Milombelo Ne Kwityepeja Bidi Na Mvubu Mikatampe

Yesu kadi kala mulombole bandi bana ba bwanga kyelekejo kya kutakamana mu milombelo. (Luka 11:5-13) Padi pano badi shi mu Samadia shi mu Ngadilea, wakomeneja monka mvubu ya kulombela pampikwa kukōka. Walombola’byo mu kino kyelekejo kikwabo amba:

“Mu kibundi kimo mwadi mutyibi umo kadipo utyina Leza nansha kulēmeka muntu. Mu kine kibundi’kyo, mwadi ne mukaji wa kishala umo wadi umwendela’nka kumwendela, unena’mba, ‘Longa bukomo ami minge yewa otwisambila nandi.’ Inoko, mu kitatyi kimo kadipo bidi usaka, ino kupwa kanena aye mwine amba, ‘Nansha byonkityinangapo Leza ne kulēmeka muntu ye-yense mpika, uno mukaji wa kishala byaunkambakanyanga nyeke, nsa kulonga bukomo atyibilwe mambo molokele, amba aleke kwiya’nka kwiya kumpuñanya na kunombalomba.’”​—Luka 18:2-5.

Yesu washintulula’kyo amba: “Ivwanai byanena uno mutyibi, nansha byadi mukondame! Shi ke pano, lelo binebine Leza kakabingijapo batongwe bandi bamwabija dyuba ne bufuku, koku wibatūkijije mutyima?” (Luka 18:6, 7) Le Yesu ukimba kunena bika padi Shandi?

Yesu kasakilepo kunena’mba Yehova Leza udi bwa uno mutyibi mukondame. Ino washiyañanya’byo amba: Nansha shi uno mutyibi mukondame waitabija pa mwanda wa muntu walomba na kininga, ino Leza aye ukwashanga kupita ne papo. I moloke kadi muyampe, ukalondolola shi bantu abamulombe pampikwa kukōka. Ye motwekimwena ku byabweja’ko Yesu amba: “Nemulombola’mba, [Leza] ukebabingija bukidibukidi.”​—Luka 18:8.

Divule bantu ba munshi ne balanda kebatyibilwangapo mambo moolokele, ino ba lupusa ne bampeta bavudile kupebwa nsambu. Ino Leza kadipo uno muswelo. Pasa kufika kitatyi, usa kutyiba molokele amba babi bapebwe mfuto kadi bengidi bandi batambule būmi bwa nyeke.

I bāni badi na lwitabijo pamo bwa mukaji wa kishala? I bantu banga bakulupile amba Leza “ukebabingija bukidibukidi”? Yesu waelekeja’tu mvubu ya kutakamana na milombelo. Ino pa bitala luno lwitabijo mu milombelo, waipangula’mba: “Mwanā muntu pa kufika, le bine ukatana luno lwitabijo pano pa ntanda?” (Luka 18:8) Myanda idi’mo ilombola’mba luno lwitabijo kelukatanwapo na bantu bavule pakafika Kidishitu.

Bantu bamo baivwana Yesu bemwene amba badi na lwitabijo. Bekulupile amba i boloke, koku bafutulula bakwabo. Yesu waleta kino kyelekejo ku bano bantu amba:

“Bantu babidi bakandile mu tempelo kukalombela, umo wadi Mufadiseo, mukwabo nandi musonkeji wa musonko. Mufadiseo waimana kalombela munda mwandi namino amba, ‘A Leza, nakufwija’ko mwanda ami nkidipo mwikadile bantu bakwabo​—ba manyengenyenge, bakondame, ba makoji​—nansha mwikadile uno musonkeji wa musonko. Nshikilwanga na nzala misunsa ibidi ku yenga; mpānanga kya dikumi kya bintu byonso byonsokolanga.’”​—Luka 18:10-12.

Bafadiseo bayukene bu bantu bemwekejanga bu boloke. Baloñanga namino mwanda wa kutulumuna bakwabo. Kadi mafuku abo obetūdīle abo bene a kushikilwa na nzala i Dya Mwanzo ne Dya Buná, mafuku mene ekalanga bantu bayule mu nsoko, amba bebamone. Kadi bafutanga nyeke kya dikumi enka ne kya tubimuna tutyetye. (Luka 11:42) Myeji mityetye kunyuma balombwele kafutululo kabo kobafutulwile bantu bitupu amba: “Kino kibumbo kya bakubulwa kuyuka Bijila [mungya mumweno wa Bafadiseo] i bantu bafingwe mafingo.”​—Yoano 7:49.

Yesu waendelela na kyelekejo kyandi amba: “Ino musonkeji wa musonko waimana dya kulampe, kadipo usaka nansha kutūlwila meso andi mūlu ino wadi wikupila’nka kwikupila pa kyadi, amba, ‘A Leza, mfwile’ko lusa, ami kipya-mambo.’” Bine musonkeji wa musonko wetyepeje na kwiyuka kutupatupa kwandi. Yesu wavuya amba: “Nemulombola’mba, uno muntu watūkile kwandi kadi waikele moloke kutabuka yewa Mufadiseo. Mwanda ense wizunzula ukafwijibwa bumvu, ino yewa witūkija ukazunzulwa.”​—Luka 18:13, 14.

Pano Yesu walombola patōka mvubu ya kwityepeja. Ano i madingi mayampe ku bandi bana ba bwanga, bene batamīne mu bantu mudi Bafadiseo bemona bu boloke ne batele mutyima ku bitenta ne byepelo. Kadi i madingi a kamweno ku balondi bonso ba Yesu.