Kifundwa 3

Lelo Yesu Kidishitu I Ani?

Mwanda waka Yesu utelwanga bu Mwana “umbedi” wa Leza? (1)

Mwanda waka utelwanga bu “Mwanda”? (1)

I bika byāidile Yesu pano pa ntanda bu muntu? (2-4)

Mwanda waka wādi ulonga bingelengele? (5)

I bika bisa kulonga Yesu panopano ponka? (6)

1. Yesu wādi wikele mūlu bu muntu wa ku mushipiditu kumeso kwa kwiya’ye pano pa ntanda. Ye kipangwa kya Leza kibajinji, o mwanda utelwanga bu Mwana “umbedi” wa Leza. (Kolose 1:15; Kusokwelwa 3:14) Yesu ye Mwana umo kete wāpangilwe na Leza kasuku kandi. Yehova wāingidije Yesu bu “sendwe mwine mukata” pa kupanga bintu bikwabo byonso bya mūlu ne bya pano panshi, kumeso kwa Yesu kwiya’ye pano pa ntanda. (Nkindi 8:22-31; Kolose 1:16, 17) Kadi Leza wāmwingidije bu Wandi musedi wa myanda mwine mukatampe. O mwanda Yesu utelwanga bu “Mwanda.”​—Yoano 1:1-3; Kusokwelwa 19:13.

2. Leza wātumine Wandi Mwana pano pa ntanda na kutundulwila būmi bwandi mu difu dya Madia. Ko kunena amba Yesu kādipo na shandi wa ku mashi. O mwanda kāpyenepo kabubi nansha kamo nansha kubulwa kubwaninina. Leza wātumine Yesu pano pa ntanda mwanda wa buluji busatu: (1) Kwitufundija bubinebine bwa kuyuka Leza (Yoano 18:37), (2) kulama bululame bubwaninine, mwa kwitupēla kifwa kya kulondela’po (1 Petelo 2:21), ne (3) kupāna būmi bwandi bu kitapwa mwanda wa kwitunyongolola mu bubi ne mu lufu. Mwanda waka kino kyādi kisakibwa?​—Mateo 20:28.

3. Adama, muntu umbajinji, pa kubulwa kukōkela ku lubila lwa Leza, wālongele kyokya kitelwa na Bible bu “bubi.” Penepo Leza wāmutyibila nsambu ya lufu. (Ngalwilo 3:17-19) Kādipo ukibwanya nansha dimo kupetelwa pa misoñanya ya Leza, ko kunena amba kākidipo kadi mubwaninine. Wāshilula kununupa bityebitye ne kufwa wāfwa. Adama wāsambulwila bandi bana bonso bubi. O mwanda netu tununupanga, tubela, ne kufwa. I muswelo’ka wādi ukokeja kupandijibwa bantu?​—Loma 3:23; 5:12.

4. Yesu wādi muntu mubwaninine pamo bwa Adama. Inoko Yesu wādi mwishile na Adama, mwanda wādi na kikōkeji kibwaninine kudi Leza nansha ke mu matompo makatampe muswelo’ka. O mwanda wādi ukokeja kupāna būmi bwandi bwa bu muntu mubwaninine bu kitapwa kya kufuta pa mwanda wa bubi bwa Adama. Ye akyo kino kitelwa mu Bible bu “kikūlwa.” Enka namino, bana ba Adama bāshitwilwa kibelo kya kunyongololwa mu bupya​-mambo bwa lufu. Bonso bekala na lwitabijo mudi Yesu bakokeja kulekelwa bubi bwabo ne kupebwa būmi bwa nyeke.​—1 Temote 2:5, 6; Yoano 3:16; Loma 5:18, 19.

5. Kitatyi kyādi Yesu pano pa ntanda, wādi ubelula babela, udisha ba nzala, utalaja bimpumpu bya luvula. Usangula’nka ne bafwe. Mwanda waka wādi ulonga bingelengele? (1) Wādi wivwanina bantu lusa bādi basusuka, o mwanda wādi usaka kwibakwasha. (2) Bingelengele byandi i bilomboji byādi bilombola amba i Mwanā Leza. (3) Byālombola ne byakalongela bantu ba kikōkeji pakabikala bu Mulopwe pano pa ntanda.​—Mateo 14:14; Mako 2:10-12; Yoano 5:28, 29.

6. Yesu wāfwile, wāsangulwa na Leza bu kipangwa kya ku mushipiditu, kupwa wājokela mūlu. (1 Petelo 3:18) Ino shi ke pano, Leza i mumubikike bu Mulopwe. Panopano ponka, Yesu ukafundula bibi byonso ne masusu onso pano pa ntanda.​—Mitōto 37:9-11; Nkindi 2:21, 22.

[Bifwatulo pa paje 7]

Mwingilo wa Yesu wādi wa kufundija, kulonga bingelengele, ne kupāna’nka ne būmi bwandi bwine pa mwanda wetu