Bipangujo Bya Batangi

Lelo Masomo Aná (masomo aná a Kihebelu abundile dijina dya Leza) atanwa mu bilembwa bya Kihebelu bya Mateo, āikele kutentulwa na Shem-Tob ben Isaac Ibn Shaprut, muñanga Muyuda wa mu myaka tutwa 14?

Mhm, ke amopo. Inoko, bino bilembwa bya Mateo i bingidije kishima hash·Shem’ (kisonekwe kyonso kituntulu nansha mu kīpi) misunsa 19, pamo na mokilombwedilwe pa paje 7 mu Kiteba kya Mulami kya 1 kweji 9, 1996.

Kishima kya Kihebelu hash·Shem’ kishintulula amba “Dijina,” kifunkila pa dijina dya Leza. Kimfwa, mu bilembwa bya Shem-Tob, kishima hash·Shem’ kilembelwe mu kīpi kitanwa mu Mateo 3:3, mu kino kisonekwa Mateo utela Isaya 40:3. Nanshi i kyendele’mo kunena’mba Mateo wāikele kutweja dijina dya Leza mu Evanjile yandi, kitatyi kyaātentwile vese wa mu Bisonekwa bya Kihebelu mutanwa Masomo Aná. Nansha bilembwa bya Kihebelu byālembelwe na Shem-Tob byokebingidije ano Masomo Aná, inoko mwingidijijo wabyo wa kishima “Dijina,” pamo bwa mokikadile mu Mateo 3:​3, ulombola amba dijina “Yehova” didi ne mu Bisonekwa bya Kingidiki bya bwine Kidishitu.

Shem-Tob wātentwile bilembwa bya Kihebelu bya Mateo mu mwingilo wandi wa kupatanya bakwabo witwa bu ʼEʹven boʹchan. Ino, lelo bino bilembwa bya Kihebelu wēbiselele kwepi? Polofesele George Howard, waikele kubandaula uno mwanda kamo ne kamo, uleta’po mulangwe amba “Bilembwa bya Mateo bya Kihebelu bya Shem-Tob i bilembwe mu kitatyi kampanda mu bula bwa myaka tutwa tuná tubajinji mu kitatyi kya bwine Kidishitu.”a Bakwabo bakokeja kumupatanya pa uno mwanda.

Howard unena’mba: “Bilembwa bya Mateo bya Kihebelu bitūdilwe mu bino bilembwa bya Shem-Tob i biyukane nakampata kupityila ku kwishila kuvule kwabyo na dibuku dya Mateo dya mu Kingidiki ditabijibwe na bipwilo byonso.” Kimfwa, kukwatañana na bilembwa bya Shem-Tob, Yesu wēsambile padi Yoano amba: “I binebine, nemunena’mba, ku bonso babutulwa na bana-bakaji i kutupu nansha umo utabukile Yoano Mubatyiji.” I mutalulwe binenwa bya Yesu bilonda’ko amba: “Ino muntu mutyetye mu bulopwe bwa momwa mūlu wamukile bulēme.” (Mateo 11:11) Muswelo umo onka, kudi kwishila kuvulevule pa bukata bwa bilembwa bya mu Kihebelu bya Bisonekwa bya Kihebelu bikilaminwe ne pano na bishima bya mu bilembwa bimo byonka bya bwalamuni bwa mu Kilatini butelwa bu Septante. Eyo nansha byotwamona kuno kwishila, ino kudingakanya bino bilembwa bya kala kulombola amba bipindi byabyo bivule binena bintu bimo byonka.

Bilembwa bya Shem-Tob bya Mateo i bitweje kishima “Dijina” ponso pamweka buluji bwa kukulupila’mba Mateo wāikele kwingidija binebine Masomo Aná, pamo’nka na motwadi tubanenena kala kungala. Omwanda, tamba mu mwaka wa 1950, bilembwa bya Shem-Tob bingidijibwanga bu kitako kutambile kwingidija dijina dya Leza mu Bisonekwa bya Kingidiki bya bwine Kidishitu, ne bikitelwanga ne pano mu Bwalamuni bwa Ntanda Impya bwa Bisonekwa Bikola​—Budi na Kwa Kunyemena (Falanse).b

[Kunshi kwa dyani]