Shapita 99

Yesu Ufundija mu Yediko

KEPEJIJEPO, Yesu ne bibumbo byaenda nabyo abafika mu Yediko, kibundi pendwa difuku dimo kutamba ku Yelusalema. Mobimwekela, Yediko i kibundi kimo pa bibidi, tamba ku kibundi kipya kya bene Loma kufika ku kibundi kikulu kya Bayuda, padi kintu kya kilometele umo ne kipindi. Bibumbo pa kutamba mu kibundi kikulu kebilumba ku kibundi kipya, bampofu ba lulombo babidi abaivwana byungwe. Umo mu bano bampofu i Batemisa.

Ba Batemisa ne mukwabo abaivwana’mba utūtyilwa byungwe’o i Yesu upita, abashilula kwela lubila: “Witufwilekopo lusa abe Mfumwetu, Mwan[ā] Davida.” Kibumbo pa kwibafunina’mba ubai, abo po pene abaningisha kwela lubila na mawi matunduke: “Witufwilekopo lusa abe Mfumwetu, Mwan[ā] Davida.”

Yesu pa kwivwana lunwa lubapite, waimana. Wasapwila benda nandi bete bano bantu bela mabila. Abaenda kudi bampofu ba lulombo, abanena’po umo amba: “Komeja mutyima, taluka ukwitanga.” Nsangaji pa kupita, mpofu waela ne mutwelo wandi wa pangala, wataluka kai kudi Yesu.

“Le i kika kyo musaka nemulongele?” ye Yesu wipangula.

“Abe Mfumwetu tusaka meso etu apūtuke,” bo bampofu babidi bamuzenza.

Yesu webakwatyilwa lusa, watenga meso abo. Mungya mānga ya Mako, Yesu wanena’po mpofu umo amba: “Enda shobe, lwitabijo lobe lubakupandija.” Ponka na ponka, bampofu ba lulombo abashilula kumona, bonso babidi abashilwididila kutumbija Leza. Bantu bonso pa kumona kino kyalongeka, nabo kebatendela Leza. Pampikwa ne kulaba kwine, ba Batemisa ne mukwabo abashilula kulonda Yesu.

Yesu pa kutyibulula mu Yediko, bibumbo bibatūtyika. Bonso bafwila kumona mwine wakomeja bampofu. Bantu ba mitamba yonso abatūtyikila kudi Yesu, pabafīta bantu fututu, bamo abakomenwa ne kumumona. Umo mu bano i Zakiasa, mukulumpe wa basonkeji ba musonko ba mu Yediko, ne ba kufulakufula kwamo. I mwipi bininge, wakomenwa kumona mobipityila.

Zakiasa wabadikila kumeso lubilo, wakanda ku kikuyu kya kufula kwa dishinda dyenda’mo Yesu. Kuno kūlu shako ubwanya kumona biyampe bintu byonso. Bibumbo pa kufwena, Yesu watulula meso kūlu kamwite, amba: “Abe Zakiasa, tūka bidi bukidi bukidi, ke-pantu dyalelo dino’di nsaka mfikile mobe munjibo.” Zakiasa watūka musangale, wapelakana ku njibo kukateakenya mweni mulēme pantu pandi.

Bantu pa kumona namino, abashilula bonso kwiuninga. Amba kekyendele’mopo Yesu kufikila kwa muntu wa uno muswelo. Abe mwine uyukile kala, Zakiasa i mupete lupeto lwa manyongonyongo lwanyoñomonanga bantu mu mwingilo wandi wa kusonkeja musonko.

Bantu bavule kebalonda, Yesu pa kutwela mu njibo ya Zakiasa, kebeuninga’mba: “Nanshi wafikil[a] bweni mwa kipya-mambo.” Ino Yesu umwene mutyima wa kwisāsa udi na Zakiasa. Kyabine, Yesu kafwilepo bumvu, mwanda Zakiasa waimana kanena’mba: “Talapo bidi, Mfumwami, mutamba umo wa lupeto lwami mpane ku balanda, kadi shi natambwile kimo, shi kika, shi kika, ku bubela bwami, ino nami nankyo mulubwile biná.”

Zakiasa walombola’mba kwisāsa kwandi i kwabine, mwanda wasela kipindi kimo kya lupeto wape balanda, kikwabo kishele’ko waalwija’kyo boba baadi udimba. Mobimwekela, wapikula ku mukanda wandi wa musonko mwa kuyukila i binga bya kulubwila bano bantu. O mwanda watyipe mutyipo wa kwibalubwila biná, mwanda wa kulonda munenena kijila kya Leza amba: ‘Shi muntu waibe mukōko umo, nankyo ukafuta mikōko iná ya mu luombe lwa mikōko.’

Yesu waloelelwa muswelo watyipa Zakiasa kwabanya bintu byandi byonso, kanena’mba: “Dyalelo dino’di lupandilo lubafika munjibo muno, ke-muntu aye wadi mwanā Abalahama. Ino Mwanā muntu wīle kusaka apandije bajimine.”

Yesu waletele’nka panopano kifwa kya muntu ‘mujimine’ mu mānga yandi ya mwana wa kisūpa. Ino pano tudi na kifwa kimweke kya muntu wadi mujimine pano wamweka. Nansha bakulumpe ba bipwilo ne bantu bebalonda byobanenakanya ne kwiuningila Yesu mwanda wa mutyima watele bantu badi pamo bwa Zakiasa, inoko Yesu ukyendelela na kukimba ne kujokeja bano bana ba Abalahama bajimine. Mateo 20:29-34; Mako 10:46-52; Luka 18:35–19:10; Divilu 22:1.

▪ Mobimwekela, i kwepi kwetana Yesu na bampofu ba lulombo, ne i bika byaebalongela?

▪ Zakiasa i ani, ne wakandila’ka ku mutyi?

▪ Zakiasa walombola kwisāsa kwandi namani?

▪ I ñeni’ka yotukokeja kuboila ku bino byalongelwa Zakiasa na Yesu?