Pa Kala Twadi Bampumpi​—Pano Ketudi Mikōko!

Ami ne Sakina potwākidi banuke, twādi balondakani. Sakina wādi mukata kadi mupume, ami papo mutyetye kadi munyane. Twādi nyeke twipotomeja, ino difuku dimo tweumana nandi lūma lwabinebine. Tamba dine difuku’dya, twēfikila nandi mfika, papo kutupu kwiimuna. Kupwa batwe bonso twaviluka, pampikwa kwivwana nansha lupupuji amba kampanda watwelela dyepi.

Mu 1994, nashilula kwifunda Bible na Batumoni ba Yehova, bumuntu bwami bwashilula kushinta bityebitye. Myaka iná pa kupita’po, ponaendele kukatanwa ku kubungakana kwa pa bula kwa difuku dimo mu Bujumbura, mwipata mwa Burundi, natulumuka’tu Sakina au. Nasangala pa kumumona nandi ku kubungakana, ino lwimu lwetu lwaikala’tu lwa na kinkosela. Pa kukya’bo lubanga, nabezemuka mpata pa kumumona umbukata mwa ba kubatyijibwa! Bine, nandi papo ke mushinte byabinebine. Kakidipo kadi muntu wa luma otwadi twipotomeja nandi nyeke. Bine, kyadi kya kutendelwa pa kumumona ulombola patōka kwipāna kwandi kudi Leza na kwitabija kubatyijibwa mu mema!

Aye pa kwabuka mu mema, nanyemena kwaadi lubilo kukamupamba bipa, namunena mu mīsongwa amba: “Ubavuluka motwadi tulwila?” “Bine,” ye aye unena, “navuluka, ino le kadi, ke bipite kala. Pano kendi muntu mupya.”

Batwe bonso pano tudi na nsangaji pa kuyuka bubinebine bwa mu Bible bwetukutyila umbumo ne kushinta bumuntu bwetu bwādi budingakene na bwa bampumpi pano ke bwa mikōko ya bene ya Yehova Leza, Mukumbi Mukatampe. Bine, bubinebine bwa mu Bible bushintanga būmi bwa bantu.