Bene Tesalonika wa Bubidi

1 Ami Polo ne Shivanusa* ne Temote,+ ku kipwilo kya bene Tesalonika badi umbumo na Leza Tata wetu ne Mfumwetu Yesu Kidishitu:

2 Kanye ka ku buntu bitupu ne ndoe bitamba kudi Leza Tata ne kudi Mfumwetu Yesu Kidishitu bikale nenu.

3 Tufwaninwe kufwija’ko Leza mafuku onso pa mwanda wenu, banwe banabetu. Kino i kyendele’mo, mwanda lwitabijo lwenu lwendanga lutamina’ko bininge kadi buswe bomwisenswe banwe bonso umo ne umo bwendanga buvula.+ 4 O mwanda twimwitembanga+ mu bipwilo bya Leza pa mwanda wa kūminina ne lwitabijo lwenu mu kupangwapangwa konso ne mu masusu* omususuka.*+ 5 Bino’bi i bubinga bulombola butyibi boloke bwa Leza, bilengeja mumonwe bu bantu bafwaninwe Bulopwe bwa Leza, bwine bomususukila.+

6 Mwanda na bubine kino i kyoloke kudi Leza kumwesha malwa boba bemumwesha malwa.+ 7 Ino banwe bamona malwa, mukapebwa kukōkolokwa pamo netu pa kusokolwa kwa Mfumwetu Yesu+ momwa mūlu pamo na bamwikeulu bandi bakomokomo+ 8 mu lubimbi lwa mudilo, palubwila kinongo boba kebayukilepo Leza ne boba kebakōkelepo myanda miyampe ya Mfumwetu Yesu.+ 9 Bano’ba bo bakapebwa mfuto ya konakanibwa kwa nyeke,+ kufundulwa ku meso a Mfumwetu ne ku ntumbo ya bukomo bwandi, 10 kitatyi kyaiya kutumbijibwa pa mwanda wa bajila bandi ne kutalwa koku batendela mu dyodya difuku mu bukata mwa boba bonso balombwele lwitabijo, mwanda bukamoni botwasapwile bwatambwilwe na lwitabijo mu bukata mwenu.

11 Pa kino twimulombelelanga mafuku onso, amba Leza emumone bu bantu bafwaninwe lwito+ lwandi kadi alonge na bukomo bwandi biyampe byonso bimusangaja aye ne mingilo yonso ya lwitabijo. 12 I mwanda wa dijina dya Mfumwetu Yesu ditumbijibwe momudi, kadi banwe nenu mu bumo nandi, mwendele kanye ka ku buntu bitupu ka Leza wetu ne ka Mfumwetu Yesu Kidishitu.