Shapita 69

Kukimba Kuyuka Shabo

MĪSAMBO ya Yesu na bendeji ba Bayuda yenda inana mu bula bwa masobo. “Nemuyūka byo mudi nkunwa ya Abalahama,” ye Yesu witabija, “ino musaka kuntapa. Ke-muntu mwanda wami munda mwenu i mutupu’o. Mwanda ami nēsamba byo namwene kudi Tata, bānwe nenu mulonga byo mwamwene kudi shenu.”

Nansha shi Yesu katelelepo shabo pa dijina, inoko walombola patōka’mba shabo i mwishile na shandi. Bendeji ba Bayuda kebayukilepo uno unenena’po Yesu, abalondolola’mba: “Eyo! Tata mwine i Abalahama.” I bemone amba badi na lwitabijo pamo bwa lwādi na Abalahama, wādi mulunda na Leza.

Ino Yesu webatape ku mityima pa kwibatentulula’mba: “Shi mwadi bāna ba Abalahama longa nankyo ne mīngilo ya Abalahama mīne muloñanga[’yo].” I kyabine, mwana wiulanga shandi. “Ino pano ke mukimbe kuntapa,” ye Yesu unena, “ami muntu wimusapwila b[u]binebine b[o]naivwene kudi Leza. Ino Abalahama aye kalongele[po] namino, mhm.” Yesu wanena monka’mba: “Bānwe muloñanga mīngilo’nka ya shenu.”

Ne pano pene kebayukile shabo wisambila’po Yesu. Bakītela’nka bu bana ba Abalahama, amba: “Bātwe ketubutwidilwepo mu makoji, mhm.” Befwatakenya amba i batōtyi babine pamo bwa Abalahama, abetela’mba: “Tata i umo enka Leza mwine.”

Lelo Leza ye Shabo binebine? “Shi Leza wadi shenu,” ye Yesu ulondolola, “longa nankyo kunsanswa munsenswe, ke-ne-muntu ami ne mutambe konka kwa Leza, ne byo ndi pano’bi ami uno; kenemwīle ami mwine, mhm, i aye wantalwile. Lelo bika byo kemuyūkile muneneno wami o nena?”

Yesu utompa kulombola bano bendeji ba bipwilo byamalwa bikebafikila mwanda wa kumutuna kobamutuna. Ino pano webalombwedidila’tu amba: “Bānwe shenu mwine i dyabola, ne byamakomwameso bya shenu byo mutwelemo mityima yenu kulonga.” Lelo Dyabola i shabana wa muswelo’ka? Yesu wamutela bu ntapañani, kadi amba: “I wabubela, e enka shandya ne bubela bwine.” O mwanda Yesu wavuya kishima’mba: “Wa kwa Leza kadi abulwe kwivwana binenwa bya Leza? Ino bānwe kwivwana’byo mpika, nanshi kemudipo ba kwa Leza.”

Bayuda, na bulobo bwa matope ebatopeka Yesu, abatentulula’mba: “[Mwene] nanshi i binebine byo tunenanga’mba: Abe wi mwine Samadia udi ne mudemona?” Kutela muntu bu “mwine Samadia” i mwityilo wa kapuni ne kibengo, mwanda bene Samadia i bantu bashikibwe na Bayuda.

Yesu waleka kwisambila pa kapuni kobamupunika bu mwine Samadia, walondolola’tu amba: “Nkidipo na mudemona, mhm, ami ndemekanga Tata, ino bānwe mumpelula.” Pa kwendelela, Yesu waleta uno mulao utulumuja’mba: “Muntu wakōminina mu mwanda wami, nabya lufu kakamone’lopo, nansha patyetye pene.” Mungya buluji, bino binenwa bya Yesu kebishintululapo amba boba bonso bamulonda kebakifupo luno lufu lufwanga bantu bonso. Ino bishintulula’mba, kebakonekapo lonso nansha kufwa “lufu lwa bubidi” lwampikwa lusangukilo.

Ino Bayuda abakwata bino binenwa bya Yesu pa bute pa bute. Kebanena’mba: “Pano po pene nanshi tubakuyūka, udi na mudemona. Abalahama mwine wafwa ne bapolofeto bonso kumo, ino abe unen[a]’mba: Muntu wakōminina mu mwanda wami nabya kakikamone lufu nansha patyutyu pene; e-e!! Lelo abe umukidile mukulutuba wetu Abalahama wafwile’wa’ni? Nansha bidi bapolofeto bafwile’ba; le abe ubēalamuna kōdi ani?”

Mu ino mīsambo yonso, i bimweke patōka’mba Yesu ulombola bano bantu amba aye ye Meshiasa mwine wālailwe. Inoko pa kyaba kya kwibalondolola patōkelela ku kipangujo kyabo kya kumuyuka shi i ani, Yesu wanena’mba: “Wivwane shi nētumbije ami mwine nankyo ntumbo yami i ya bitu[pu] bitupu; i Tata mwine untumbija, enka o munena’mba: I Leza wetu’o. Nanshi kemumuyūkilepo, ino ami namuyūka kala, shi kadi nene’mba: Nkimuyūkilepo; nabya nankyo nadingakana pamo’nka na bānwe babubela.”

Mu kwendelela, Yesu wesambila monka padi Abalahama wakikōkeji, amba: “Abalahama mukulutuba wenu wansepelele’mba: Nkamumonangapo pa mwaka wandi. Ne kumona weumwene, ne ku mutyima to-o!” Eyo, Abalahama wābadikile kumona na meso a lwitabijo kwiya kwa Meshiasa. Bayuda abapele kumwitabija, amba: “Le abe’tu kwafikije nansha myaka makumi atano mīne umonwe ne Abalahama?”

‘I binebine nemusapwila,’ ye Yesu ulondolola, ‘ne Abalahama mwine kaikele’ko, ami kendi’ko kala.’ Pano Yesu wisambila pa būmi bwandi bwaādi nabo kumeso kwa kwiya’ye pano pantanda, bwa bu muntu wa kumushipiditu wa bukomo momwa mūlu.

Yesu pa kunena’mba aye wādi’ko kala ne Abalahama mwine kaikele’ko, Bayuda abakalabala, ababoya mabwe a kumwasa. Ino Yesu wafyama, watambidila panja pa tempelo pampikwa kimutapile. Yoano 8:37-59; Kusokwelwa 3:14; 21:8.

▪ Yesu walombola muswelo’ka amba, aye ne balwana nandi badi na bashabo pala pala?

▪ Kwitwa bu mwine Samadia kwaitwa Yesu na Bayuda kudi na buluji’ka?

▪ I bika bisaka kunena Yesu pa kushintulula’mba balondi bandi kebakamonepo lufu?