Shapita 91

Lazalasa Wasangulwa

YESU ne benda bamulonda abafika pano ku kibundu kivulukwa kya Lazalasa. I mutá mushitwe na dibwe ditūlwe pa ntwelelo. “Fundulaipo dibwe’di,” ye Yesu unena.

Mata wapele, mwanda kayukile bisaka kulonga Yesu. “Abe Mfumwami,” ye Mata unena, “pano kanunka, le muntu mufwe mafuku ke aná nenki.”

Ino Yesu waipangula’mba: “Le nkyakunenepo’mba: Shi witabije nankyo ukamonanga ntumbo ya Leza, a?”

Papo abatalula dibwe. Ebiya Yesu wabandula meso mūlu kalombe amba: “Abe Tata, ubafuko, nakufwijako byōbañivwana. Kadi ami ndyūkile’tu nansha mafuku onso mēne ungivwananga, ino pano kadi, mwanda wa kibumbo kino kīmene nekinena’mba, abo bētabije byo natuminwe ne abewa.” Yesu walombela mu kitango kya bantu mwanda wa bantu bayuke amba byasaka kulonga pano i bya ku bukomo bumupele Leza. Penepo wanena na diwi dikatampe amba: “Abe Lazalasa, lupukamo!”

Aye upwa kunena namino, Lazalasa nandi ulupukidila’mo. Maboko ne maulu andi mavungilwe mu bisandi byamujīkilwe nabyo, ne kisandi kimukute mu mpala. “Muvungululeimo, ēnde,” ye Yesu unena.

Bayuda bavule baile kumona ba Madia ne Mata pa kumona kino kingelengele, abaitabija mudi Yesu. Ino bakwabo abaenda kudi Bafadiseo kukebasapwila uno mwanda walongeka. Ponka na ponka, babitobo bakatampe ne Bafadiseo abakumankanya kidye kikatampe kya Bayuda, kitwa bu Sanhedrini.

Mu Sanhedrini mudi Kaifasa, kitobo mukatampe wa panopano, kutentekela’po Bafadiseo ne Basadusea, babitobo bakulumpe, ne boba bādi babitobo bakatampe pa kala. Bano bonso kebatompola’mba: “Le tūbanga namani? muntu uno’u ulonga’tu biyūkeno bya ntanda ne ntanda. Wivwane tumuleke bitupu, nankyo bantu bonsololo bapwe kumwitabija, nabya bene Loma bakāye’tu kwitutekuna ntanda yetu īno, ne muzo wetu mwine kumo.”

Bano bakata ba bipwilo, nansha byobayukile amba Yesu “ulonga’tu biyūkeno,” ino kintu kimo kete kyobakalakala nakyo i kitenta kyabo ne lupusa lobadi nalo. Kusangulwa kwa Lazalasa i bukamoni bwa bukomo bwalombolwa Basadusea, mwanda kebetabijangapo amba kudi lusangukilo.

Kaifasa, shi Musadusea ketuyuka, kishima tentu amba: “Nanshi bānwe kemudipo ne kyo muyūkile kīne, mhm. Nansha kuvulukapo mpika byo kitufwaninwe’mba, umo afwile bantu, nankyo muzo onso keukōnekapo, mhm.”

Leza ye wasoñanya Kaifasa anene namino, mwanda mutumibwa Yoano wasonekele mwenda mafuku amba: “Nanshi [Kaifasa] byānene nabya ke aye mwine wanenene.” Mungya buluji, Kaifasa usaka kunena’mba Yesu unenwe kwipaibwa, shi bitupu wakendelela na kusebula bitenta byabo bya lupusa ne byepelo byabo. Ino mungya munenena Yoano, ‘Kaifasa i munene bupolofeto bwa amba Yesu unenwe kufwa, ino kafwilapo’nka muzo kete, mhm, ufwila kukongakenya pamo bana ba Leza.’ Nanshi i byabine, mpango ya Leza i ya amba wandi Mwana afwe bu kinkūlwa pa mwanda wa bonso.

Pano Kaifasa usongeleja Sanhedrini ikute bitumba bya kwipaya Yesu. Ino Yesu wataluka’mo, kepabulwe padi wayukila uno mwanda kudi Nikodema, umo wa mu Sanhedrini upwene nandi. Yoano 11:38-54.

▪ Mwanda waka Yesu walombela mu kitango kya bantu kumeso kwa kusangula Lazalasa?

▪ Boba bamwene luno lusangukilo abalonga’po kika?

▪ Mutyima umbi wa bano ba mu Sanhedrini ulombola kika?

▪ Kaifasa wadi na milangwe’ka, ino Leza wamwingidija anene bupolofeto’ka?