 28 Ediabu+ tutu wandi mukulu mu bonso pa kumwivwana wisamba na bana-balume, walobela Davida kanena’mba: “Kyowatūkila kuno i kika? Le i ani owashila mikōko mityetye’ya mu ntanda mutuputupu?+ Ndyukile biyampe ditatu dyobe* ne kukanina kubi kwa obe mutyima; ubatūkila kuno mwanda’tu wa kutala bulwi.” 29 Davida nandi watentulula’mba: “Le penepo i kika kyonalonga? Nadi’tu ngipangula kipangujo!” 30 Ebiya wamwela nyuma waalamukila kudi muntu mukwabo kaipangula bintu bimo byonka na dibajinji,+ bantu nabo bamulondolola muswelo umo onka na dibajinji.+

31 Binenwa byanenene Davida byaivwanwa bininge kadi basapwila’byo ne Solo. Penepa wamwityija. 32 Davida wanena Solo amba: “Muntu nansha umo kakityumukwa mutyima* pa mwanda wandi. Mwingidi obe usa kukalwa na uno mwine Fidishitia.”+ 33 Ino Solo watentulula Davida amba: “Kukokejapo kukalwa na uno mwine Fidishitia, mwanda abe ukidi’tu mwanuke,+ ino aye i sola* tamba bwanuke bwandi.” 34 Ebiya Davida wanena Solo amba: “Mwingidi obe wadi mukumbi wa luombe lwa shandi, ino ntambo+ waiya, kupwa ke uluse, abo bonso bakwata mukōko mu luombe. 35 Natambile namulonda namukupila, nakūla mukōko mu kyakanwa kyandi. Kitatyi kyawaimene kuntumbukila, namukwete ku maenze* namukupila namwipaya. 36 Mwingidi obe waipaile ba ntambo ne uluse, ne uno mwine Fidishitia wa kubulwa kutwejibwa kwisao ukekala pamo bwa umo wa pa abo, mwanda wakolomona* milongo ya bulwi ya Leza mūmi.”+ 37 Kupwa Davida wabweja’ko amba: “Yehova mwine waunkūdile mu māla a ntambo ne a uluse, ye aye usa kunkūla ku kuboko kwa uno mwine Fidishitia.”+ Ponkapo Solo watentulula Davida amba: “Enda, Yehova ekale nobe.”

38 Penepo Solo wavwika Davida bivwalwa byandi. Watūla kilama-mutwe kya mukuba pa mutwe wandi, kupwa wamuvwika kotyi wa byuma. 39 Kupwa Davida wesomeka kipete kyandi pangala pa bivwalwa byandi, watompa kwenda ino kabwenyepo, mwanda kadipo wibibidile. Davida wanena Solo amba: “Nkibwanyapo kwenda na bino bintu, mwanda nkibibidilepo.” Ebiya Davida webivūla. 40 Penepo wasela mukombo mu kuboko kwandi watonga mabwe atano masenene biyampe mu kyalo kya munonga* weela munda mwa kafuko kandi ka bu mukumbi, kadi topito+ yadi mu kuboko kwandi. Penepa washilula kufwena mwine Fidishitia.

41 Mwine Fidishitia wadi ufwena’nka kufwena Davida, ne umuselelanga ngabo wadi kumeso kwandi. 42 Mwine Fidishitia amba atale wamona Davida, wamushinanana bya kibengo mwanda wadi’tu mwanuke wa ngitu ityila kadi muyampe mpala.+ 43 Ebiya mwine Fidishitia wanena Davida amba: “Le ami ne mbwa+ oila na mityi?” Penepo mwine Fidishitia wafinga Davida mu dijina dya baleza bandi. 44 Mwine Fidishitia wanena Davida amba: “Abe iya’tu kondi nsa kupāna mwita obe ku byoni bya mūlu ne ku banyema ba ntanda.”

45 Davida watentulula mwine Fidishitia amba: “Abe wiyanga kulwa nami na kipete ne mukobe ne musungu,+ ino ami ngiyanga kulwa nobe mu dijina dya Yehova wa bibumbo,+ Leza wa mulongo wa bulwi wa Isalela, mwine owakolomona.*+ 46 Mu dino difuku’di Yehova usa kukupāna mu kuboko kwami,+ nami nsa kukwipaya nkukete ne mutwe, kadi’nka mu dino difuku nsa kupāna imbidi mifwe ya nkambi ya bene Fidishitia ku byoni bya mūlu ne ku banyema ba ntanda ba budyani ba pano panshi; kadi bantu ba ntanda yonso bakayuka’mba kudi Leza mu Isalela.+ 47 Kadi bonso bebungile pano* basa kuyuka amba Yehova kapandijangapo na kipete nansha na musungu,+ mwanda bulwi i bwa Yehova,+ usa kwimupāna banwe bonso mu makasa etu.”+

48 Ponkapo mwine Fidishitia waimana kafwena bityebitye kusambakana Davida, Davida nandi wanyemena lubilo ku mulongo wa bulwi mwanda wa kusambakana mwine Fidishitia. 49 Davida waela kuboko mu kafuko wayata’mo dibwe wedyela na topito. Waasa mwine Fidishitia pa mpala, kadi dibwe dyamutwela pa mpala, wapona bukuvumane pa nshi.+ 50 Ebiya Davida wanekenya mwine Fidishitia na topito’tu ne dibwe dimo; wakupila mwine Fidishitia ne kumwipaya wamwipaya, nansha mu kuboko kwa Davida byokemwadipo kipete.+ 51 Davida wanyemena’ko lubilo waimana paadi. Kupwa watekuna kipete+ kya mwine Fidishitia wekitambija mu kikwa, wamuketa nakyo mutwe mwa kujingulwila’mba wafu. Bene Fidishitia pa kumona’mba nkomokomo wabo wafu, banyema lubilo.+

52 Ponkapo bana-balume ba Isalela ne ba Yuda baimana kebatūta kyungwe ne kulonda bene Fidishitia mu dishinda monso tamba ku musanza+ kufika ne ku bibelo bya Ekalone,+ bene Fidishitia batapilwe badi balēle mu dishinda tamba ku Shalaimi+ kutūla ne ku Ngata ne ku Ekalone. 53 Kupwa bene Isalela bajoka kobadi bakalondele na bukalabale bene Fidishitia, batūta mankambi abo.

54 Ebiya Davida wasela mutwe wa mwine Fidishitia weuleta ku Yelusalema, ino watūla byabulwi bya mwine Fidishitia mu pema wandi.+

55 Solo paamwene’tu Davida utamba kukasambakana mwine Fidishitia, waipangula Abinele+ mukata wa kibumbo kya divita amba: “A Abinele, le uno mwanuke+ i mwanā ani?” Abinele wamulondolola’mba: “A mulopwe, bine ne byodi mūmi,* nkiyukilepo!” 56 Penepo mulopwe wanena’mba: “Kimba uyuke shi uno nsongwalume i mwanā ani.” 57 Davida pa kujoka’tu kwaakepaile mwine Fidishitia, Abinele wamusela wamuleta ku meso a Solo koku ukwete mutwe wa mwine Fidishitia+ ku makasa. 58 Penepa Solo wamwipangula’mba: “A nkasampe, le wi mwanā ani?” Davida nandi wamulondolola’mba: “Ne mwanā mwingidi obe Yese+ mwine Betelema.”+