Kukankamika ne Kukomeja Bemvwaniki

BENGIDI ba Leza nansha shi batanwa na makambakano a muswelo’ka, bafwaninwe kukankamikwa mu kipwilo kya bwine Kidishitu. Pa kino, bakulumpe bo bene bafwaninwe kulonga bukomo mwanda wa mashikulu ne madingi abo bikale bikankamika. Bakulumpe bafwaninwe kwikala pamo “bwa kinyemeno kya luvula, ne mpakala ku kintenshi; pamo’nka bwa minonga ya mema muntu mūmu, bwa mwemba wa dibwe dikatakata muntanda myumu.”​—Is. 32:2.

Shi wi mukulumpe, le mashikulu obe atūkijanga mityima ne kusenga? Le aningishanga boba balonga bukomo bwa kwingidila Yehova na kikōkeji? Le apānanga bukankamane bwa kūminina mu kulonga kiswa-mutyima kya Leza nansha bantu bavule byobadi na bujundu ne kwitukankaja? Le shi bemvwaniki bobe bamo badi na njia, bekonda na bufudile, nansha balwa na misongo mikomo keidi mpwilo? Bine ukokeja ‘kukomeja banabenu na kyakanwa kyobe.’​—Yoba 16:5.

Ingidija mukenga ukupelwe wa bu muneni mwanda wa kukwasha banabenu bamone lukulupilo ne bukomo butamba kudi Yehova ne ku mpangiko yaitutūdile’ko.​—Loma 15:13; Ef. 6:10.

Wibavuluje Byobya Bilongele Yehova. Muswelo mukatampe wa kukankamika bantu i kulombola muswelo wākweshe Yehova bantu bādi mu makambakano pa kala.​—Loma 15:4.

Yehova wānene Mosesa ‘akankamike’ Yoshua ne “kumukomeja” kumeso kwa Isalela kutwela mu Ntanda ya Mulao, yādi ikibikelwe na mizo ya balwana. Le Mosesa wāmukomeje namani? Mosesa wāvulwije muzo onso mutuntulu, ne Yoshua ponka, bintu byēbalongēle Yehova pa kutamba mu Edipito. (Kup. 3:28; 7:18) Kadi Mosesa wāsekununa ne bushindañani bwēbapele Yehova pa bene Amole. Kupwa wākankamika Yoshua amba: “Wikomeje mutyima wikale mwimanije biyampe.” (Kup. 31:1-8) Nobe posakanga kukankamika banabenu, lelo wibakomejanga na kwibavuluja byobya ke bipwe kala kwibalongela Yehova?

Bantu bamo bekalanga batyintyidilwe na makambakano ebatala, uyuka kebeipangula shi bine bakamona madyese akaletwa na Bulopwe. Wibavuluje amba milao ya Yehova keibulwangapo kufikidila.​—Yos. 23:14.

Mu matanda amo banabetu balwanga na bijila bya imbikalo bikankaja mwingilo wa kusapula myanda miyampe. Mu ano matanda, bakulumpe ba buswe bakokeja kukwasha bakwabo betabije bamwene bukankamane mu byobya byātene batumibwa ba Yesu Kidishitu. (Bil. 4:1–5:42) Kadi kulombola patōka muswelo wāolwele Leza myanda isonekelwe mu mukanda wa Eseta kukapa banabetu bukankamane bwa binebine.

Kyaba kimo tumonanga bantu bamobamo bāya ku kupwila ino kwendelela’bo kumeso mpika. Bakokeja padi kwimona amba Leza kabwanyapo kwibalekela mwanda mwikadila wa būmi bwabo bwa pa kala wadi umbi mpata. Pano ukokeja kwibasekunwina byālongele Yehova na Mulopwe Manase. (2 Bil. 33:1-16) Padi ubwanya kwibalombola myanda ya bantu ba mu Kodinda wa kala amba bāshintyile būmi bwabo, bāikala ke bene Kidishitu, bātelwa na Leza bu boloke.​—1 Kod. 6:9-11.

Le kudi bamo bemona amba makambakano ebatana alombola amba Leza webela? Ukokeja kwibavuluja byobya byāfikile Yoba ne muswelo waāeselwe mwanda wa bululame bwandi bwaālamine ku meso a Yehova. (Yoba 1:1-22; 10:1; 42:12, 13; Mit. 34:19) Basengi ba Yoba bādi bamufwatakenya bya bubela amba i mulonge bubi kampanda. (Yoba 4:7, 8; 8:5, 6) Ino ba Polo ne Banabasa kebālongelepo nabya pobādi bakomeja bana ba bwanga ne ‘kwibakankamika bōminine mu lwitabijo,’ ino bādi bebanena’mba: “Pa kukatwela mu bulopwe bwa Leza i ponka pa kumona malwa a ntanda ne ntanda.” (Bil. 14:21, 22) Ne dyalelo nadyo mo monka, nobe ukokeja kukomeja boba bamona malwa na kwibalombola amba kūminina mu matompo i kisakibwa kya bene Kidishitu bonso ne amba kudi na mvubu mpata ku meso a Leza.​—Nk. 27:11; Mat. 24:13; Loma 5:3, 4; 2 Tem. 3:12.

