Mbwejo

Byodi mbutwile, usakanga kukwasha bobe bana balēme basanswe Yehova ne kwipāna kwadi. Le i bika byobwanya kulonga pa kwibakwasha beteakanye mwanda wa kubatyijibwa? Le i kitatyi’ka kyobakabwanya kutabula dino ditabula dya mvubu?

Yesu wāsoñenye balondi bandi amba: “Endai mukalonge bana ba bwanga mu bantu ba ku mizo yonso, mwibabatyijei.” (Mat. 28:19) Mungya uno musoñanya, kisakibwa kibajinji pa kubatyijibwa i kwikala mwanā bwanga—ke’nkapo muntu wivwanije ne kwitabija bufundiji bwa Kidishitu, ino i ne wibulonda bya binebine. Bino i bintu bibwanya kulonga ne nkasampe bininge.

Shila bobe bana kimfwa kiyampe, ne kukoma bufundiji bwa Yehova mobadi. (Kup. 6:6-9) Kino kilomba ne kwingidija myanda idi mu dibuku Ikala Mūmi Nyeke! mwanda wa kwibafundija bubine bwa kyalwilo bwa mu Bible ne kwibateakanya banze kulangulukila pa misoñanya ya mu Bible ne kwiilonda mu būmi. Kwasha bobe bana babwanye kushintulula nkulupilo yabo mu bishima bya abo bene. (1 Pe. 3:15) Buyuki ne kukankamika kowibakankamika, ne kifundwa kya pa kasuku, butōtyi bwa kisaka, kupwila kwa pa kipwilo, ne balunda bayampe bikebakwasha bafikile pa kubatyijibwa ne kwendelela kumeso. Wibakwashe betungile bitungo bya ku mushipiditu.

Nkindi 20:11 unena’mba: “Enka ne mwana uyukilwanga ku bilongwa byandi, shi udi na mwiendelejo utōka tō ne moloke.” Le i bilongwa’ka bimo bibwanya kulombola’mba mwana, mwana-mulume nansha mwana-mukaji, waikala mwanā bwanga wa Yesu Kidishitu ne amba i mwiteakanye kubatyijibwa?

Mwana wendelela kumeso mwanda wa kubatyijibwa ufwaninwe kukōkela bambutwile bandi. (Bil. 5:29; Kol. 3:20) Bible unena myanda ya Yesu paādi na myaka 12 amba: ‘Wadi ukōkele nyeke’ bambutwile bandi. (Luka 2:51) Na bubine, kukakimbepo obe mwana ekale mubwaninine. Ino yewa usaka kubatyijibwa ukalonga bukomo bwa kulonda kimfwa kya Yesu ne kuyukana bu muntu ukōkele bambutwile bandi.

Kadi ukalombola mutyima wandi wa kusangela kwifunda bubine bwa mu Bible. (Luka 2:46) Le obe mwana usakanga kutanwa ku kupwila ne kunena’ko? (Ñim. 122:1) Le usangelanga kutanga Bible ne kulonga kifundwa kya pa kasuku kitatyi ne kitatyi?​—Mat. 4:4.

Mwana wendelela kumeso mwanda wa kubatyijibwa uloñanga bukomo bwa kutangidija tumweno twa Bulopwe kumeso. (Mat. 6:33) Uyukile kiselwa kyandi kya kusapwila bakwabo lwitabijo lwandi. Usapulanga mu miswelo mishileshile kadi kadipo na bumvu bwa kwiyukanya bu Kamoni wa Yehova ku bandi badimu ne ku bakwabo ba ku masomo. Ukwatanga na makasa abidi bipindi bimupebwa ku Kupwila kwa Būmi ne Mwingilo.

Kadi uloñanga bukomo bwa kulama butōki bwa mu mwikadilo na kwepuka balunda babi. (Nki. 13:20; 1 Ko. 15:33) Kino kikamweka ku muswelo watonga minjiki, mafilime, mpangiko ya ku televijo, makayo a video, ne muswelo waingidija Entelenete.

Bavule i betabe biyampe ku bukomo bwa binebine bwalongele bambutwile babo, belongela bubine ke bwabo, ne kubwanya bisakibwa bya kubatyijibwa mu bunkasampe bwabo. Yehova emwesele pomukwasha benu bana bafikile pa dino ditabula dya mvubu mpata mu kipwano kyabo na Yehova.

I dyese’po kashā kwingidila pamo na kipwilo bu musapudi wa kubulwa kubatyijibwa. Tubakufwija’ko pa kwendelela kowaendelela ku mushipiditu. Pano ubayuka Leza mwanda ubefunde Kinenwa kyandi kadi ubalombola lwitabijo mu milao yandi.​—Yoa. 17:3; Bah. 11:6.

Kumeso kwa kushilula kwifunda na Batumoni ba Yehova, wadi padi upwene mu muswelo kampanda na bulongolodi kampanda bwa kipwilo nansha padi kwadipo utwela mu kipwilo nansha kimo. Pakwabo wadi ulonga bintu kebikwatañenepo na misoñanya ya mu Bible. Ino pano ubalombola lwitabijo lobe na kwisāsa, ko kunena’mba kwialakanya bininge pa bibi byowalongele mafuku kunyuma, ne na kwalamuka, ko kunena’mba kuleka mwiendelejo mubi ne kusumininwa kulonga byoloke ku meso a Leza.​—Bil. 3:19.

