Wa Kulongolola Dishinda Wabutulwa

Edisabeta kadi pabwipi na kubutula. Pano ke myeji isatu ikele nandi Madia, mubutule wandi. Kitatyi kibabwana kya Madia kushilula monka lwendo lulampe lwa kukanda mitenta akajokele kwandi ku Nazala. Kupwa kwa myeji isamba, nandi usa kubutula.

Madia wenda’tu, Edisabeta kwashala wabutula. Bine bisangaja’po kashā kumona’mba lubutulo lubapite biyampe kadi mwana mukomo nkē! Edisabeta walombola balondakani ne babutule bandi mwana, bonso abasangala.

Bijila bya Leza ku bene Isalela binena’mba shi mwana walonga mafuku 8, ufwaninwe kutwejibwa kwisao ne kwinikwa dijina. (Levi 12:2, 3) Bamo abalanga’mba mwana ufwaninwe kwinikwa dijina dya shandi Zekadia. Inoko Edisabeta wanena’mba: “Aa, ke dyadyopo! Ino dyandi i Yoano.” (Luka 1:60) Vuluka, mwikeulu Ngabudyele walaile amba mwana uketwa bu Yoano.

Balondakani ne babutule abapatana’mba: “I kutupu muntu mu babutule bobe witwanga dyadyo dijina.” (Luka 1:61) Abaipangula na maboko Zekadia alete dijina dya wandi mwana. Zekadia walombe kipapo ne kulemba’po amba: “Dijina dyandi i Yoano.”—Luka 1:63.

Ponka’po kala, ne bumāma bwa Zekadia abwa bupwa. Padi ubavuluka’mba waikele kamāma paakomenwe kwitabija byamunenene mwikeulu—amba Edisabeta ukabutula mwana. Ino pano pashilula kadi Zekadia kunena, balondakani nabo abatulumuka kebeipangula’mba: “Le bine uno mwana mutyetye ukekalanga namani?” (Luka 1:66) Abemwena kuboko kwa Leza papebwa Yoano dijina.

Ebiya Zekadia pa kuyulwa na mushipiditu ujila, wanena’mba: “Atendelwe Yehova, Leza wa Isalela, mwanda wate bantu bandi mutyima ne kwibanyongolola. Kadi wetulangwila lusengo lwa lupandilo mu njibo ya Davida mwingidi wandi.” (Luka 1:68, 69) Patela “lusengo lwa lupandilo,” wesambila padi Yesu, papo kabutwilwe. Zekadia wanena’mba kupityila ku luno lusengo, Leza usa “kwitupa batwe, pa kupwa kwitukūla mu makasa a balwana, dyese dya kumwingidila mingilo ikola kwampikwa moyo na lulamato ne boloke ku meso andi mafuku onso.”—Luka 1:74, 75.

Zekadia walaya pangala pa wandi mwana amba: “Ino abewa, abe mwana mutyetye, uketwanga bu mupolofeto wa Mwine wa Mūlu Mwine, mwanda ukatangidila Yehova kumeso kumulongolwela mashinda andi, kuyukija bantu bandi lupandilo na kulekelwa kwa bubi bwabo, pa mwanda wa mutyima wa lusalusa wa Leza wetu. Pa luno lusalusa kutamba kwa dyuba kuketupempula tamba kokwa kūlu kupāna kitōkeji ku boba bashikete mu mfindi ne mu mwemba wa lufu ne kwendeja mayo etu mu dishinda dya ndoe.” (Luka 1:76-79) I bupolofeto bukankamika’po kashā!

Na pano’ko Madia, uyukene bu kasongelwe, ye uno wafika ku Nazala. Le bisa kumwikadila namani pobasa kumumona na dīmi?