Shapita 25

Kukwatyilwa Wamakopo Lusa

YESU ne bandi bana-babwanga baná benda bananga mu bibundi bya Ngadilea, myanda ya bintu bya nkuo byalonga iyasambakana mu bulolo bonso. Lupupuji lwa bilongwa byandi luwakafika ne mu kibundi kimo mudi muntu ubela makopo. Muñanga Luka umutela bu ubela “makopo ngitu yonso.” (MB) Ino i misongo ilenga moyo, mwanda shi ibatonda, ityibanga bityebitye bipindi bishileshile bya ku ngitu. Bine, uno wamakopo udi bya bulanda.

Yesu pa kufika mu kibundi, uno wamakopo wamufwena. Mwendele Bijila bya Leza, wamakopo ufwaninwe kwela lubila lwa kidyumu, amba “Ne musubile, ne musubile,” mwanda wa kukinga bakwabo kebakimufwena kubwipi, kutyina amba akebasambukila. Pano uno wamakopo wapone panshi bukuvumane, kalombe Yesu amba: “Mfumwami, shi uswele, nankyo uyūke kuñundapapo.”

Bine uno muntu udi na lwitabijo mudi Yesu! Bine ino misongo yandi imumwekeja bya bulanda! Yesu usa kulonga’po kika? Shi wadi amba i abe, longa ulongele’po kika? Yesu wamukwatyilwa lusa, wamolwela kuboko kwandi, wamutenga, amba: ‘Nswele. Pwibwa.’ Ponka na ponka, makopo mamupwididile.

Mwene usenswe muntu walusa uno muswelo kwikala bu mulopwe obe? Muswelo wakwatakanya Yesu uno wamakopo witukulupijanga’mba pa kukabikala’ye mu Bulopwe Bwandi, bupolofeto bwa Bible bukafikidila, bwa’mba: “Ukebafwila lusa balanda ne badi makasa, kadi ne myuya ya badi makasa ukeīpandijanga.” I amo, Yesu ukafikidija myanda yonso yadi nayo ku mutyima ya kukwasha bafudilwe bonso.

Mwingilo wa Yesu uwalenga kwisakanya kukatampe mu bantu, aye papo kaundapile ne wamakopo mwine. Pano Yesu wasapwila mundapwa, mwanda wa kufikidija bupolofeto bwa Isaya, amba: “Kokasapwila muntu, mhm.” Kupwa wamusoñanya’mba: “Enda kēlombole abe mwine kudi mupidishitu [kitobo, NW], usele mpalo ya kupwibwa kobe, mwālaīle Mosesa, mwanda wa pakwibasapwila.”

Ino uno muntu udi na nsangaji mikatampe, wakomenwa ne mwa kufindila kino kingelengele. Wataluka wenda usapula uno mwanda konso konso, bantu bonso abaimana nteitei, Yesu wakomenwa kutwela kīmwesha mu kibundi. Ebiya Yesu wetolwela pafula, pakubulwa muntu, ino bantu ba mitamba ne mitamba abaiya kumwivwana ne kundapibwa misongo yabo. Luka 5:12-16; Mako 1:40-45; Mateo 8:2-4; Levi 13:45; 14:10-13; Mitōto 72:13; Isaya 42:1, 2.

▪ Makopo akokeja kwikadija muntu namani, ne wamakopo wādi ufwaninwe kudyumuna bantu namani?

▪ Wamakopo umo waabija Yesu muswelo’ka, ne i bufundiji’ka botukokeja kuboila pa kino kyalonga’po Yesu?

▪ Uno mundapwa wakankalwa namani kulonda bimunene Yesu, ne i bika byalupuka’ko?