Shapita 98

Lufu lwa Yesu Lubafwena, Ino Bana-Babwanga Bepatanya

YESU ne bandi bana-babwanga kebadi kubwipi na Munonga wa Yodano obatyibulula, batamba mu bulolo bwa Pelea benda mu Yudea. Badi ne bakwabo bavule bobenda nabo ku masobo a Pashika wa 33 K.K., pano kubashala kintu kya yenga umo nenki asobwe.

Yesu watangidila bandi bana-babwanga kumeso, abatulumuka kusumininwa kwandi pakubulwa moyo. Vuluka, pafwile Lazalasa mayenga matyetye kunyuma, Yesu kasake kutaluka mu Pelea ende mu Yudea, Tomase wakankamikile bakwabo amba: “Twendei nanshi ne bātwe bene tukafwei nandi pamo.” Kadi vuluka, papwile Yesu kusangula Lazalasa, Sanhedrini yakutyile bitumba bya kwipaija Yesu. O mwanda bana-babwanga abakwatwa moyo pano pobatwela mu Yudea dikwabo.

Yesu waityila bano 12 pafula mwanda wa kwibateakanya ku bintu bīya kumeso, webasapwila’mba: “E! Talaipo bidi, byo tukanda ku Yelusalema kuno, ne Mwanā muntu ukasokolwa ku [babitobo] bakatampe, ne ku basonekeji. Ebiya bakamuponejanga ku lufu, bakamusokwela ne ku baJentaila, bakamubengeje, ne kumukupila pamo, kadi bakamwipaīdile [ku mutyi], ebiya mu difuku dya busatu ukasanguka dikwabo.”

Uno ke musunsa wa busatu wasapula Yesu lufu ne lusangukilo lwandi kudi bandi bana-babwanga mu ino myeji ya panopano. Nansha byobamwivwana panena, ino kebamwivwanijepo. Kepabulwe padi i kukulupila kobakulupile kujokejibwa kwa bulopwe bwa Isalela pano pantanda, batengele kwikala na ntumbo ne bulēme mu bulopwe bwa pano pantanda na Kidishitu.

Mu bañenda benda ku Pashika mudi ne Salome, inandya mutumibwa Yakoba ne Yoano. Yesu witanga bano bana-balume bu “bāna ba kukungula pamo bwa mvula,” i bine, mwanda i bana-balume bakabe. Kyaba kimo, bano babidi baikele kwabila kwikala bakatampe mu Bulopwe bwa Kidishitu, basapwila’mo ne inabo. Pano inabo webafwenena kudi Yesu, wamufukatyila kumeso, kamulombe kyepelo.

“Lelo i bika byōsaka?” ye Yesu wipangula.

Nandi amba: “Nsakile unene bāna bami bano [babidi] bāna-balume, bashikate mu bulopwe bobe, umo ku lundyo lobe, ungi ku lunkuso.”

Yesu wayuka kutambile uno mulangwe wa kulomba, kanena Yakoba ne Yoano amba: “Kemuyūkilepo kyo mulomba’kyo. Lelo muyūke kukatomenamo mu kitomeno kyo ke nsake kutomenamo ami a?”

“Eyo, tukokeja,” bo abo balondolola. Nansha byebalombola Yesu amba usa kutanwa na kupangwapangwa kwamalwa ne kwipaibwa ponka, ino abo mobimwekela kebaivwanije amba bino byamalwa bisa kumutana byo abyo byatela bu “kitomeno” kyasa kutomena’mo aye.

Inoko Yesu webalombola’mba: ‘Kitomeno kyami shakyo mukekitoma, ino kuno kushikata ku lundyo ne ku lunkuso ke kumpelwepo kwaba, ino i kwa boba balongolwedilwe’ko kala na Tata.’

Kepejijepo, batumibwa bakwabo dikumi abayuka kino kilomba ba Yakoba ne Yoano, abakalabala. Kepabulwe padi ba Yakoba ne Yoano bo batādile batumibwa bakwabo pobadi bafwila kuyuka i ani ukekala mukatakata pa bonso. Kuno kulomba kobalomba kubalombola’mba kebalondelepo madingi ebapele Yesu pa uno mwanda. I bya bulanda, kilokoloko kyabo kya kusaka bukatampe mu bakwabo kikidi kikatampe.

Yesu waite bonso 12 pamo mwanda wa kupwija luno lupata lwa mfulo ne nsungu yolwakolomona. Wāshilula kwibadingila bya buswe byonka, amba: “Muyūkile kala bambikavu ba baJentaila bebakōkeja[nga] ponka pa bumfumwabo, nanshi kudi bakatampe bene bebatumine nabo, ne lupusa ponka, ino kudi bānwe kemukalonga nabya, mhm, nanshi yewa usaka kwikala mukatampe mwenu, nabya ēmwingidile mīngilo. Kadi yewa usaka kwikala mukatampe mubukata mwenu, nanshi ēkale umpika wenu.”

Yesu waleta kifwa kyobafwaninwe kwiula, webashintulwila’mba: “Monka mwaīdile Mwanā muntu, aye kaīdile’mba ēngidilwe mīngilo, mhm poso’mba ayeko ēbēngidile, ne kupana muya wandi ke kikūlwa kya bavule bene.” Yesu kekelepo’nka kwingidila bakwabo kete, ino usa kulonga bipite pano na kufwila bantu! Bana-babwanga banenwe kwikala na mutyima udi bwa wa Kidishitu, wa kusaka kwingidilañana kupita’ko kwingidilwa, ne kwityepeja bininge kupita’ko kukimba bitenta bya ntumbo. Mateo 20:17-28; Mako 3:17; 9:33-37; 10:32-45; Luka 18:31-34; Yoano 11:16.

▪ I kika kyakwatyija bana-babwanga moyo?

▪ Yesu wateakanya muswelo’ka bandi bana-babwanga ku bintu bikafika kumeso?

▪ I kika kyalombwa Yesu, ne batumibwa bakwabo abatengwa muswelo’ka?

▪ Yesu wapwija namani mwanda wadi wipatanya batumibwa bandi?