FWENAI KUDI LEZA

Yehova Kadipo’mba “Yeu ye Yeu”

Le ke bakusañune? Le kebakusuminwe kyolomba, kukusuminwa kaji nansha kukufutulula pa mwanda wa lukoba lobe, kabila nansha kisaka kyenu? Shi i amo, kudipo bunka. Inoko, mwanda muyampe i uno: Kuno kupēlulwa kuvudile kumweka pano pa ntanda kekudipo mūlu. Petelo mutumibwa mwine Kidishitu wānene na kikulupiji kyonso’mba, “Leza kalemekangapo bantu’mba: Yeu ye yeu, mhm.”​—Tanga Bilongwa 10:34, 35.

Petelo kānenepo bino binenwa ku yandi njibo​—ino mu njibo ya Mujentaila witwa bu Konilusa. Petelo wādi Muyuda, wāikele’ko mu kitatyi kyādi Bayuda bamona Bajentaila bu badisubi ne kwibapela bu balondi. Penepa, mwanda waka Petelo wādi mu njibo ya Konilusa? Mu kīpi, i pa mwanda wa Yehova Leza wāteakenye kuno kwitana. Petelo wāpelwe kimonwa na Leza, mwine mwaāmulombwele amba: “Byobya byāpwa kujilula Leza, abewa kokifutulula’byo’mba, ke bya bitupu.” Aye Petelo kuyuka mpika, nanshi Konilusa nandi wāpelwe kimonwa difuku dimo kumeso, mwine mwāmutumine mwikeulu ende kudi Petelo. (Bilongwa 10:1-15) Kitatyi kyājingulwile Petelo amba Yehova ye wimanine uno mwanda, kālekelepo kwisamba.

Petelo wānene amba, “i binebine nanshi, namone Leza kalemekangapo bantu’mba: Yeu ye yeu, mhm.” (Bilongwa 10:34) Kishima kya Kingidiki kyalamwinwe bu “yeu ye yeu” kishintulula pa bute pa bute “kubulwa kushalañanya yeu ne yeu.” (The Kingdom Interlinear Translation of the Greek Scriptures) Pa mwanda utala kino kishima, mufundi umo ushintulula amba: “Kifunkila pa mutyibi utyiba mambo mungya kilungi kya muntu; pa kyaba kya kutyiba mwendele mwanda, ino utyiba mungya muntu wasenswe nansha washikilwe.” Leza kamonengapo’mba kilungi kya muntu umo i kipite kya bantu bakwabo mwanda wa musaka, muzo, bitenta nansha mumwekelo mukwabo wa panja.

Ino, Yehova umonanga byobya bidi mu mutyima wetu. (1 Samwele 16:7; Nkindi 21:2) Petelo wābwejeje’ko amba: “Mu mizo yonso enka umutyina, ulonga bilumbuluke nabya ye waitabijibwa kudi aye.” (Bilongwa 10:35) Kutyina Leza kushintulula kumulēmeka, kumukulupila ne kuleka kulonga kintu kyo-kyonso kibwanya kumufityija ku mutyima. Kulonga bilumbuluke i kulonga ne mutyima tō byoloke ku meso a Leza. Yehova usangelanga muntu udi na mutyima wa kwakamwa umutonona alonge byoloke.​—Kupituluka 10:12, 13.

Shi kebakusañune nansha kukubōlola, udi na bubinga buyampe bwa kukankamikilwa na binenwa binene Petelo padi Leza. Yehova ukokelanga bantu ba mizo yonso ku mutōtelo wa bine. (Yoano 6:44; Bilongwa 17:26, 27) Wivwananga ne kulondolola milombelo ya batōtyi bandi pampikwa kubanga musaka wabo, muzo, nansha kisaka. (1 Balopwe 8:41-43) Tubwanya kukulupila’mba, kitatyi kitalanga Yehova pano pa ntanda, umonanga’po’nka muzo umo kete​—muzo wa muntu. Le kino kibakutonona wifunde myanda mivule padi uno Leza wampikwa mboloji?

Butangi bwa Bible bwa mu Kweji 6

Yoano 17–Bilongwa 10

[Bushintuludi pa paje 8]

Kitatyi kitalanga Yehova pano pa ntanda, umonanga’po’nka muzo umo kete​—muzo wa muntu