Le Yesu Paāsangukile, Wādi na Ngitu ya Misunya’ni Nansha ya Mushipiditu?

Bible unena’mba Yesu, “waipailwe mu ngitu, ino wasangulwa mu mushipiditu.”—1 Petelo 3:18; Bilongwa 13:34; 1 Bene Kodinda 15:45; 2 Bene Kodinda 5:16.

Binenwa bya Yesu mwine byālombwele amba kāsangukilepo na ngitu ya mashi ne mema. Wānene amba wādi wa kupāna “ ngitu [yandi] mwanda wa būmi bwa ino ntanda,” bu kinkūlwa kya kukūla bantu. (Yoano 6:51; Mateo 20:28) Shi wāsangukile na ngitu ya misunya, kitapwa kyandi kya kinkūlwa kekyādi kya kwikala na mvubu. Ino kino kekyādipo kibwanya kulongeka mwanda Bible unena’mba, wālambwile kitapwa kya ngitu ne mashi andi “dimo kupwididile.”—Bahebelu 9:11, 12.

Shi Yesu wāsangukile na umbidi wa mushipiditu, bandi bana ba bwanga bamumwene namani?

• Bipangwa bya ku mushipiditu bibwanya kuvwala ngitu ya bu muntu. Kimfwa, bamwikeulu bēivwele pa kala, bādya enka ne kutoma na Bantu. (Ngalwilo 18:1-8; 19:1-3) Inoko bādi’nka bu bipangwa bya ku mushipiditu, kadi bādi bāshiya kīkalo kya pano pa nshi.—Batyibi 13:15-21.

• Yesu pa kupwa kusanguka, wāvwele ngitu ya bu muntu mu kitatyi kityetye, monka mwēivwadile bamwikeulu dibajinji. Inoko, byaādi kipangwa kya ku mushipiditu, wādi ubwanya kumweka ne kujimina na mu kitulumukila. (Luka 24:31; Yoano 20:19, 26) Paādi umweka kitatyi ne kitatyi kādipo’nka na ngitu imo yonka. O mwanda, enka ne balunda ba Yesu bāmuyukīle’nka ku byaānenene nansha byaālongele.—Luka 24:30, 31, 35; Yoano 20:14-16; 21:6, 7.

• Yesu paāmwekēle mutumibwa Tomase, wāvwele ngitu ya mikovu. Wālongele namino mwanda wa kukomeja lwitabijo lwa Tomase, ke-pantu Tomase wādi upatana’mba Yesu kasangukilepo.—Yoano 20:24-29.