Yesu Udisha Bantu Bavule

KUBAIKALA kintu kilengeja moyo. Yoano Umbatyiji ukitamba mu kwipaibwa. Helodyasa, mukaja mulopwe kadipo umusenswe. Kadi wanene mulopwe amba batyibe mutwe wa Yoano.

Yesu pa kwivwana uno mwanda, wakwatwa bulanda mpata. Waenda kwitolwela kwa bunka. Ino bantu abamulonda. Yesu pa kumona kibumbo, wekikwatyilwa lusa. Kupwa webasapwila mwanda wa bulopwe bwa Leza ne kubelula babela.

Kyolwa, bandi bana ba bwanga abaiya kebamunena’mba: ‘Dyuba dibai, kadi kuno i kufula. Nena bantu bakepotele byakudya mu bibundi bya pabwipi’bi.’

Yesu walondolola’mba: ‘Ke bendapo. Mwibapei bidibwa.’ Kupwa Yesu watadīla kudi Fidipa kaipangula’mba: ‘I kwepi kotukapota bidibwa bibwana bantu bonso’ba?’

Fidipa walondolola’mba: ‘Kupota bidibwa bya kupa muntu ne muntu kakibese, kukalomba lupeto luvule.’ Andele wanena’mba: ‘Uno mwanuke udi’nka na tumikate tutano ne tumishipa tubidi kete. Ino kebikabwanapo bantu bonso’ba.’

Yesu wanena’mba: ‘Lombolai bantu bashikate pa biyombo.’ Kupwa wafwija’ko Leza mwanda wa bidibwa, ne kwanza kutyumuna’byo bibesebibese. Kupwa bana ba bwanga abaabila bantu bonso mikate ne mishipa. Badi bana-balume 5 000, ne tununu tukwabo twa bana-bakaji ne bana. Bonso abadi abaikuta. Ino bana ba bwanga ababunge bidibwa byashala, bibayula bilala 12!

Kupwa Yesu wanena bandi bana ba bwanga bende bukila bwa Dijiba dya Ngadilea lwa bwato. Kubaiya luvula lukatampe bufuku, mantanki abalumbakanya bwato. Bana ba bwanga abazakala bininge. Ino mu bufuku, abamone muntu wiya kobadi, ulandala pa mema. Penepo kebasame moyo, mwanda kebayukilepo kyobamona.

Yesu wanena’mba: ‘Kemwakizakalai. I ami!’ Ino kebetabijepo. Penepo Petelo wanena’mba: ‘Shi bine wi Mfumwetu, nankyo nena nami nandale pa mema ngiye kodi.’ Yesu walondolola’mba: ‘Iya!’ Petelo waabuka kalandala pa mema! Kupwa moyo ubamukwata kakuluka, ino Yesu wamwabula.

Kupwa, Yesu wadisha bantu bakwabo tununu. Webadisha na mikate isamba-ibidi ne tumishipa tutyetye. Kadi abaikuta monka. Mwene i kya kutulumukwa pa kumona mutela Yesu bantu mutyima? Pakaludika Yesu bulopwe bwa Leza, ketukabulwepo kintu nansha kimo!