Mosesa ne Alone Abakamone Felo

PĀJOKĒLE Mosesa mu Edipito, wālombwele mwanabo Alone bingelengele byonso. Ebiya, Mosesa ne Alone bālombola’byo Bene Isalela, bantu bonso bāitabija’mba Yehova wādi nabo.

Kupwa Mosesa ne Alone bāenda kukamona Felo. Bāmunena’mba: ‘Yehova Leza wa Isalela wanena’mba, “Leka bantu bami bende mafuku asatu, bakantōte mu ntanda mutuputupu.”’ Ino Felo wālondolola’mba: ‘Ami nkitabijepo mudi Yehova. Kadi nkikalekapo Isalela ende.’

Felo wākalabala, mwanda bantu bādi ba kuleka mingilo bakatōte Yehova. Penepa wēbengidija mingilo ya kasusu kutabuka. Bene Isalela bātompwela Mosesa pa muswelo umbi waebasuswija, Mosesa nandi wāfitwa mutyima. Ino Yehova wāmunena aleke kukambakanya mutyima. Yehova’mba: ‘Kudi kyonkalonga Felo alekelele bantu bami.’

Mosesa ne Alone bākamona Felo dikwabo. Penepa bālonga kingelengele. Alone wāela mukombo wandi panshi, nao wāalamuka ke nyoka mukata. Bañanga ba Felo nabo bāela mikombo yabo panshi, nayo ke banyoka. Ino, tala! Nyoka wa Alone kamina banyoka ba bañanga. Nansha nankyo, Felo wapele kulekelela bene Isalela bende.

Pano kyaba kya Yehova kya kufundija Felo bufundiji kampanda kibabwana. Uyukile mwasa kumufundijija’bo? Usa kuleta mpupo 10, ko kunena’mba byamalwa bikatampe pa Edipito.

Kupwa kwa bipupo bivule, Felo wādi wityija Mosesa ne kunena’mba: ‘Imika kipupo, nkaleka Isalela ende.’ Ino kipupo pa kwimana, Felo wāshinta milangwe yandi. Wāpela bantu bende. Ino ku mfulo, kupwa kwa kipupo kya 10, Felo wāleka Bene Isalela bende.

Lelo uyukile kimo ne kimo kya mu mpupo 10? Alamuna dyani twibiyuke.