Shapita 2

Walēmekwa Kumeso kwa Kubutulwa’ye

MWIKEULU Ngabudyele pa kupwa kusapwila nsongwakaji Madia amba ukabutula mwana mwana-mulume ukekala mulopwe wanyeke, Madia wamwipangula’mba: “Lelo kino kikēkalanga namani, byo nkiyūkile mwana-mulume.”

“Mushipiditu [s]andu ukakwilako,” ye Ngabudyele umushintulwila papo, “ne bukomo bwa Wamūlumwine-bukakuputa, ino kadi kyakubutulwa kikola kikatelwa ke Mwana Leza.”

Mwanda wa kukwasha Madia etabije uno musapu, Ngabudyele waendelela na kunena’mba: “Talapo ku Edisabeta mulongo obe nandi waimityila mwana mu bununu bwandi, ne kweji uno ke wandi wa busamba, yewa wadi utelwa bu-ñumba. Ke-kuntu kwa Leza kutupu kyakumukolela, mhm.”

Madia waitabija kinenwa kya Ngabudyele. Lelo walondolola namani? Wanena’mba: “Nanshi mupika wa Yehova i ami uno, angubileko mwānenena mo monka.”

Aye Ngabudyele utaluka wenda, Madia nandi wakute lwendo kaenda kukapempula Edisabeta wikalanga na wandi mulume Zakadiasa mu ntanda ya ngulu ya Yudea. Tamba ku njibo ya Madia ku Nazala, i lwendo lulampe lwa mafuku asatu nansha aná.

Madia wafika ku njibo ya Zakadiasa, watwela, webemuna. Edisabeta kala wayulwa mushipiditu sandu, kasapwila Madia amba: “Dyese dyobe abe mu bāna-bakaji, ne kya munda mobe nakyo i kya dyese monka. Kadi lelo kino kyo kyami namani mwanda mpempulwepo ne inandya Mfumwami. Penepo talapo, ponka pa kwivwana mu matwi diwi dya lwimu nanshi kāna kabatomboka tusepo munda mwami.”

Madia pa kwivwana namino, walondolola na kufwija’ko kukatampe amba: “Wami mutyima utōtanga Yehova. Ne mutyima wami usepelelanga Leza wami Mupandiji. Ke-muntu watale ku bulanda bwa mupika wandi, ke-kuntu kushilwila kwa dyalelo dino makongo onso a bantu bakantelako bu-wadyese. Mwanda Mwine Mukomo wami wanongela bintu bikata.” Nansha byapebwa Madia buno bulēme, ino ntumbo yonso wape’yo Leza. Amba: “Dyandi dijina nadyo i dikol[a]. Kadi lwandi lusa i lwa ku makongo a bantu, ne ku makongo a bantu, ku boba bakumutyina kadi.”

Madia waendelela na kutendela Leza na lwimbo lwa bupolofeto lwa ku bukomo bwa mushipiditu, amba: “Walumbulwile bukomo ku kuboko kwandi; wapalankanya bakibengo mu kufwatakanya kwa mityima yabo. Babulopwe nabo wabikula’bo ku bipona, kadi ne balanda bene wazunzula’bo. Banzala nabo webēkutija binengele byonka, ne bampeta nabo webafundula makasa bitupu. Ebiya Isalela mwingidi wandi nandi wamukwashako ne kuvuluka lusa. Mwānenene ku bakulutuba betu, ne ku Abalahama, ne ku nkunwa yandi nyeke.”

Madia washikata na Edisabeta kubwipi kwa myeji isatu mituntulu, ukwasha’ko Edisabeta pakatampe mu bula bwa ano mayenga amfulo a dimi dyandi. I kintu kilumbuluke pa kumona bano bana-bakaji babidi bakikōkeji bemite memi na bukwashi bwa Leza, bashikete pamo mu kino kitatyi kyobapelwe madyese makatampe mu būmi bwabo!

Lelo uwamone bulēme bwapebwa Yesu kumeso kwa kubutulwa’ye? Edisabeta wamutela bu “Mfumwami,” ne wandi mwana kabutwilwe watumbuka nsangaji pafikile Madia. Ku mutamba mukwabo, mwenda mafuku, bakwabo abashilula kupēlula Madia ne wandi mwana kabutwilwe mwine, bino byonso tusa kwibimona kumeso’ku. Luka 1:26-56.

▪ I bika byanena Ngabudyele mwanda wa kukwasha Madia etabije amba ukemita?

▪ I muswelo’ka walēmekwa Yesu kumeso kwa kubutulwa’ye?

▪ I bika binene Madia mu lwimbo lwa ku bukomo bwa mushipiditu mwanda wa kutendela Leza?

▪ Madia waije mafuku anga na Edisabeta, ne mwanda waka i kyendele’mo ashikate na Edisabeta mu kino kitatyi?