Pakwabo kadi, padi wayukile bisonekwa bijila “tamba ku bwanuke.” Kadi wi mukingwe ku myanda ya kwikuja mu mwiendelejo wa kubulwa bwine Kidishitu ne ku bubi bukatampe. (2 Tm. 3:15) Wayukile mwa kukomena ludindi lwa bakwenu ne byongo bikwabo bya kulonga bintu bibi ku meso a Yehova. Walombwele lwitabijo na kulamata ku mutōtelo wa bine ne na kusapwila bakwenu byokulupile. Wafundijibwe mwa kwingidila mwingilo wa bwine Kidishitu. Pano ubatyibe butyibi bwa kwingidila Yehova bu musapudi wa kubulwa kubatyijibwa.

Mu bino byonso, shi wayukile Yehova kodi mutame nansha shi wefundile mashinda a Yehova tamba ku bwanuke, padi kotengele pano kutabula matabula makwabo abidi a kwendelela kobe kwa ku mushipiditu, ke kwipāna ne kubatyijibwa kadi. Ukepāna kudi Yehova na kumufwena mu milombelo ne kumulombola butyibi bobe bokwete bwa kumulamata bunka bwandi nyeke ne nyekeke. (Mat. 16:24) Kilomboji kya kuno kwipāna kobe i kubatyijibwa mu mema. (Mat. 28:19, 20) Kwipāna ne lubatyijo byo bikulengeja wikale mwingidi mutombolwe wa Yehova Leza. Bine, dino i dyese dya kutendelwa’po kashā!

Ino monka mobakulombwedile’kyo mu kifundwa kya Bible, ubwanya kutanwa na makambakano palapala. Vuluka, kinondanonda na kupwa’tu kubatyijibwa, “Yesu watwalwa mu ntanda mutuputupu na mushipiditu amba atompibwe na Dyabola.” (Mat. 4:1) Nobe tengela matompo makwabo pa kupwa kubatyijibwa kobe bu mwanā bwanga wa Kidishitu. (Yoa. 15:20) Akāya mu miswelo mishileshile. Ukokeja kulondwalondwa na ba kisaka. (Mat. 10:36) Ukokeja kufutululwa na bakwenu ba ku masomo, bengidi nobe, ne bakwenu bowadi upwene nabo. Ino vuluka nyeke binenwa bya Yesu bidi mu Mako 10:29, 30 amba: “I bine nemulombola’mba, i kutupu nansha umo ushiya njibo nansha banababo bana-balume nansha banababo bana-bakaji nansha inandi nansha shandi nansha bana nansha madimi pa mwanda wa amiwa ne pa mwanda wa myanda miyampe ukabulwa pano mu kino kitatyi kumona misunsa 100​—mobo, banababo bana-balume, banababo bana-bakaji, bainandi, bana, ne madimi, ne kupangwapangwa ponka​—kadi mu ngikadilo ya bintu ikāya’ko namo, būmi bwa nyeke.” Nanshi wielele’ko bya binebine wikale nyeke pabwipi na Yehova ne kwiendeja mungya misoñanya yandi myoloke.

Shi usaka kubatyijibwa, lombola mukwatakani wa kitango kya bakulumpe. Bipangujo bilonda’ko kupwa kwa uno musapu kyo kyalwilo kya mīsambo ikesamba nobe bakulumpe mwa kuyukila shi ubwenye bisakibwa bya kubatyijibwa. Ukokeja kwalwila’ko kala kupituluka mu bino bipangujo bunka bobe mu mpangiko yobe ya kifundwa kya pa kasuku kya kitatyi ne kitatyi.

Powiteakanya ku ino mīsambo, witūdile’ko kitatyi kya kutanga ne kulanguluka pa Bisonekwa bipitulukilwe’mo. Padi ukasaka kulemba myanda ikusangaja mu dino dibuku nansha pa papye mukwabo. Ukokeja kwingidija byolembele ne kupūtula dino dibuku kitatyi kyomwisamba na bakulumpe. Shi ubakomenwa kwivwana kipangujo kampanda, kokikaka kulomba bukwashi kudi yewa wifundanga nobe Bible nansha kudi bakulumpe.

Kokilanga’mba mu mīsambo yobe na bakulumpe unenwe kuleta malondololo malamala nansha makutakane a bipangujo bipangwilwe. Malondololo mēpi, atengelela pa mwanda onena mu bishima byobe i mayampe. Ku bipangujo bivule, i biyampe ne kunyemena ku kisonekwa kimo nansha bibidi bya mu Bible bilombola buluji bwa mu Bisonekwa bowaletela malondololo.

Shi kwaikele na buyuki bubwanine bwa bufundiji bwa kyalwilo bwa mu Bible, bakulumpe bakakwata’ko mpangiko ya kukukwasha mwanda wa uyuke kulondolola mu bishima byobe moivwanije biyampe Bisonekwa, ebiya kobwanya bisakibwa bya kubatyijibwa kitatyi kikwabo.

[Musapu kudi bakulumpe ba pa kipwilo: Bulombodi bwa mwa kwendeleja mīsambo na boba basaka kubatyijibwa budi pa paje 208-212.]