Tumwenanga Namani mu Kwitanina Pamo na Banabetu Bene Kidishitu?

Tupwilanga nyeke nansha shi bitulomba kutyibuluka dito, nansha shi kudi mvula ne dyuba disansa. Mwanda waka Batumoni ba Yehova baloñanga bukomo bwa kwitana na banababo mu lwitabijo nansha byobadi na makambakano ne bukōke bwa twaji mu būmi bwabo?

I mwanda wa kamweno ketu. Polo, paādi wisambila pa bantu botupwilanga nabo mu kipwilo, wālembele amba, “twitei mityima batwe bene na bene.” (Bahebelu 10:24) Uno muneneno udi na buluji bwa “kulanga na katentekeji,” ko kunena’mba kwiyuka batwe bene na bene. Nanshi binenwa bya mutumibwa bitukankamika twikale kubanga bakwabo. Shi twiyuke na bisaka bya bene Kidishitu, tukamona’mba bamo banekenye makambakano adi pamo na etu ne amba bakokeja kwitukwasha twianekenye.

I mwanda wa kuningija kipwano kyetu. Boba botupwilanga nabo ke bantupo botwiyukile nabo bitupu, ino i balunda ba pa mutyima. Kyaba kikwabo tushikatyilanga pamo mwanda wa kwipwija mukose biyampe. Le i byabuyabuya’ka bidi mu kino kipwano? Twiyukanga senene batwe bene na bene, ne kino kikomejanga kijimba kyetu kya buswe. Ebiya, shi banabetu abatanwa na makambakano, twibakwashanga bukidi mwanda twi bapwane nabo bininge. (Nkindi 17:17) Kitatyi kyotupwana na bonso badi mu kipwilo kyetu, tulombolanga’mba ‘twitele mutyima batwe bene na bene.’—1 Kodinda 12:25, 26.

Tukukankamika utonge balunda nobe mu boba balonga kiswa-mutyima kya Leza. Balunda badi namino ukebatana mu bukata mwa Batumoni ba Yehova. Kokaleka kintu nansha kimo kikukankaje kwilunga netu.

• Mwanda waka kupwila pamo na banabetu kudi na kamweno kotudi?

• I kitatyi’ka kyokashilula kupwila netu?