Shapita 96

Yesu ne Nsongwalume Mpeta Muludiki

AYE Yesu pa kupita mu bulolo bwa Pelea wenda ku Yelusalema, kubaiya nsongwalume umo lubilo, wamufukatyila kumeso. Uno mwana-mulume witwanga bu muludiki, kepabulwe padi udi na kitenta kikatampe mu shinakoka ya mu uno mwaba, nansha kadi i umo wa mu Sanhedrini. Kadi i mpeta wa ntanda ne miseke. “Abe Mufundiji muyampe,” ye aye wipangula, “lelo kyo nsaka ngube i kika, mpyane būmi bwa nyeke ne nyeke?”

“Lelo i bika byo untelela buyampe?” ye Yesu utentulula, “kutupu muyampe poso Leza enka.” Bimweka’mba uno nsongwalume waingidija kishima “muyampe” bu kitenta, o mwanda Yesu wamuyukija’mba kyakyo kitenta i kya Leza bunka bwandi kete.

‘Shi usaka kutwela mu būmi, endelela na kulama bijila,’ ye Yesu ukinena.

“Le bijila ka?” ye mwana-mulume wipangula.

Yesu pa kulondolola, wamutelela mbila itano ya mu Mbila Dikumi, amba: “Kokēpaya muntu. Kokēnda makoji. Kokēba. Kokabepela mukwenu. Kadi wikale kulemeka shobe, ne inobe.” Kupwa Yesu wabweja’ko ne lubila lwine lukatampe amba: “Kadi kasanswe mukwenu mo wisanshilwe abe mwine.”

“Byabyo byonso nebilamine kala, ne ku bwanuke bwami,” ye mwana-mulume ulondolola musumininwe ne mutyima umo. “Le byo mbudilwe kadi i kika?”

Yesu pa kwivwana kulomba na kininga ne na mutyima umo kwa uno mwana-mulume, wamusanswa bininge. Ino Yesu wamone kulamata kulamete uno muntu ku byabupeta bya kungitu, kamulombola bikimusakila’ko, amba: “Kudi enka kintu kimo kikubudilwe: Enda kapote[je] byonso byodi nabyo; lupeto lwa wabile lo balanda, ukamona bupeta mulu. Penepa wiye unonde.” (BB)

Uno mwana-mulume wafītwa mutyima fututu, wataluka kaenda, Yesu kamutale mwaya bya lusa. Bupeta bwandi bubamusabe meso a kumona mvubu ya byabulēme byabine. “Kebyo kukola,” ye Yesu utompola, “pa walupeto kutwela mu bulopwe bwa Leza!”

Bino byanena Yesu bibabezemuna bana-babwanga. Ino po pene abatulumukila’ko bininge pa kwivwana Yesu uleta mulangwe utenga bantu bonso amba: ‘I kipēla kudi ngamedia kutwela mu dīso dya lushinge, kutabuka kudi mpeta pa kutwela mu bulopwe bwa Leza.’

“Le ino byo byaikala nankyo uswa kukapandako i ani?” bo bana-babwanga basaka kuyuka.

Yesu webabambila meso sōo, kupwa webalondolola’mba: “Kino i kya kukomenwa na bantu, nanshi kudi Leza i kilongelonge’tu kekudi kyakumukomena.”

Petelo pa kumona’mba abatonge butongi bwishile na bwa nsongwalume mpeta muludiki, wanena’mba: “Monapo bidi, bātwe byo twashīle byonso ke tukulonda.” Ebiya waipangula’mba: “Lelo byo tusa kukamona bātwe i bika le?”

“Bānwe banonda’bo,” ye Yesu ulaya, “pa kupangulula pākatentama Mwanā muntu pa kipona kya ntumbo yandi, nankyo nenu mukatentama pa bipona dikumi ne bibidi, kuketa mambo a bisaka dikumi ne bibidi bya bene Isalela.” Byabine, Yesu walombola’mba kukekalanga kupangululwa kwa ngikadilo pano pantanda mwanda wa bintu bikale mobyādi bikadile mu budimi bwa Edena. Petelo ne bana-babwanga bakwabo bakapalwa mpalo ya kukabikala pamo na Kidishitu pa Paladisa ikasambakana pano pantanda ponso. I kyabine, mpalo mikatampe uno muswelo ifwaninwe kwipānina mu muswelo o-onso!

Ino ne pano pene mpalo idi’ko kala, mwanda Yesu wakome amba: “Kepadipo, nansha umo, waku[shiy]a njibo, nansha bāna babo, bana-balume ne bāna-bakaji, nansha bashandi ne inandi bene, nansha . . . bāna, nansha madimi, pa mwanda wa amiwa ne pa myanda-miyampe. Aye kabulwepo kumona ponka pano katwa ka mōbo, ne ka bāna babo bāna-balume, ne katwa ka bāna babo bāna-bakaji, ne ka bainabo, ne ka bāna, ne katwa ka madimi, ne kupangwapangwa kudi ponka, ebiya myaka ya kukāya būmi bwa kulādila nyeke na nyeke.”

Monka mwalaila Yesu, konso kwenda bana-babwanga mu ino ntanda, benda batana’ko bene Kidishitu bakwabo bobabutulwa nabo musuku muloe kadi mulēme kupita’ko ne obabutulwa na ba mu kisaka kya kungitu. Bine uno nsongwalume mpeta muludiki wajimija ino mpalo ne yoya ya kukekala na būmi bwanyeke mu Bulopwe bwa Leza momwa mūlu.

Kupwa Yesu wabweja’ko amba: “Ebiya kadi bangi bangi badi babajinji bakēkalanga kumfulo, bakumfulo nabo bakēkalanga ke babajinji.” Le usaka kunena bika?

Usaka kunena’mba bantu bavule “babajinji” mu madyese a mu mitōtelo, pamo bwa uno nsongwalume mpeta muludiki, kebakatwelapo mu Bulopwe. Bakekala “bakumfulo.” Ino bavule, kubadila’mo ne bana-babwanga ba Yesu betyepeje, belwa mwenji na Bafadiseo bemwene bu boloke amba i “bakumfulo”—bantu ba pano pantanda, ba ‛am ha·’aʹrets—bo bakekala “babajinji.” Kwikala “babajinji” kwabo kushintulula’mba bakapebwa madyese a kwikala babikadi pamo na Kidishitu mu Bulopwe. Mako 10:17-31; Mateo 19:16-30; Luka 18:18-30.

▪ Uno nsongwalume mpeta mwine i muludiki wa muswelo’ka?

▪ I kika kyapelela Yesu kwitwa bu muyampe?

▪ Kifwa kya uno nsongwalume muludiki kilombola muswelo’ka kyaka kya kwikala mpeta?

▪ I mpalo’ka yalaya Yesu ku bandi balondi?

▪ Babajinji bakekala namani ba ku mfulo ne ba ku mfulo ke babajinji?