Basapudi ba bulopwe bafumika

Kutandabuka kwa mwingilo wa Leza mu Namibi

MYANDA miyampe ya Bulopwe bwa Leza yāfikile mu Namibi musunsa umbajinji ku mfulo kwa myaka ya 1920. Tamba penepa, bantu tutwa na tutwa ba mityima myoloke betabanga ku musapu wa lupandilo wa Leza. Myanda ino ilonda’ko ilombola muswelo ungwija Yehova bintu bisaka mityima mu kipopole kyandi.—Hakai 2:7.

◻ Paulus, kidimye widimina twandi, ushikatanga kungala dya kutunduka kwa Namibi wetene dibajinji na Batumoni ba Yehova paaile kunanga mwipata, mu Windhoek. Bukidi bonka, Paulus watyumuka, amba buno bo bubinebine. Wajokela kwandi na dibuku Ukokeja kwikala ne būmi bwanyeke mu Paladisa pano pantanda. Pa kufika’ye mu Rundu, kibundi kikatampe mudi Njibo ya Bulopwe kidi kubwipi na kwabo, wakamona Batumoni, webalomba kwiya kumupempula.

Inoko kyadi kikomo pa kusaka’mba Batumoni bāye befunde Bible na Paulus yenga ne yenga, mwanda padi lwendo lulampe. Paulus kapungilepo, washilula kwifunda Bible aye mwine. Kupwa, washilula kusapwila bantu bakwabo na bupyasakane bintu byaadi wifunda. Mwenda mafuku, kyaikala ke kisumpi kya kifundwa kya Bible. Kino kisumpi kityetye pa kwivwana’mba kudi kubungakana kwa Batumoni ba Yehova mu Rundu, kyakonga kalupeto wa katyetye wa katyetye, kyafuta lwendo lwa kukatanwa’ko.

Bine, basangele mpata pa kwilunga musunsa wabo umbajinji na Batumoni ba Yehova! Penepa mpangiko yakwatwa, banabetu babwenye bisakibwa bashilula kupempula kino kisumpi kyaba ne kyaba. Dyalelo, mu kibundi mushikatanga Paulus kemudi basapudi basamba.

◻ Mutyima wa Johanna wa kusaka kuyuka dijina dya Leza watenekelwe paaivwene muntu umo ufutulula Batumoni ba Yehova. Unena’mba: “Dino dijina Yehova i tamba’nka ponaivwene’dyo musunsa wami umbajinji, dyashadidila mu ñeni yami, keneipangula’nka kwiipangula uno Yehova i ani. Nadi nshikata na mulumyami kubwipi na Walvis Bay, ku mukalo na Namibi. Difuku dimo twaenda mu vile, namona Batumoni bapāna mapepala a Kiteba kya Mulami mu mukenza. Nami baumpa’ko dimo, nebalomba ne kwiya kumfundija Bible, mwanda nadi na bipangujo bivule. Pobaunombwele amba kebabwanyapo kwiya pa mwanda wa motoka wabo wadi mufwe, bine nadila. Kepaijijepo mafuku, mulumyami wafwa, nakashikata mu Keetmanshoop. Pania wa pa bula umo (musapudi wa myanda miyampe wa kitatyi kyonso) nandi watumwa kwingidila mu kino kibundi, waumpa dibuku Bubinebine butwala ku bumi bwa nyeke ne nyeke. Tamba’tu ku ngalwilo kwadyo, namona kala’mba buno i bubinebine.

“Mafuku pa kupita’po, napebwa kishima kya kutambila mu mwingilo wa busapudi, ino kulēmenenwa na moyo wa bantu ko kwadi kumpite. Shi ke kwenda mu busapudi bwa ku njibo ne njibo, nandi nombela kudi Yehova amba ndeke mfwe nansha kufwa kupita’ko kundeka ñende mu busapudi. Ponaanjile kutambila mu busapudi bwa mu mukenza, nakefīle mu kakipito katyetye amba kekudipo muntu usa kumona. Ku mfulo neningisha, natambika bapityeshinda mapepala, papo ko kunena nanena’ko bishima kampanda. Dine difuku’dya Yehova wankwasha, nesamba na bantu bavule myanda ya lukulupilo lwami lwimanine pa Bible.

“Pano ke myaka 12, nansha byondi mulanda kungitu, ñendelela’nka kwendelela na kukwata madyese a mwingilo wa bupania makasa abidi ne kumwena’mo nsangaji mivulevule ilupuka ku kusapwila bakwetu bubinebine bwa Bulopwe.”