Shapita 14

Bana-Babwanga Babajinji ba Yesu

YESU pa kupwa kulāla mafuku 40 mu ntanda mutuputupu, wajokela kudi Yoano wamubatyije. Aye pa kufwena, Yoano wamufunka, kasapwila bano badi nandi pamo amba: ‘Ee! Talai! Mwana mukōko wa Leza wa kutekuna bubi bwa ntanda. I aye uno onanene amba: Kunyuma kwami kukanonda muntu untabukile ami, mwanda aye wadi’ko ne ku ngalwilo, ne ami mwine nkyaikele’ko.’ Nansha Yoano byadi mukulu kupita mwanabo Yesu, ino uyukile amba Yesu wādi’ko kala bu mushipiditu momwa mūlu ne aye mwine kaikele’ko.

Ino, kupwa kwa mayenga matyetye, tamba difuku dyaile Yesu amba abatyijibwe, bimweka bu Yoano kajingulwile binebine amba Yesu ye aye Meshiasa. “Nkyadipo muyukile amba i aye,” ye Yoano unena, “ino naiya kubatija mu mema mwanda wa kumuyukanya ku muzo wa Isalela.” (MB)

Yoano wendelela na kuyukija bemvwaniki bandi myanda yaamwene paadi ubatyija Yesu amba: “Namwene [m]ushipiditu utūka mūlu bwa nkunda, wamutumba pādi. Ino ami nkyamuyūkilepo kala, ehe. Nanshi wantumine kubatyijija mu mema uno aye waundaīle’mba: Ku o wakamona [m]ushipiditu utūka ne kumutumba pādi, nabya e yenka’ye wakubatyijija mu [m]ushipiditu [s]andu. Ami kumona namone ne kusapula kadi nasapula’mba: Uno ye aye Mwan[ā] Leza’wa.”

Difuku dilonda’po, Yoano waiya kaimene na bandi bana-babwanga babidi. Kadi, Yesu pa kufwena, aye amba: “A! monaipo Mwana-mukōko wa Leza.” Bano babidi ba mu bana-babwanga ba Yoano Mubatyiji pa kwivwana’bo nabya, kebalonda Yesu. Umo umbukata mwabo i Andele, mukwabo i uno mwine usekunwine ino myanda, utelwa dya bu Yoano. Bimweka bu uno Yoano nandi i mwanabo na Yesu, mwanā Salome, mwanabo na Madia.

Yesu pa kuvundamuka, wamone ba Andele ne Yoano bamulonda, webepangula: “Lelo kyo musaka i kika?”

Nabo abamwipangula’mba: “Labi! Le wikalanga pi?”

Yesu webalondolola’mba: “Iyai mukamone.”

Dyuba kedilumba ku nsaa ya buná ya kyolwa, ba Andele ne Yoano abashikata pamo na Yesu lonso mu dino difuku. Andele udi na nsangaji mikatampe, wanyemena lubilo kudi mwanabo, witwa dya bu Petelo. Wamusapwila’mba: “Bātwe tubamone Meshiasa.” Waleta Petelo kudi Yesu. Padi Yoano nandi wakasapwila mwanabo Yakoba ne kumuleta kudi Yesu; ino, mungya mwikadila wa Yoano, i muleke kusoneka mu yandi Evanjile ino myanda imutala.

Bubaki lubanga, Yesu watana Fidipa mwine Beseda, mu kibundi kya ba Andele ne Petelo. Wamwite amba: “Nondepo.”

Fidipa nandi watana Natanela utelwa monka dya bu Batolomyu wamusapwila’mba: “Tubamutāna yewa usonekele Mosesa mu mukanda-wabijila, ne mu bapolofeto, Yesu wa Nazala, mwana Yosefa.” Natanela waalakana’po. Waipangula’mba: “Lelo kilumbuluke kitambile ku Nazala’ni?”

Fidipa wamwite, amba: “Iya nanshi umone.” Abafika kubwipi na Yesu, Yesu wasapwila Natanela amba: “Talaipo ku mwine Isalela mulumbuluke wampikwa budyumuke.”

Natanela wamwipangula. “Lelo wandyūkile kwepi?”

Yesu wamutentulula’mba: “Po wakidi, ne Fidipa mwine kakakwityile, nakumwene kala wikele munshi mwa kikuyu.”

Natanela wabezemuka. Kanena’mba: ‘Labi [ko kunena’mba Mufundiji], abe’wa wi Mwanā Leza, wi Mulopwe wa Isalela.’

Yesu wamwipangula’mba: “Ke mwanda o nakunena’mba: Nakumwene kala munshi mwa kikuyu; ke ko kwitabija kowaitabijako, a? Nanshi ukamonangako bingi byakutabuka bino’bi bukatampe.” Kupwa wamulaya’mba: “I binebine byo nakunena’mba: Mukamonangapo diulu dyajikuka ne kujikuka, ne bamwikeulu ba Leza ponka, aku bakanda, aku batūka, pa Mwanā muntu.”

Kinondanonda kyonka, Yesu, pamo ne bandi bana-babwanga bapya badi nabo, abataluka mu Musanza wa Yodano kebenda ku Ngadilea. Yoano 1:29-51.

▪ Bana-babwanga babajinji ba Yesu i bāni na bāni?

▪ Petelo, padi ne Yakoba mwine, batwelwe namani kudi Yesu?

▪ I kika kyakulupija Natanela amba Yesu i Mwanā Leza?