Basapudi ba Bulopwe bafumika

Yehova I Wa Bukomokomo Kutabuka Balwana Nandi

TAMBA pakala Dyabola ne bandemona bandi batompanga kukankaja busapudi bwa myanda miyampe kupityila ku mutōtelo wa bubela ne ku majende. Bible wisambilanga pa mpango imbi ya Satana mu 2 Kodinda 4:4 na kutela bantu bu “bakusambibwa meso a mutyima kudi Leza wa panopantanda, boba bakubulwa kwitabija; mwanda wa kutyina’mba, mwinya wa myanda miyampe ya ntumbo ya Kidishitu aye udi kimfwa kya Leza, wakebatemena.”

Ino Yehova Leza udi na bukomo kutabuka Satana. I kutupu kintu nansha kimo kikokeja kulonga balwana na Yehova kibwanya kwimika kufikidila kwa kiswamutyima kya Leza, kya kusakila “bantu bonso kupanda, bafike ne pakuyukidija kwa binebine.” (1 Temote 2:4) Ye kilombola ino myanda itamba ku basapudi ba Bulopwe ba mu Australie.

◻ Mwana mukaji musongwe umo walekele kutōta kupita kwa myaka 20 washilwile monka kutanga Bible. Kuno kushilula kwa kusangela Bible dipya kwalupwile mu mutyima wandi bipangujo bivule, kupwa washilula kulombela Leza amukwasheko atane malondololo. Wādi ukimba kuyuka bubinebine, ino wādi uyukile amba shi ajokele monka ku mutōtelo wandi wakala, kādipo wa kutana malondololo ku bipangujo byandi. Ino washilula kukimba bubinebine na kupempula magajini amo ādi apoteja mabuku makulu ne kwibepangula shi bādi na mabuku kampanda atala pa mutōtelo.

Mwine mangajini wāvulukile’mba wādi na kitabo kimo kyādi kisambila pa myanda ya Leza, inoko kekyādipo mu mangajini, kyādi kunjibo. Kyādi na mutwe wa mwanda unena’mba Unaweza Kuishi Milele Katika Paradiso Duniani, kilupulwe na ba Tumoni twa Yehova. Uno mwana-mukaji wātangile dino dibuku na kyaka ne kutāna malondololo ku byandi bipangujo bivule bitala pa Bible. Kupwa wa kimbile ba Tumoni twa Yehova mu dibuku dya majina, bifuko, ne ma nimelo a matelefone, kumfulo wetana nabo ne washilula kifundwa kya Bible kya kitatyi ne kitatyi.

◻ Nsongwakaji umo wālupwile musapu mu julunale umo wa mu kyabo kibundi mwanda wa kwita ba kiliya baye bapote bwanga bwa tukūya. Musapu wādi unene amba i ‘kakūya kakalā bininge kabukomo bukatampe.’ Mwana-mukaji umo Kamoni ka Yehova wāsomene uno musapu. Wātyiba mbila ya kwita ku nimelo ya telefone yālombwelwe’mo ne kwisamba na uno muntu mwanda wa kumulombola nsulo ya kwine kwādi kulupuka bukomo bwa kano kakūya. Kupwa besambila pa binena Bible bitala pa mingilo ya bandemona. Uno mwana-mukaji wa tukūya wamulombola’mba bufuku bwa kesha dyapityile dino’di nādi nombela Leza mwanda wa ankwashe nenyongolole mu ano makambakano a bandemona. Uno musapudi wakwete mpangiko ya kwisamba nandi dikwabo ku telefone.

Kitatyi kyāmwityile, uno nsongwakaji kādipo ku njibo. Inandi walondolala ku telefone’mba: “Kiyukilepo byowesambile na wami mwana, ino kyalupuka’ko pano i kingelengele!” Washitulula’mba aye’tu pa kupwa kwisamba nandi dibajinji ku telefone, wandi mwana waelele bifwatulo ne mabuku andi onso a myanda a majende, washilula kutanga Bible.

Bukidi-bukidi bonka, wakwata mpango ya kukamupempula aye mwine mpala na mpala. Wāitabije ponka na ponka kifundwa kya Bible na ba Tumoni twa Yehova. Wāshilula kwinangila pamo na ba Tumoni na kukatanwa ku kupwila kwabo kwa bwine-kristu. Pano napo, Yehova wānekenye bandemona na kumunika kuyukidija kwa bubinebine bwa mu Bible.