I kutupu Kintu Kyēbakankeje

Kudi muntu umo kisheta wādi ushikata difuku ne difuku ku kibelo kya tempelo ulomba. Difuku dimo ku kyolwa, wāmona ba Petelo ne Yoano benda kukatwela mu tempelo. Uno kisheta wēbalomba’mba: ‘Nkwashei’ko na kintu.’ Petelo wāmunena’mba: ‘Nsa kukupa kintu kimo kitabukile lupeto. Mu dijina dya Yesu, imana wende!’ Kupwa, Petelo wāmwimika, muntu’wa wāshilula kwenda! Kibumbo kyāsangele bininge pa kumona kino kingelengele, kadi bantu bavule bāitabija.

Nansha nankyo, babitobo ne Basadusea bālobele. Bākwata batumibwa, bēbaselela mu kidye, kebēbepangula’mba: ‘I ani wemupa bukomo bwa kubelula uno muntu?’ Petelo wānena’mba: ‘Yesu Kidishitu omwaipaile’wa ye wetupa bukomo.’ Bano bendeji ba bipwilo bēbafunina’mba: ‘Lekai kunena myanda ya Yesu!’ Inoko batumibwa bēbalondolola’mba: ‘Tusa kunena myanda yandi. Ketusapo kuleka’byo.’

Ba Petelo ne Yoano abo’tu bakutululwa, bāendele kwādi bana ba bwanga bakwabo kwibalombola byalongeka. Bālombela kudi Yehova kya pamo amba: ‘A Yehova, witupe’ko bukankamane amba twendelele kwingila uno mwingilo.’ Yehova wēbapēle mushipiditu ujila, bāendelela na kusapula ne kubelula bantu. Bantu bavule bininge bāitabija. Basadusea pa kukwatyilwa batumibwa mukao bininge, bēbela mu kifungo. Ino bufuku, Yehova wātuma mwikeulu wāshitula bibelo bya kifungo, wālombola batumibwa amba: ‘Kajokelei ku tempelo mukafundije.’

Lubanga bwē, bāsapwila Sanedini, kidye kya bendeji ba bipwilo, amba: ‘Kifungo i kishitwe, inoko bakutwa i banyeme’mo! Boba mu tempelo bafundija bantu!’ Bākakwata monka batumibwa, bēbaleta ku Sanedini. Kitobo mukatampe wēbanena’mba: ‘Twemupeleje kusapula myanda ya Yesu!’ Ino Petelo wāmulondolola’mba: “Tufwaninwe kukōkela Leza bu mulopwe kupita’ko bantu.”

Bendeji ba bipwilo bākalabala bininge kēbasake kwipaya batumibwa. Inoko Mufadiseo umo witwa bu Ngamadyela wāimana kānena’mba: ‘Tadijai! Bimweka’mba Leza udi na bano bantu. Lelo bine musaka kulwa na Leza?’ Nabo bāteja madingi andi. Pa kupwa kukupila batumibwa nsonde, bēbapeleja monka kusapula, ebiya bēbaleka bende. Inoko bino kebyākankejepo batumibwa. Bāendelele kusapula myanda miyampe na bukankamane mu tempelo ne ku njibo ne njibo.