Kankamika bemvwaniki bobe balanguluke pa muswelo ufikidija Yehova milao yandi mu būmi bwabo. Shi wibavuluje myanda ibala-inga, padi bakamona muswelo wibalongēle kala Yehova bintu mu būmi bwabo umo ne umo, enka mwaālaile’kyo. Tutanga mu Mitōto 32:8, amba: “Nkakulombolanga ñeni, ne kukufundija mu dishinda dyōkendanga: Nkakupanga ñeni ne dīso dyami ponka padi abe.” Ekale ubavuluja bemvwaniki bobe muswelo wibaludika Yehova ne waibakomeja, nankyo ubakwasha umo ne umo amone na mushike onso amba Yehova umutele mutyima ne amba ukamwangula mu matompo o-onso amutana dyalelo.​—Is. 41:10, 13; 1 Pet. 5:7.

Wibalombole Baloelelwe mu Bilonga Yehova Dyalelo. Pokimba kukankamika banabenu, i biyampe ukokele ñeni yabo pa byonso bilonga Yehova dyalelo. Kwisambila pa bino bintu mu muswelo ulombola amba abe mwine uloelelwe’byo, kukapa bemvwaniki nabo kuloelelwa kumo konka ku mityima yabo.

Tala muswelo witukwasha Yehova tunekenye mitabakano ya umbūmi. Witulombolanga muswelo mulumbuluke wa kwikala umbūmi. (Is. 30:21) Witushintulwila kine kikadile’ko butapani, bukondame, bulanda, misongo, ne lufu, kadi witulombola ne mwasa kufudijija bino byonso. Witupele bu bana na bana bwa buswe. Kadi i mwitupe madyese a milombelo. Witupele ne madyese a kwikala Batumoni bandi. I mwitupūtule ne meso a kumona amba Kidishitu pano ke mupwe kala kubikikwa momwa mūlu ne amba tudi mu mafuku a mfulo ya ino ngikadilo ya bintu yenda ifwena bukidi bonka.​—Kus. 12:1-12.

Tentekela pa ano madyese onso kupwila kwa pa kipwilo, kubungakana, ne bitango. Wivwane wisambile pa ino mpangiko yonso mu muswelo ulombola amba udi na mutyima wa kufwija’ko kwa binebine, ukakomeja kusumininwa kusumininwe bakwenu kuleka kwilwa kubungakana na banababo.​—Bah. 10:23-25.

Malapolo alombola bukamoni bwa madyese etwesela Yehova pa bukomo botulonga mu mwingilo wa budimi nao i nsulo ya bukankamane. Mu myaka katwa kabajinji, pādi penda ba Polo ne Banabasa ku Yelusalema, ‘batōkeje mityima ya banababo’ pa kwibasekunwina kamo ne kamo katala pa kwalamuka kwa bantu ba mizo. (Bil. 15:3) Nobe ukokeja kusangaja mityima ya banabenu na kwibasekunwina myanda mimweke yūbaka.

Ne kadi bantu bakankamikwanga mpata shi wibakwasha bamone mvubu ya byobya byobalonga. Wibafwije’ko pangala pa mwingilo wa bwine Kidishitu obengila na bengila. Fwija’ko ne boba bengila bityetye pa mwanda wa bununu nansha pa mwanda wa misongo inoko abo kasha bōminina na kikōkeji. Wibavuluje amba Yehova kedilwepo buswe bobalombola pangala pa dijina dyandi. (Bah. 6:10) Ke-pantu lwitabijo lupityile mu matompo i kituntwa kya bulēme bukatampe. (1 Pet. 1:6, 7) I biyampe kuvuluja banabetu kino kintu.

Wisambile pa Lukulupilo lwa Kumeso na Kyanga. Milao ya bintu bīya kumeso ilailwe ku bukomo bwa mushipiditu i nsulo mikatampe ya bukankamane ku bonso baswele Leza. Padi bavule mu bemvwaniki bobe bevwananga’yo divule dine. Ino shi abe ulombole ino milao na mutyima wa kufwija’ko, ukamwekeja’yo monka na mvubu ne kukuna mu mityima yabo kikulupiji kya amba ikafikidila, ne mityima yabo nayo ikayula kufwija’ko kukatampe. Ukebatenga uno muswelo shi wingidija bintu byofunda ku Masomo a Mwingilo wa Kiteokratike.

Yehova mwine ye Kimfwa Kikatampe mu kukankamika bantu bandi, Mwine wibapa bukomo. Ino nobe ukokeja kumwela’ko kuboko na kupāna ano madyese. Ponso ponena ku meso a kipwilo, ingidija biyampe ano madyese akupelwe.