Kifundwa Kitala pa Lulekelo

Bantu abaitabija binena Yesu ne byalonga mungya mwikadile mityima yabo. Kino kibamweka ku njibo imo ya mu Ngadilea. Mufadiseo umo witwa bu Shimona waite Yesu byakudya, padi i mwanda wa kutadija muntu mwine ulonga bilongwa bya kutendelwa. Yesu waitabija kwenda’ko, bimweka bu wamone amba o mukenga wa kukasapwila bonso badi’ko, nansha’ko wapwile kala kwitaba lwito lukwabo lwa kudya na basonkeja musonko ne babipya-mambo.

Ino, Yesu katambwilwepo senene mutambwilwanga beni bonso. Bekalanga na kibidiji kya koija mweni ku maulu na mema atalala, mwanda mashinda a mu Paleshitina i mayule luvumbi kadi mudi kyanga, o mwanda bikwabilo bikalanga bikaba ne kutōkana. Ino Yesu kebamoijepo ku maulu. Kebamutambwilepo na kumufifya, na mobalongelanga nyeke. Kadi pa mwanda wa kanye ne kizaji, bekalanga na kibidiji kikwabo kya kupungulwila mweni māni ku mutwe. Ino Yesu kebamupungulwidilepo ne māni mene. Le kuno nako ko kutundailwa kwa muswelo’ka?

Abaanza kudya na beni badi ku meza. Abo badya, mwana-mukaji umo watwela talala mu njibo kwitwa mpika. Uno mwana-mukaji “uyukene mu kibundi bu kipya-mambo.” (Luka 7:37) Bantu bonso bampikwa kubwaninina i babipya-mambo, ino uno mwana-mukaji umweka bu kisekese, nansha padi i ndumba. Padi ye uno kemwivwane bufundiji bwa Yesu ne lwito lwandi lwa kwita boba ‘bonso balēmenenwe bāye ebatūje.’ (Mateo 11:28, 29) Mobimwekela umukimbanga mwanda watononwa na binenwa bya Yesu ne bilongwa byandi.

Waiya ku meza kunyuma kwa Yesu ne kufukata ku maulu andi. Mipolo yandi ibasūmina ku maulu a Yesu, kamupampula’yo na nywene yandi. Wamufifye senene ku maulu ne kumupungulwila māni anunka biya awaiya nao. Shimona pa kumumona wafītwa, kaenena’mba: “Shi uno muntu wadi bine mupolofeto, wadi wa kuyuka uno mwana-mukaji umutenga’u i ani ne i muntu wa muswelo’ka, amba i kipya-mambo.”​—Luka 7:39.

Yesu pa kujingulula milangwe ya Shimona, wamunena’mba: “A Shimona, ndi na kintu kya kukulombola.” Aye amba: “A Mufundiji, nena’kyo!” Yesu wabweja’ko amba: “Bantu babidi badi na mapu kwa muntu wapujanga lupeto; yeu wadi mwapule ndenadi 500, ino mukwabo 50. Byobabudilwe kya kumufuta, nandi webalekela na mutyima umo bonso babidi. Penepo, i ani pa abo’ba ukamusanswa bininge?” Shimona walondolola mwilwe’ko amba: “Nalanga i yewa waalekele bitabuke bungi.”​—Luka 7:40-43.

Yesu waitabija. Ebiya Yesu watale mwana-mukaji ne kunena Shimona amba: “Umwene uno mwana-mukaji’u? Natwelanga mu yobe njibo; kumpelepo nansha mema a koya ku maulu. Ino uno mwana-mukaji wabombeja maulu ami na impolo yandi ne kwiapampula na nywene yandi. Kumfifilepo mififyo nansha dimo; ino uno mwana-mukaji, tamba’tu nsá yonatwelanga, kalekelepo kumfifya senene ku maulu. Kuntūtyilepo māni ku mutwe, ino uno mwana-mukaji wantūta māni a mananshi ku maulu.” Yesu wamone amba uno mwana-mukaji waleta bukamoni bwa kwisāsa kwa binebine kwa busekese bwandi. O mwanda wafule ku kunena’mba: “Nakusapwila’mba, bubi bwandi, nansha byobuvudile, bubamulekelwa mwanda buswe bwandi i bukatampe, ino yewa ulekelwa bityetye, udi na buswe butyetye.”​—Luka 7:44-47.

Yesu ketabijepo busekese bwa uno muntu. Ino walombola lusa lwaivwanina bantu balongele bubi bukatampe ino bealakanya ne kwalamukila kudi Kidishitu amba ebasenge. Kadi uno mwana-mukaji watūkijibwa mutyima panena Yesu amba: “Bubi bobe bubakulekelwa. . . . Lwitabijo lobe lubakupandija; enda mu ndoe.”​—Luka 7:48, 50.